كوپتەن بەرى شالعايداعى شاعىن اۋىلدىڭ ءتۇتىنى ءتۇزۋ ۇشىپ, گۇلدەنە تۇسۋىنە كۇش سالىپ كەلە جاتقان «سىما-ك» شارۋا قوجالىعى اتالعان مەديتسينالىق پۋنكتتى 22 ملن تەڭگەگە تۇرعىزىپتى. زامان تالابىنا ساي بارىنشا جابدىقتالعان ەڭسەلى ەمدەۋ مەكەمەسى بوي كوتەرگەن سوڭ, قيانداعى كولقامىستى الىسسىنباي جاس دارىگەر دە كەلىپ جۇمىسىنا كىرىسىپ كەتكەن. جاس ماماننىڭ باسپاناسىن, باسقا دا تۇرمىستىق جاعدايىن جەرگىلىكتى شارۋا قوجالىعى جاساپ بەرىپ جاتىر.
مەديتسينالىق پۋنكتتە فەلدشەر كابينەتى, ەمدەۋ جانە ەگۋ كابينەتتەرى, جەكە شارۋاشىلىق بولمەسى بار. كابينەتتىڭ ءبارى جاڭا جيھازدارمەن, قاجەتتى مەديتسينالىق قۇرىلعىلارمەن جابدىقتالعان. مەدپۋنكتتىڭ جانىندا جەدەل جاردەم كولىگىن قوياتىن جىلى تۇراعى دا بار.
اۋىل تۇرعىندارىن قۇتتىقتاي كەلگەن بيلىك وكىلدەرى كوپشىلىككە وزدەرىنىڭ جۇرەكجاردى تىلەكتەرىن ارناپ, اتالعان شارۋا قوجالىعىنىڭ باسشىسى مانات كاربوزوۆقا العىس ايتتى.
«مەملەكەت باسشىسى قاسىم-جومارت توقاەۆ حالىققا جولداۋىندا مەديتسينالىق ينفراقۇرىلىمدى جاقسارتۋدىڭ ماڭىزدى ەكەنىن اتاپ وتكەنىن بىلەسىزدەر. بۇگىن ءبارىمىز پرەزيدەنت تاپسىرماسىنىڭ شالعاي اۋىلداردا دا ىسكە اسىرىلىپ جاتقانىنا كۋا بولىپ وتىرمىز. ەل ءۇشىن ماڭىزى زور مۇنداي يگى ءىستى ىلگەرىلەتۋگە مەملەكەتتىك ورگاندار عانا ەمەس, سونىمەن قاتار الەۋمەتتىك جاۋاپكەرشىلىكتىڭ نە ەكەنىن جەتە تۇسىنگەن جەكە كاسىپكەرلەر دە بىلەك سىبانا اتسالىسىپ جاتقانى كوڭىل قۋانتادى. كولقامىس قانا ەمەس, وسى توڭىرەكتەگى وزگە دە اۋىل, اۋىلدىق وكرۋگتەردەگى شارۋا قوجالىقتارى وسىنداي يگى ىستەردى قولعا السا, نۇر ۇستىنە نۇر بولار ەدى», دەدى اۋدان اكىمى شوتا وسپانوۆ.
سالتاناتتى ءراسىمنىڭ سوڭىندا قيانداعى كولقامىستى توقسانىنشى جىلداردىڭ داۋىلىنان امان الىپ قالىپ, اۋىل مەكتەبىنىڭ جابىلىپ قالماۋىنا, جۇرتتىڭ جىلى ورنىن تاستاپ قالاعا قاراي ۇدەرە كوشىپ كەتپەۋىنە جاعداي جاساعان ءوڭىردىڭ قۇرمەتتى اقساقالى, ەڭبەك ارداگەرى كاكىمجان كاربوزوۆ قاريا كوپشىلىككە اق باتاسىن بەرىپ, وزگە دە ەلەۋلى ازاماتتارمەن بىرگە مەديتسينالىق پۋنكتىڭ لەنتاسىن قيدى.
اۋدان اكىمى «سىما-ك» شارۋا قوجالىعىنىڭ باسشىسى مانات كاكىمجان ۇلىنا جانە قۇرىلىس جۇمىستارىنا اتسالىسىپ, ەل يگىلىگى ءۇشىن ەڭبەك ەتىپ جۇرگەن بىرقاتار ازاماتقا العىسحات پەن باعالى سىيلىق تاپسىردى.
قوستاناي وبلىسى
