ماگيسترالنىي بۇرىن تەمىرجول مەكەمەسىنە قاراعان, توماعا-تۇيىق اۋىل بولاتىن. اقسۋات اۋىلدىق وكرۋگىنىڭ قۇرامىنا كىرىپ, ەلدى مەكەننىڭ ەكىنشى تىنىسى اشىلعانداي بولدى. تۇرعىندار كوپتەن كۇتكەن كىرمە جولدىڭ كۇردەلى جوندەۋى اياقتالدى. «پەترورەف» كومپانياسى «جاڭعىرۋ» باعدارلاماسى اياسىندا زاماناۋي بالالار ويىن الاڭىن تارتۋ ەتتى. ەندى, مىنە, 108 ورىندىق سۋ جاڭا مەكتەپ عيماراتى پايدالانۋعا بەرىلىپ, ماگيسترالنىي اۋىلىندا تۇراتىن 164 شاڭىراق, ءارتۇرلى ۇلتتان قۇرالعان 562 تۇرعىن شەكسىز قۋانىشقا بولەندى. وقۋشىلار 1986 جىلى سالىنعان كونە مەكتەپتى تاستاپ, كەڭ دە جاڭا عيماراتقا كوشتى.
– 2023 جىلى باتىس قازاقستان وبلىسىندا 27 مەكتەپتىڭ قۇرىلىسى باستالعان ەدى. سونىڭ 17-ءسىنىڭ قۇرىلىسى جىل سوڭىنا دەيىن اياقتالىپ, وقۋشىلار مەن ۇستازدارعا ەسىكتەرىن ايقارا اشتى. مۇنداي كورسەتكىش تاۋەلسىزدىك جىلدارى بولماعان. سونىمەن قاتار بىلتىرعى تامىزدان بەرى قازتالوۆ اۋدانىنىڭ جۇلدىز اۋىلىنداعى جانە اۋدان ورتالىعىنداعى الما ورازباەۆا اتىنداعى, بايتەرەك اۋدانىنىڭ جالىن جانە جايىق مەكتەپتەرى پايدالانۋعا بەرىلدى. بۇعان قوسا اقجايىق اۋدانىنىڭ اتامەكەن جانە جايىق اۋىلدارىندا, قاراتوبە اۋدانىنىڭ شالعىن, سونالى, حانكول اۋىلدارىندا, بايتەرەك اۋدانىنىڭ سادوۆىي جانە وركەن اۋىلىندا, جانىبەك اۋدانىنىڭ اقوبا اۋىلىندا جاڭا مەكتەپ عيماراتى تاپسىرىلدى. وسىنىڭ ءبارى – مەملەكەت باسشىسىنىڭ تاپسىرماسىمەن جاس ۇرپاققا جاسالىپ جاتقان مەملەكەت قامقورلىعى, – دەدى باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ تەرەكتى اۋدانىندا سالىنعان ءتورتىنشى جاڭا مەكتەپتىڭ اشىلۋ سالتاناتىندا.
«قاراشىعاناق پەترولەۋم وپەرەيتينگ ب.ۆ.» كومپانياسىنىڭ تاپسىرىسىمەن 871,2 ملن تەڭگەگە سالىنعان ءبىلىم ورداسى ەكى تىلدە ءبىلىم بەرەدى. جاڭا عيمارات ارنايى ءپان كابينەتتەرىمەن, ينتەراكتيۆتى تاقتا, كومپيۋتەر سەكىلدى قاجەتتى قۇرالدارمەن تولىق جابدىقتالعان. مۇندا ۇلدار مەن قىزدارعا ارنالعان شەبەرحانالار, سپورت زالى, اكت زالى, ساباق وتەتىن 20 كابينەت بار.
مەكتەپتىڭ اشىلۋ سالتاناتىنا شاعىن اۋىل حالقى تولىق جينالدى. سالتاناتتى جيىندا مەردىگەر «كا-ستروي لتد» قۇرىلىس كومپانياسىنىڭ وبلىس بويىنشا باس ديرەكتورى مۇحيت بايدۋللاەۆ مەكتەپ ديرەكتورى ايمانگۇل جاراسوۆاعا سيمۆوليكالىق كىلتتى تابىس ەتتى. اۋىل تۇرعىندارى قۋانىشتان شاشۋ شاشىپ, ءبىلىم سالاسىنىڭ ارداگەرى ورىنشا قاليەۆا مەكتەپ ۇجىمىنا اق تىلەگىن ايتتى.
– جاڭا عيمارات اۋىل تۇرعىندارىنا, اتا-انالارعا, وقۋشىلارعا, مەكتەپ ۇجىمىنا وتە ۇنادى. ەندى بۇل جەردە 114 بالا ەكى اۋىسىمدا وقيتىن بولادى. ۇجىمداعى 48 ۇستاز شاكىرتتەرىمىزگە جاقسى ءبىلىم بەرۋگە بارىمىزدى سالامىز. مەكتەپتىڭ بۇكىل جابدىعى تولىق. مەكتەپ جانىنداعى اسحانا 64 بالاعا ىستىق تاماق دايىندايدى, – دەيدى مەكتەپ ديرەكتورى ايمانگۇل جاراسوۆا.
وبلىس ورتالىعىنا جاقىن ورنالاسقان تەرەكتى اۋدانىنىڭ ەلدى مەكەندەرى – بولاشاعى زور, شارۋاعا جايلى قونىس. حح عاسىردىڭ باسىنداعى قاراشەكپەندەر كوشى مەن 1950 جىلدارداعى تىڭ كوتەرۋ كەزىندە بارىنشا ورىستانعان ەلدىمەكەندەر بۇگىندە قايتادان ۇلتتىق سيپاتىن تاۋىپ جاتىر. جاقىندا اقسۋات اۋىلدىق وكرۋگىنە قاراستى پويما اۋىلىندا سالىنعان جاڭا مەكتەپكە الاش قوزعالىسىنىڭ قايراتكەرى, جوعارى ءبىلىمدى العاشقى قازاق دارىگەرلەرىنىڭ ءبىرى نۇرعالي يپماعامبەتوۆ پەن ورال قالاسىندا گۋبەرنيالىق «قىزىل تۋ» گازەتىن العاش قۇراپ, اياعىنان تۇرعىزعان تۇلعالاردىڭ ءبىرى باتىربەك ءالجانوۆتىڭ ەسىمى ۇسىنىلعان ەدى. اۋىل اكىمى جاننۇر احمەتوۆتىڭ ايتۋىنشا, ماگيسترالنىي اۋىلىندا اشىلعان جاڭا مەكتەپكە مەملەكەت جانە قوعام قايراتكەرى ءابدىراحمان ايتيەۆ پەن ساقىپكەرەي ارعىنشيەۆتىڭ ەسىمدەرى ۇسىنىلىپتى. بۇل اتالعان تۇلعالاردىڭ ءبارى دە وسى وڭىردە, وسى توپىراقتا تۋىپ-وسكەن.
باتىس قازاقستان وبلىسى
