پرەمەر-مينيستر ءاليحان سمايىلوۆتىڭ توراعالىعىمەن وتكەن تالقىلاۋعا ورتالىق مەملەكەتتىك ورگانداردىڭ باسشىلارى, بۇۇ, بۇۇدب جانە ەۋروپالىق وداق وكىلدەرى قاتىستى.
بۇگىنگى تاڭدا ۇلتتىق ينديكاتورلارعا تەكسەرىس جۇرگىزىلىپ, ولاردىڭ كەيبىرىنىڭ مارتەبەسىن قايتا قاراۋ قاجەتتىگى اتاپ ءوتىلدى. اتاپ ايتقاندا, وزەكتى ينديكاتورلار ساناتىنا بارلىق ۆاكتسينالارمەن يممۋنداۋمەن قامتىلعان ازاماتتاردىڭ ۇلەسى, ايەلدەرگە قاتىستى تۇرمىستىق زورلىق-زومبىلىق فاكتىلەرى, پارنيكتىك گازدار شىعارىندىلارىنىڭ كولەمى بويىنشا, ت.ب. كورسەتكىشتەردى قوسۋ ۇسىنىلادى. بۇل قازاقستاننىڭ تۇراقتى دامۋ ماقساتتارىنا قول جەتكىزۋ جونىندەگى جۇمىسىنىڭ تيىمدىلىگىن ارتتىرۋعا مۇمكىندىك بەرەدى.
سونىمەن قاتار وتىرىستا تدم ينديكاتورلارىن ەلىمىزدىڭ ستراتەگيالىق باعدارلامالارى مەن قۇجاتتارىنا قوسۋ, سونداي-اق ولاردى رەسپۋبليكا وڭىرلەرىندە لوكاليزاتسيالاۋ جانە ەنگىزۋ ماسەلەلەرى تالقىلاندى.
ءا.سمايىلوۆ تۇراقتى دامۋ ماقساتتارىنا قول جەتكىزۋ ۇزدىك حالىقارالىق ستاندارتتاردى ەنگىزۋ ارقىلى حالىقتىڭ ءومىر ءسۇرۋ ساپاسىن ارتتىرۋعا باعىتتالعانىن اتاپ ءوتتى.
«وتكەن جىلدىڭ قىركۇيەك ايىندا مەملەكەت باسشىسى قاسىم-جومارت توقاەۆ تۇراقتى دامۋ ماقساتتارى جونىندەگى بۇۇ سامميتىنە قاتىستى. پرەزيدەنت ءوز سوزىندە تدم-عا قول جەتكىزۋ ءبىز ءۇشىن ۇلتتىق باسىمدىق بولىپ تابىلاتىنىن اتاپ ءوتتى. سول سەبەپتى ءبىز نەعۇرلىم ادىلەتتى جانە ورنىقتى الەمگە ۇمتىلۋ جولىندا مۇشە مەملەكەتتەردىڭ بارلىعىمەن ىنتىماقتاسۋعا ارقاشان دايىنبىز», دەدى پرەمەر-مينيستر.
ۇكىمەت باسشىسى تدم بويىنشا وسىنداي سەسسيا استاناداعى حالىقارالىق ەكونوميكالىق فورۋم اياسىندا دا وتكىزىلگەنىن ەسكە سالدى. سونداي-اق جەكەلەگەن وڭىرلەردە تدم-عا ارنالعان سەمينارلار ءوتتى.
تالقىلاۋ قورىتىندىسى بويىنشا ۇيلەستىرۋ كەڭەسى 2024 جىلعا ارنالعان تدم-نى ىسكە اسىرۋ جونىندەگى شارالار جوسپارىن بەكىتتى. پرەمەر-مينيستر مەملەكەتتىك ورگاندارعا ونىڭ ۋاقتىلى جانە ساپالى ورىندالۋىن قامتاماسىز ەتۋدى تاپسىردى.
«بۇگىن ءبىز ناقتى تاپسىرمالار قويدىق, ولاردى جىل بويى كەزەڭ-كەزەڭمەن ورىنداۋ كەرەك», دەپ تۇيىندەدى ۇكىمەت باسشىسى.
انىقتاما: بىرىككەن ۇلتتار ۇيىمى 2015 جىلى جالپىعا بىردەي كەدەيلىك پەن تەڭسىزدىكتى جويۋ, قورشاعان ورتانى قورعاۋ, عالامشار حالقىنىڭ وركەندەۋىن قامتاماسىز ەتۋ جونىندەگى ءىس-قيمىلدارعا شاقىرۋ ماقساتىندا تۇراقتى دامۋ ماقساتتارىن قابىلدادى. بارلىعى 17 باعىت انىقتالدى, ولاردى ىسكە اسىرۋ ەكونوميكا مەن الەۋمەتتىك ءومىردىڭ نەگىزگى سالالارىنىڭ دامۋىنا ىقپال ەتپەك. بۇۇ جانە قازاقستان رەسپۋبليكاسىنىڭ ۇكىمەتى وكىلدەرى تدم جەتىستىكتەرىنە مونيتورينگ جۇرگىزىپ, تۇراقتى باقىلاۋدا ۇستاپ وتىر.
