سۋرەتتى تۇسىرگەن – تىلەۋبەك شاياحمەت
اياز اتا سالتاناتتى راسىمگە وزىمەن بىرگە كۇنى-ءتۇنى سارايىن ءارتۇرلى دۇشپان مەن جاۋىزدان قىراعىلىقپەن قورعايتىن قازاق حالىق ەرتەگىلەرىندەگى تۇراقتى سەرىكتەس باتىرلارىن ەرتە كەلىپتى. اياز اتانى تۋعان كۇنىمەن قۇتتىقتاۋعا ءار ەلدەن ەرتەگى كەيىپكەرلەرى كەلگەن ەكەن.
مەرەكەگە جينالعان بالالار اياز اتا مەن اقشاقاردى, سانتا كلاۋس پەن لاپلانديادان كەلگەن ەلفتەردى, ايداھارلارىمەن كەلگەن قىتايلىق اياز اتا شان دان لاوجەندى قول سوعىپ قارسى الدى. سودان كەيىن اياز اتانىڭ قالالىق رەزيدەنتسياسىنىڭ سالتاناتتى اشىلۋى ءوتتى. ۇيىمداستىرۋشىلاردىڭ ايتۋىنشا, ونىڭ تۋعان ءۇيى كاتونقاراعاي اۋدانىنداعى كوروبيحا اۋىلىندا ورنالاسقان. ال مۇندا وبلىس ورتالىعىنداعى اياز اتا رەزيدەنتسياسى ەتنوپاركتە ورنالاسادى.
رەزيدەنتسيانىڭ ىشىندە شاي, ءتاتتى-دامدىلەر ساتاتىن ساۋدا نۇكتەلەرى, پوشتا جانە اياز اتانىڭ جۇمىس ورنى, ەكىنشى قاباتىندا ونىڭ جاتىن ورنى ورنالاسقان. سودان كەيىن اياز اتا كوپشىلىك قوناقتارىمەن بىرگە رەسپۋبليكا الاڭىنا بەت الدى. مۇندا اياز اتالار مەن اقشاقارلاردىڭ شەرۋى بولىپ, ولار باستى الاڭدا ساپپەن ءجۇرىپ ءوتتى.
اياز اتا مەن بالالار شىعىس قازاقستان وبلىسىنىڭ باس شىرشاسىن جاعۋ ءراسىمىن وتكىزىپ, جاڭا جىلدىق شىرشانى اينالا قول ۇستاسىپ ءان شىرقاپ, بي بيلەدى. مەرەكەلىك كەش وبلىستىڭ ءتۇرلى ۇجىم ارتىستەرىنىڭ ورىنداۋىنداعى مۋزىكامەن, اندەرمەن جانە بي ونەرلەرىمەن جالعاستى.
وسكەمەن
