اشىلۋ سالتاناتىندا ءسوز العان تۇركيانىڭ قازاقستانداعى توتەنشە جانە وكىلەتتى ەلشىسى مۇستافا كاپۋدجۋ سۋرەتشى شىعارماشىلىعىنا جوعارى باعا بەردى. ونىڭ ايتۋىنشا, كورمەگە قويىلعان كوركەم تۋىندىلاردا وسمانلى, ۆيزانتيا, انادولى وركەنيەتتەرى كورىنىس تاپقان.
تۇرىك سۋرەتشىسى وسى ۋاقىتقا دەيىن 200-دەن اسا جەكە جانە توپتىق كورمەلەرگە قاتىسقان ەكەن. ونىڭ قىلقالامىنان شىققان جۇمىستار ەۋروپا, اقش, كانادا, مەكسيكا, اراب تۇبەگى ەلدەرى, رەسەي, مولدوۆا, ۋكراينا, تۇركىتىلدەس ازيا مەملەكەتتەرى, قىتاي, تايۆان, كورەيا جانە جاپونيا سەكىلدى كوپتەگەن ەلدە كورسەتىلىپ كەلەدى. «قازاقستاندا كورمە اشقانىما قۋانىشتىمىن. بۇگىنگى كورمەگە 40 سۋرەتىمدى اكەلدىم. مۇندا مادەنيەتتەرىمىزدىڭ ۇقساس جاقتارىن كورسەتۋگە تىرىستىم. تۋىندىلارىمدا قولدانىلعان ناقىشتاردا احمەت ياساۋيدەن قورقىت اتاعا دەيىن كوپتەگەن ءىزدى كورۋگە بولادى», دەيدى سۋرەتشى. سونداي-اق ونەر يەسى تۋىندىلارى كەشەگى 16 مەملەكەتتىڭ نەگىزىن قالاپ, كۇلدەي جانىپ, قايتا تۇلەگەن تۇركىلەردىڭ تاريحىنا نەگىزدەلگەنىن جەتكىزدى. ونىڭ ىشىندە كورمە تاقىرىبىنا انار جەمىسىن تاڭداپ الۋىندا دا ۇلكەن ءمان جاتىر. سەبەبى انار – تۇركى حالىقتارى ءۇشىن مولشىلىق پەن بەرەكەتتىڭ باستاۋى. ء«وزىمدى ەرەكشە سۋرەتشى دەپ قابىلدامايمىن. مەندەگى ايىرماشىلىق سول, تۋىپ-وسكەن جەرىمنىڭ داستۇرلەرىن نەگىزگە الىپ سۋرەت سالامىن. سول ءداستۇرلى سۋرەتتى زامانعا ساي ەتىپ مودەرنيزاتسيالاۋعا كوڭىل بولەمىن. كورمەگە قويىلعان كارتينالارىم وتكەن تاريحتىڭ ءىزىن تانۋ جولىنداعى وسى ۇدەرىستىڭ كۋاسى بولۋعا شاقىرادى. جادى ۇعىمى تۇرعىسىنان بۇل كورمەنى اتا-بابامىزدىڭ مەكەنى – قازاقستاندا وتكىزۋ جوباما وزىندىك ءارى ەرەكشە كوزقاراس بەرەدى دەپ سەنەمىن», دەيدى تۇرىك سۋرەتشىسى.
