وسىنداي ارمان جەتەگىندەگى اۋىلدىڭ قارا بالاسى قاراعاندى مەملەكەتتىك مەديتسينا ينستيتۋتىنا ءتۇسىپ, اتالعان وقۋ ورنىن دارىگەرلىك ماماندىعى بويىنشا ءبىتىرىپ شىعادى. قولىندا ديپلومى بار, تولىسقان مامان رەتىندە سايلاۋ ءسابيت ۇلى تۋعان جەرىنە كەلىپ, ەڭبەك جولىن باستايدى. سول كەزەڭدە ەل اراسىندا جوعارى وقۋ ورنىن ءبىتىرىپ كەلگەن كاسىبي مامانداردىڭ قات ۋاقىتى. ول 1963 جىلدان بايقوڭىر كەڭشارىندا دارىگەرلىك قىزمەتكە كىرىسەدى.
ادامنىڭ جەكە تۇلعا رەتىندە قالىپتاسۋى, ەڭ الدىمەن, ونىڭ ومىردەن ءوز ورنىن سانالى تۇردە تابا بىلۋىنە بايلانىستى. اركىمنىڭ ومىرگە دەگەن كوزقاراسى دا ماماندىعىنا قاراي قالىپتاسادى. وسىلايشا, ماماندىعىنا ادال سايلاۋ ءسابيت ۇلى ەلگە قالتقىسىز قىزمەت ەتتى, ونەگەلى ءومىر ءسۇردى. ول 1964 جىلدىڭ قازانىنان باستاپ قۇلجانباي اۋىلىنا قىزمەتكە اۋىسىپ, ساتباەۆ كەڭشارىندا 2004 جىلدىڭ سوڭىنا دەيىن, ياعني قىرىق جىلداي تاپجىلماي ەڭبەك ەتتى. ۇلاعاتتى ەڭبەك جولىندا التىن قولدى دارىگەردىڭ حالقىنا مول شاپاعاتى ءتيدى. اۋىلدان قاشىقتا ورنالاسقان مالشىلاردىڭ قىستاعىنا اتپەن قاتىناپ, ءار ادامنىڭ دەنساۋلىعىنا باقىلاۋ جاساپ, كومەك بەرىپ, ەمدەپ وتىردى. اۋىل مالشىلارىنىڭ جۇكتى ايەلدەرىنىڭ ومىرگە دەنى ساۋ ءسابي اكەلۋىنە كومەكتەسىپ, قۋانىشىنا ورتاقتاسا ءبىلدى.
قىرىق جىلدىق قاجىرلى ەڭبەك سول كەزدەگى بيلىك تاراپىنان دا باعالاندى. سايلاۋ ءسابيت ۇلىنىڭ قىزمەتى مەملەكەتتىك دارەجەدە باعالانىپ ءارتۇرلى گراموتالار مەن مەدالدارمەن ماراپاتتالدى.
سايلاۋ ءسابيت ۇلىنىڭ العان مەملەكەتتىك ماراپاتتارىنىڭ ىشىندەگى شوقتىعى بيىگى – 1976 جىلى 23 شىلدەدە قازاقستان جوعارعى كەڭەسى تورالقاسىنىڭ قاۋلىسىمەن بەرىلگەن «قازاق كسر-ءنىڭ ەڭبەك سىڭىرگەن دارىگەرى» قۇرمەتتى اتاعى. مۇنداي اتاقتى جەزقازعان وبلىسىندا تۇڭعىش العان – وسى كىسى.
جەمىستى ەڭبەك ەتۋ مەن تابىسقا كەنەلۋ وتباسىداعى بەرەكەمەن دە ۇشتاساتىنى انىق. ساكەڭنىڭ قۇداي قوسقان قوساعى بوتاي ءابىلدينا – بايقوڭىر ءوڭىرىنىڭ تۋماسى. ول ورتا مەكتەپتى اياقتاعان سوڭ 1960 جىلدان 1961 جىلدار اراسىندا قىزىل ءۇي بولىمشەسىندە كىتاپحانا مەڭگەرۋشىسى بولىپ جۇمىس ىستەدى. 1961 جىلى جەزقازعان قالاسىنداعى مەديتسينالىق ۋچيليششەسىنە فەلدشەرلىك ماماندىعىنا وقۋعا ءتۇسىپ, اتالعان وقۋ ورنىن 1964 جىلى ويداعىداي ءبىتىرىپ شىقتى. سول جىلى قاراقۇم ورتالىق اۋرۋحاناسىنا جۇمىسقا قابىلدانىپ, 2004 جىلى زەينەتكەرلىككە شىققانشا ەڭبەك ەتتى.
اپامىز دا قاجىرلى ەڭبەگىنىڭ جەمىسىن كورىپ, ەلدىڭ العىسىنا بولەندى, كوپتەگەن مەملەكەتتىك ماراپاتتاردىڭ يەسى اتاندى. ول «قۇرمەت بەلگىسى» وردەنىمەن, «دەنساۋلىق ساقتاۋ ۇزدىگى» توسبەلگىسىمەن ماراپاتتالدى.
ەرلى-زايىپتى اق حالاتتى ابزال جاندار 2009 جىلعا دەيىن وسى ەلدى مەكەندە تاپجىلماي ەڭبەك ەتىپ, اۋىل ادامدارىنىڭ دەنساۋلىعىنا قاراپ, ومىرىنە اراشا تۇسە ءبىلدى. ءالى كۇنگە دەيىن ەرلى-زايىپتى سايلاۋ ءسابيت ۇلى مەن بوتاي ءابىلدينانىڭ ەسىمدەرىن ۇلىتاۋ-جەزقازعان ءوڭىرىنىڭ جۇرتشىلىعى قۇرمەتپەن اتايدى. ولار ەلگە قايىرىمدىلىعىمەن عانا تانىلىپ قويماي, ۇلگىلى وتباسى دا بولا ءبىلدى. ءۇش ۇل, ەكى قىز تاربيەلەپ وسىرگەن ارداقتى اتا-انا.
كەز كەلگەن ادام ۇرپاعىمەن ماقتانادى. اتا-انالارىنىڭ اتىنا كىر جۇقتىرماي ەڭبەك ەتىپ كەلە جاتقان نۇرلان ەنجىل ۇلى – جەزقازعان پەداگوگيكالىق ينستيتۋتىنىڭ تۇلەگى. 1995-2001 جىلدارى ءو.ا.بايقوڭىروۆ اتىنداعى جەزقازعان ۋنيۆەرسيتەتى قولدانبالى ماتەماتيكا كافەدراسىنىڭ اسسيستەنتى بولسا, 2001 جىلدان «قازاقمىس» جشس-نىڭ اقپاراتتىق تەحنولگيالار سالاسىندا قىزمەتتە جەمىستى ەڭبەك ەتىپ ءجۇر.
سايلاۋ اعامىزدىڭ ءبىلىم مەن عىلىم سالاسىندا ۇلكەن تابىستارعا جەتىپ جۇرگەن تاعى ءبىر ۇرپاعى – ەرلان ەنجىل ۇلى. ول 1988 جىلى قاراعاندى پوليتەحنيكالىق ينستيتۋتىنىڭ جەزقازعان فيليالىنا «ونەركاسىپتىك جانە ازاماتتىق قۇرىلىس» ماماندىعىنا ءتۇسىپ, ونى ۇزدىككە ءبىتىرىپ, 1999 جىلى ماسكەۋ قالاسىنداعى «تۇرعىن ءۇي جانە قوعامدىق عيماراتتار» ورتالىق عىلىمي-زەرتتەۋ ينستيتۋتىنىڭ اسپيرانتۋراسىندا كۇندىزگى بولىمگە وقۋعا ءتۇسىپ, عىلىم جولىنا ءتۇستى. ماسكەۋدە 2003 جىلى «تەحنولوگيا جانە قۇرىلىستى ۇيىمداستىرۋ» ماماندىعى بويىنشا تەحنيكا عىلىمدارىنىڭ كانديداتى عىلىمي دارەجەسىن قورعاعان ەرلان 2005 جىلدان باستاپ استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قىزمەت اتقارادى. بۇگىندە ساۋلەت-قۇرىلىس فاكۋلتەتىنىڭ دەكانى.
ءار ادامنىڭ ومىردە ءوز جولى بار. سوعان قاراي تۇلعاسى قالىپتاسىپ, بەينەسى بەكەمدەلە تۇسەدى. سايلاۋ ءسابيت ۇلى مەن بوتاي ءابىلدينا ادال ەڭبەكپەن تابىسقا جەتىپ, ءار كەز مەرەيى ۇستەم, ەڭسەسى بيىك بولدى. ەكەۋى تالاي بەلەستەن ءوتتى. ءومىردىڭ ءتاتتىسىن دە, كەرمەگىن دە تاتتى. جوققا بولىستى, سۇرىنگەندى سۇيەدى. بۇگىندە ەل اۋزىنان تاستامايتىن, قۇرمەت تۇتاتىن ازاماتتارعا اينالدى.
ءبىز اۋىل-ايماق حالقىنىڭ ءوتىنىشىن جەتكىزگىمىز كەلەدى. قوسكول اۋىلىنىڭ ورتالىعىنان سالىنىپ جاتقان دارىگەرلىك امبۋلاتورياعا ەنجىل ءسابيت ۇلىنىڭ ەسىمى بەرىلسە دەگەن ۇسىنىسىمىز بار. بۇل ءىس شەشىمىن تاپسا, نۇر ۇستىنە نۇر بولار ەدى.
جالپى جەرگىلىكتى جاستاردى دارىگەرلىككە ىنتالاندىرۋ ءۇشىن اۋىل-ايماققا ەڭبەگى سىڭگەن سايلاۋ ءسابيت ۇلى سىندى مامانداردى ونەگە ەتۋ قاجەت. سول ءۇشىن كوپشىلىك ەمدەلەتىن ۇلىتاۋ اۋداندىق اۋرۋحاناسى قابىرعاسىنا ەسكەرتكىش تاقتا ورناتۋ دا – ۋاقىت تالابى.
ابدۋللا جانالين
ۇلىتاۋ وبلىسى,
ۇلىتاۋ اۋدانى,
قوسكول اۋىلى
