ماەسترو الان بورىباەۆتىڭ شۆەيتساريادان باستاپ جاپونياعا دەيىنگى كوپقىرلى شىعارماشىلىق جولى, ونىڭ زور ءبىلىمى مەن مول تاجىريبەسى باس ديريجەرگە ءتۇرلى وپەرالاردى قويۋمەن قاتار بەلسەندى مۋزىكالىق باعدارلاما جاساي وتىرىپ, كلاسسيكالىق ونەردىڭ جاڭا قىرلارىن تابۋعا مۇمكىندىك بەرىپ كەلەدى. «جان-جاقتى روس- سيني» كونتسەرتى دە سول ساناتتان تابىلىپ, ەلورداداعى ايتۋلى مادەني وقيعاعا اينالدى.
جالپى, «استانا وپەرا» تەاترىندا يتاليالىق كەمەڭگەر دجواككينو ءروسسينيدىڭ شىعارماشىلىعى «سەۆيلدىك شاشتاراز», «الجيردەگى يتاليالىق قىز» جانە «جىبەك ساتى» ءتارىزدى ءۇش كومەديالىق وپەرا ارقىلى تانىستىرىلعان. دەسە دە كونتسەرت اياسىندا كورەرمەندەردىڭ كەرەمەت وپەرالىق جانە سيمفونيالىق تۋىندىلارىمەن تانىمال كومپوزيتورعا سالماقتى سۋرەتشى رەتىندە قاراۋعا تاماشا مۇمكىندىك تۋدى.
«جان-جاقتى روسسيني» – بۇل كومپوزيتسيالاردىڭ جيىنتىعى عانا ەمەس, سونىمەن قاتار كلاسسيكتىڭ مۋزىكالىق مۇراسىنا ساياحات ىسپەتتى. وندا سان الۋان بەينەلەر مولىنان كورىنىس تاپقان. ماسەلەن, Stabat Mater شىعارماسىندا كوپشىلىك كۇشتى ەموتسيالار تۋعىزاتىن تەرەڭ رۋحاني رەڭكتەردى تابادى. ال «سەميراميدا» وپەراسىنداعى اريادا باستى كەيىپكەردىڭ عاشىقتىق ۋايىمى شىنايى جەتكىزىلدى. ايتا كەتەيىك, تاعدىردىڭ جازۋىنا قاراماستان, روسسيني ءوز تۋىندىسىندا سەميراميدانى نازىك سەزىمدەرگە بەيىم ءارى ارمانشىل ايەل رەتىندە كورسەتەدى.
قىزىقتى دۋەتتەر, ءتۇرلى سيپاتتاعى اريالار مەن اسەرلى كاۆاتينالاردان تۇراتىن باعدارلامانىڭ ءاربىر بولىگى بىرەگەي. كورەرمەندەر اۋديتورياسى جەڭىل ازىلدەن باستاپ, تراگەدياعا دەيىن روسسيني بەينەلەرىنىڭ سان الۋاندىلىعىن سەزىندى جانە ءاربىر تىڭداۋشى وسى رومانتيزم باستاۋ العان داۋىرگە مۋزىكالىق ساياحاتتا ءوزى ءۇشىن ەرەكشە دۇنيە تاپقانى ءسوزسىز.
كوڭىلگە كوكتەم سىيلاعان كلاسسيكالىق مۋزىكا كەشىندە س.احمەتوۆا, ا.قاپونوۆا, ت.ۆيتسينسكايا, س.مۇراتبەكوۆا, م.يسلاموۆا, گ.الدادوسوۆا, ش.راسىلحان, ە.سايپوۆ, ا.گابديەۆ, ءا.زەينوللا, ا.ءابىلدا, ل.الامانوۆا, س.باقىتجان سىندى تەاتردىڭ بەلدى ارتىستەرى كورەرمەندەرگە ءوز ونەرلەرىن تارتۋ ەتتى.
سوليستەر جارقىن ءارى مازمۇندى ۆوكالدىق ونەر كورسەتۋلەرىمەن كونتسەرتتىڭ ءسانىن كەلتىردى.
الان بورىباەۆتىڭ جەتەكشىلىگىندەگى «استانا وپەرا» سيمفونيالىق وركەسترىنىڭ جانە تەاتر سوليستەرىنىڭ قاتىسۋىمەن كۇلاش بايسەيىتوۆا اتىنداعى كامەرالىق زال ساحناسىندا وتكەن كونتسەرت ۇلى اۋەندەر مەن شەبەر ورىنداۋشىلاردىڭ كاسىبي كەمەلدىگىن پاش ەتكەن ناعىز مۋزىكالىق مەرەكەگە اينالدى.
