ۋنيۆەرسيتەت بازاسىندا ەلىمىزدىڭ قۇرىلىس, جول قۇرىلىسى سەكتورىندا اككرەديتتەلگەن قىزمەتتەردىڭ تولىق تسيكلىن قامتاماسىز ەتەتىن قازاقستانداعى العاشقى قۇرىلىس-تەحنيكالىق ينجەنەرلىك ورتالىق قۇرىلدى. وندا سۋپەر اسفالتقا ارنالعان ەكولوگيالىق ءتيىمدى تەحنولوگيالار ازىرلەنەدى. ۋنيۆەرسيتەت عالىمدارى وتاندىق ستاندارتتاردى ازىرلەۋ كەزىندە جەرگىلىكتى وندىرۋشىلەردىڭ ماتەريالدارىن قولدانادى. بۇگىندە اسفالتقا ارنالعان ارنايى قوسپالار دايىندالدى. عالىمدار يننوۆاتسيالىق اسفالتبەتوندى وندىرىسكە ەنگىزۋدىڭ الدىندا ونىڭ ۇلگىلەرىن زاماناۋي جابدىقتا سىناقتان وتكىزەدى. سىناق بارىسىندا كولىكتەردىڭ ۇزاقمەرزىمدى ءجۇرۋ يمميتاتسياسى جاسالادى, ءارتۇرلى جۇكتەمەلەر كەزىندە سوراپتىڭ پايدا بولۋى, جاڭبىر مەن قار ءتارىزدى كليماتتىق جاعدايلارعا توزىمدىلىگى تەكسەرىلەدى.
– Superpave تەحنولوگياسىنىڭ ارتىقشىلىعى – ەلىمىزدىڭ كليماتتىق جاعدايلارىن جانە باسقا دا ەرەكشەلىكتەرىن ەسكەرەدى. بيتۋم قوسپاسى وبلىستىڭ ەرەكشەلىكتەرىنە سايكەس جاسالادى. بىرەگەي اسپاپتاردىڭ كومەگىمەن اسفالتتىڭ ەسكىرۋ ءۇردىسى يميتاتسيالاناتىن سىناقتار جۇرگىزىلەدى. ۋنيۆەرسيتەت زەرتحاناسىندا ءساتتى جۇزەگە اسىرىلىپ جاتقان Superpave تەحنولوگياسىنىڭ تاعى ءبىر ماڭىزدى ەرەكشەلىگى – زەرتحانادا ناقتى جول ۋچاسكەسىنە تولىعىمەن سايكەس كەلەتىن ۇلگىنى جاساۋ. ەگەر ۇلگىنى زەرتحانادا سىناۋ كەزىندە نورمالارعا سايكەس ناتيجەلەردى كورسەتسە, ءدال وسىنداي ناتيجەلەر جولدى ناقتى پايدالانۋ كەزىندە دە قول جەتكىزىلەدى. ءبزدىڭ جوبا يننوۆاتسيالىق جول جانە قۇرىلىس ماتەريالدارىن ازىرلەۋدە جاسىل تەحنولوگيالاردى پايدالانۋ ارقىلى تۇراقتى دامۋعا جول اشادى, – دەدى عىلىمي جوبا جەتەكشىسى, ۋنيۆەرسيتەتتىڭ يننوۆاتسيالاردى دامىتۋ دەپارتامەنتىنىڭ ديرەكتورى اسەل جەكسەمباەۆا.
بۇگىندە ۋنيۆەرسيتەتتىڭ عىلىمي زەرتحانالارىندا ەۋروپا مەن ازيا عالىمدارى بىرلەسە زەرتتەۋلەر جۇرگىزىپ جاتىر. كوللابوراتسيانىڭ ناتيجەسى بۇل ەلدەردە سۋپەر اسفالت تەحنولوگياسىن ەنگىزۋدىڭ ءساتتى تاجىريبەسىنە جول اشۋى ىقتيمال. بۇل رەتتە وتاندىق زەرتتەۋشىلەر شەتەلدىك ستاندارتتاردى ەلىمىزدىڭ بارلىق ايماعىنىڭ كليماتتىق ەرەكشەلىكتەرىنە بارىنشا بەيىمدەۋگە باسا نازار اۋدارادى.
