فوتو: gov.kz
«ەگەر جۇك كولىگى يەلەرى زاڭناما تالاپتارىن ساقتاسا, دۇرىس بولار ەدى. الايدا, تالاپتار ءجيى بۇزىلىپ تۇرادى. ناتيجەسىندە بيۋدجەتكە وراسان زيان كەلتىرەدى. مىسالى, باتىس قازاقستان وبلىسىندا جولدىڭ قۇرىلىسىنا كىرىستىرىلگەن اۋىر جۇك كولىكتەرى جاڭا جولداردى قالاي بۇزعانىن كورىپ وتىرمىز», دەدى كولىك سالاسىنا جاۋاپتى مينيستر.
قوردالانعان ماسەلەنى شەشۋ ءۇشىن مينيسترلىك 2024 جىلى قالالاردىڭ كىرىس جانە شىعىس بولىكتەرىنە بەينەكامەرالار ورناتۋدى باستاماق. ولار اۆتوماتتى تۇردە ارتىق سالماق ءۇشىن ايىپپۇل سالادى. سونىمەن بىرگە 220 كامەرانى «سەرگەك» بەينەباقىلاۋ جۇيەسىمەن بىرىكتىرۋ جوسپارعا الىنعان.
سونداي-اق بولىنبەيتىن ءىرى كولەمدى جۇكتەردى تاسىمالداۋعا رەسمي ارنايى رۇقساتتار بەرۋ جانە ساموسۆالداردىڭ جولدارمەن قوزعالىسىن شەكتەۋ تەتىكتەرى پىسىقتالىپ جاتىر.
«الەمنىڭ كەز كەلگەن جەرىندە كارەرلىك اۋىر جۇك كولىكتەرىنىڭ جالپىعا ورتاق پايدالانىلاتىن اۆتوجولدارمەن جۇرۋىنە تىيىم سالىنادى. قازاقستان, بالكىم, مۇندايعا جول بەرگەن جالعىز ەل. ءبىز اتالعان شەكتەۋلەردى 2023 جىلدان باستاپ ىسكە قوسقىمىز كەلدى. دەي تۇرعانمەن, نارىق قاتىسۋشىلارى از دا بولسا ۋاقىت بەرۋدى سۇراعان بولاتىن. سوندىقتان اۋىر كارەرلىك جۇك كولىكتەرىنە 2025 جىلدىڭ اياعى مەن 2026 جىلدىڭ باسىندا قازاقستاننىڭ جالپىعا ورتاق پايدالانىلاتىن اۆتوجولدارىمەن جۇرۋىنە تىيىم سالىنادى», دەپ اتاپ ءوتتى مارات قاراباەۆ.
سونىمەن قاتار ەگەر مينيسترلىكتىڭ ۇسىنىسى ۇكىمەت پەن پارلامەنتتە قولداۋ تاپسا, تاسىمالداۋشىلار تولەۋگە ءتيىستى ارنايى رۇقساتى بولعان كەزدە بەلگىلى ءبىر شەگىنە دەيىن ارتىق جۇكتەردى تاسىمالداۋعا مۇمكىندىك بەرەتىن نورما ەنگىزىلەدى. اتالعان شەشىم جەرگىلىكتى جەرلەردە ورىن الۋى مۇمكىن سىبايلاس جەمقورلىق تاۋەكەلدەرىن جويۋدى كوزدەيدى.
