بىرىنشىدەن, ۇلتتىق بولمىسىمىزدىڭ جاڭارۋى, ۇلتتىق سانامىزدىڭ جاڭعىرۋى, ەلىمىزدەگى جۇرگىزىلگەن كەيىنگى بەس جىلداعى ساياسي رەفورمالاردىڭ ءمان-ماڭىزى سارالانعان. مۇنىڭ ازاماتتاردىڭ قۇقىقتىق ساناسى مەن ساياسي بەلسەندىلىگىنىڭ ارتۋىنا اسەر ەتكەندىگىنە دە كەڭىرەك توقتالعان. شىن مانىندە وتكەن جىلى ەلىمىزدە جانە سىرتقى ساياسي باعدارىمىزدا كوپتەگەن ەلەۋلى وزگەرىس بولدى. كەزەكتەن تىس وتكەن ءماجىلىس پەن ءماسليحات سايلاۋىنىڭ ەرەكشەلىگى كوپ. بۇل ەلىمىزدەگى سايلاۋ جۇيەسىندەگى وزگەرىستەردىڭ ءىس جۇزىندە جۇزەگە اسقانىن كورسەتتى. ايتالىق, ارالاس سايلاۋ جۇيەسىنىڭ جەمىسىن بۇگىننىڭ وزىندە كورە باستادىق. پرەزيدەنتتىڭ ساياسي رەفورمالارىنىڭ جالعاسى رەتىندە جەرگىلىكتى ءوزىن ءوزى باسقارۋداعى ءماسليحاتتاردىڭ قۇزىرەتى كەڭەيدى. پارتيا فيليالدارى توراعاسىنىڭ اكىمدىكتەن ءبولىنىپ, جەكە-دارا ساياسي ينستيتۋت رەتىندە دامۋى جانە ازاماتتاردىڭ ءوزىن ءوزى ۇسىنۋعا مۇمكىندىك الۋىن دا ۇلكەن ساياسي جاڭالىق رەتىندە قاراستىرۋعا بولادى. سونىمەن بىرگە قاناتقاقتى جوبا رەتىندە قولعا الىنعان اكىمدەردىڭ سايلاۋى ەلدەگى ساياسي رەفورمانىڭ قادام-قاداممەن جۇزەگە اسىرىلا باستاعانىن اڭعارتادى. بۇل ەلدەگى دەموكراتيالىق ۇدەرىستەردىڭ قارقىندى دامۋىنا جول اشتى.
زاڭنامالىق جۇيەدەگى ەلەۋلى وزگەرىس – ەلدىڭ ءاربىر ازاماتىنا تىكەلەي قاتىسى بار قازاقستان بالالارىنا ارنالعان ۇلتتىق قور تۋرالى قۇجاتقا, سونداي-اق شەتەلدەگى اكتيۆتەردى قايتارتۋ تۋرالى زاڭعا قول قويىلدى.
پرەزيدەنت ايتقانداي, سىرتقى ساياساتتا دا ءتيىمدى ءارى ساليقالى ۇستانىم ارقىلى ۇلتتىق مۇددەمىزدى قورعاپ, ستراتەگيالىق ماڭىزدى مىندەتتەردى ورىنداۋعا باعىت ۇستانىپ وتىرمىز. مەملەكەت باسشىسى وتكەن جىلى 20-دان اسا ەلگە رەسمي ساپارمەن باردى, ءبىزدىڭ ەلگە دە سول شاماداعى مەملەكەت باسشىلارىنىڭ ساپارلارى ۇيىمداستىرىلدى. بۇل قازاقستاننىڭ حالىقارالىق الاڭدا وزىندىك ورنى بار ەكەنىن كورسەتە الدى. مەملەكەت باسشىسى وسىنداي حالىقارالىق باسقوسۋلاردا ايماقتىق ساياسي-ەكونوميكالىق, قاۋىپسىزدىكتەن بولەك, عالامدىق ماسەلەلەردى شەشۋدە دە ءوز ۇلەسىن قوسىپ كەلەدى.
سونداي-اق سۇحباتتا ەلدىڭ بيىلعى دامۋ جوسپارىنا دا باستى نازار اۋدارىپ وتىر. ۇلتتىق قۇرىلتايدى كوكتەمدە وتكىزۋ تۋرالى ايتتى. ەلدىڭ قوعامدىق-ساياسي, الەۋمەتتىك-ەكونوميكالىق باعدارلارىن قۇرىلتايدىڭ قابىرعاسىندا ەرتە باستان سارالاۋ تۋرالى وي تاستادى. ياعني كۇزدە پرەزيدەنت جولداۋىمەن شىققان بولسا, ۇلتتىق قۇرىلتاي ارقىلى ەلدىڭ دامۋ باعىتىن تاعى دا ءبىر شەگەلەپ الۋعا نيەتتى ەكەنىن تانىتىپ وتىر.
قاڭتار وقيعاسىنىڭ سەبەپ-سالدارىنان دا ساباق الۋىمىز كەرەك. بۇل ءۇشىن, پرەزيدەنت ايتقانداي, زاڭ مەن ءتارتىپ ۇستەمدىگىن ورناتۋ – دەموكراتيالىق قازاقستاننىڭ باستى قاعيداتى بولۋى قاجەت. وسى تۇرعىدان العاندا قازىردىڭ وزىندە جاڭا زاڭدار قابىلدانىپ جاتىر. ەلدەگى ازاماتتاردىڭ ساياسي ومىرگە كەڭىرەك قاتىسۋىنا مۇمكىندىك بەرۋ كەرەك. ۇكىمەتكە جاۋاپكەرشىلىك جۇكتەپ, ايماقتارداعى احۋالدى رەتتەۋگە زور مۇمكىندىك تۋعىزۋعا بولادى. قوعامداعى تۇيتكىلدى ماسەلەلەر توڭىرەگىندە تاراتىپ ايتقان پرەزيدەنت اەس سالۋ حالىقتىڭ شەشىمىمەن جۇزەگە اسۋ قاجەت ەكەنىنە دە توقتالدى. ال تۇرمىستىق زورلىق-زومبىلىق تۋرالى زاڭ قارالىپ جاتقانىن جەتكىزگەن مەملەكەت باسشىسى, بۇل تاقىرىپ قوعامنىڭ نازارىندا عانا بولماي, قوعام سوگەتىن, قابىلدامايتىن نورماعا اينالۋ قاجەتتىگىن ايتتى. جالپى, بۇل ماڭىزدى سۇحبات بىزگە بولاشاقتىڭ باعدارىن انىقتاپ, ەلدىك ماسەلەدە تىزە قوسىپ قارەكەت قىلاتىن ۋاقىتتىڭ جەتكەنىن كورسەتىپ بەردى.
قازبەك مايگەلدينوۆ,
ۇلتتىق قۇرىلتاي مۇشەسى
