دانا – اعا ازىرلەۋشى. كۇردەلى تەحنيكالىق ماسەلەلەردى شەشىپ, جوبالاردىڭ جالپى ارحيتەكتۋراسىن بەلگىلەيدى. سوسىن كىشى ينجەنەرلەرگە ارنالعان قوسالقى مىندەتتەردى بولەدى. ونىڭ جۇمىسىنا بۇكىل Google ىزدەۋ يندەكسى تۋرالى اقپاراتتى تالداۋ جانە «كەڭەيتىلگەن سۇراۋعا» سەنىمدى ءارى مازمۇندى جاۋاپ بەرۋ, سونىڭ ىشىندە ەڭ پايدالى ونلاين رەسۋرستار مەن ماقالالارعا سىلتەمەلەر بەرۋ كىرەدى.
– ەكى جىل بولدى ۆەب-مازمۇندى سەمانتيكالىق تالداۋمەن اينالىساتىن توپتىڭ جەتەكشى ينجەنەرى جانە تەحنيكالىق كوشباسشىسىمىن. ءبىز Chat GPT سياقتى گەنەراتيۆتى جاساندى ينتەللەكتىڭ جاڭا جەتىستىكتەرى مەن ىزدەۋ جۇيەسىنىڭ مۇمكىندىكتەرىن قايتا قاراستىرامىز. ويتكەنى بۇل تەحنولوگيا تاريحىنداعى ماڭىزدى كەزەڭ. ونىڭ كومەگىمەن پايدالانۋشىلارعا ىزدەۋ بارىسىندا سۇراقتاردىڭ مۇلدەم جاڭا, كۇردەلى جانە كەڭەيتىلگەن تۇرلەرىن قويۋعا, بارىنشا پايدالى جاۋاپتار الۋعا مۇمكىندىك جاساۋعا تىرىسامىز. ىزدەۋدىڭ جاڭا ءداۋىرى كەلدى, – دەيدى دانا.
ول رەسپۋبليكالىق فيزيكا-ماتەماتيكا مەكتەبىن «التىن بەلگىمەن» بىتىرگەن سوڭ تەحنيكالىق سالادا وقۋىن جالعاستىراتىنىن بىردەن تۇسىنگەن. اقپاراتتىق تەحنولوگيالار مەن ينفورماتيكا باعىتىندا شەتەلدىڭ ۇزدىك وقۋ ورىندارىنا تۇسكىسى كەلگەن. ءبىر جىلدان استام ۋاقىتىن ىزدەنىس پەن بىلىمگە جۇمساپ, ماسساچۋسەتس تەحنولوگيالىق ينستيتۋتىنا وقۋعا تۇسەدى. وقۋ بارىسىندا ىرگەلى ءبىلىم الۋعا باسا نازار اۋداردى.
– مەن ءموبيلدى نەمەسە ۆەب-قوسىمشالاردى قۇرۋدى عانا ەمەس, كۇردەلى الگوريتمدەردى شەشۋدى ۇيرەنگىم كەلدى. ساقتالعان اقپاراتتاعى ترەندتەر مەن زاڭدىلىقتاردى انىقتاۋ ءۇشىن مالىمەتتەر بازاسىندا ماشينالىق وقىتۋدى قولدانۋدى ۇيرەندىم. عىلىمي جەتەكشىم پروفەسسور مايكل ستوۋنبرەيكەردىڭ قامقورلىعىمەن جاساعان ديپلومدىق جۇمىسىم وسى سالاعا ارنالدى, – دەدى ول.
وقۋىن اياقتاعاننان كەيىن كرەمني القابىنىڭ تەحنولوگيالىق الپاۋىتتارى اراسىندا دانانىڭ مانسابى باستالدى. ايتا كەتەتىنى, امەريكالىق جوعارى وقۋ ورىندارى تۇلەكتەرىنە جۇمىس ىزدەۋگە جۇيەلى تۇردە كومەكتەسەدى. بۇل ۇدەرىس الدەقاشان ءبىر ىزگە تۇسكەن. مىسالى, ماسساچۋسەتس تەحنولوگيالىق ينستيتۋتى جىل سايىن الەمدەگى ەڭ جاقسى كومپانيالاردىڭ جۇمىس بەرۋشىلەرى كەلەتىن اۋقىمدى جۇمىس جارمەڭكەسىن وتكىزەدى. سوڭعى كۋرس ستۋدەنتتەرى تۇيىندەمە بەرەدى, ەگەر ولار كومپانياعا ۇناعان بولسا, الدىمەن تەلەفون ارقىلى سۇحباتتاسىپ, كەيىن كومپانيانىڭ كەڭسەسىنە كەڭەيتىلگەن سۇحباتقا شاقىرىلادى.
– ەكى اي بويى ءارتۇرلى كومپانيا سۇحباتقا شاقىردى. سولاي Amazon, Microsoft, Google, Apple, Square سياقتى بىرنەشە كومپانيادان جۇمىسقا شاقىرتۋ الدىم. تاڭداۋىم Google بولدى. سەبەبى كورپوراتيۆتى مادەنيەتى, دامىعان تالىمگەرلىك جۇيەسى جانە ۇلكەن كولەمدەگى تەحنيكالىق مىندەتتەرى ۇنادى. بۇل – ينفورماتيكا سالاسىنداعى الدىڭعى قاتارداعى كومپانيا. ىزدەنىس پەن تاباندىلىقتى تۋ قىلىپ ۇستاۋ كەرەك. سوندا قازاق جاستارى الەمدى باعىندىرا الادى, – دەيدى دانا.
