زاماناۋي جەتىستىكتەر قولدانىلعان جاڭا كىتاپقا اقىننىڭ پوەزياسى, باردتىق تۋىندىلارى, شانسوندارى, اۆتورلىق اندەرىنىڭ ماتىندەرى جانە كوسەمسوزدەرى توپتاستىرىلعان. ناقتىراق ايتساق, ءبىرىنشى بولىمىنە پوەزيا, ەكىنشىسىنە – باردتىق, شانسوندىق تۋىندىلارى, ءۇشىنشى بولىمىنە – قالامگەردىڭ وي-تولعامدارى, كوسەمسوز جازبالارى جيناقتالعان. كوپشىلىك وقىرمانعا ارنالعان جيناقتىڭ جاڭالىعى سول – «AlphaPrint» باسپاسىنان شىققان كىتاپتا كورسەتىلگەن QR-كود ارقىلى اۆتوردىڭ مۋزىكالىق تۋىندىلارىن تىڭداپ, اقىننىڭ جەكە YouTube ارناسىنداعى اقپاراتتارمەن تانىسۋعا بولادى.
– بيىل 60 جاسقا تولعان مەرەيتويىمنىڭ اياسىندا حالقىما ءبىر ەسەپ بەرگىم كەلدى. ءسويتىپ ءوزىمنىڭ پوەزيامدى, باردتىق, شانسوندىق تۋىندىلارىمدى, سونىمەن بىرگە ەلدىك, ۇلتتىڭ بولاشاعى, زامان تۋرالى ءوزىمنىڭ وي-تولعامدارىم, كوسەمسوزدەرىمدى جيناستىرىپ, «قۇتتى» جارىققا شىعاردىق. ەكىنشى جاعىنان قازاقتىڭ كىتاپ شىعارۋ جاقسى ءداستۇرىن جالعاستىرىپ, جاڭا ءبىر لەپ اكەلۋگە ۇمتىلدىم, – دەيدى اۆتور.
كىتاپ كەشىن اقىن سەرىكزات دۇيسەنعازين تىزگىندەپ, جيىندى اقىن, مەملەكەتتىك سىيلىقتىڭ لاۋرەاتى عالىم جايلىباي اشىپ بەردى.
– قۋانىشتىڭ ولەڭدەگى جولى جازبا پوەزيادان باستالعان. ءتىپتى كەزىندە رەسپۋبليكالىق «جىگەر» فەستيۆالىنە قاتىسىپ, لاۋرەات اتانعان بولاتىن. كەيىن ايتىستا دا ءوز جولىن قالىپتاستىردى. مەن قۋانىشتى ۇلكەن ينتەللەكتۋال اقىن دەپ تانيمىن. اۋدارمالارىنىڭ ءوزى ءبىر توبە, دەپ عالىم جايلىباي قۋانىش ماقسۇتوۆتىڭ اقىندىق قىرىن جوعارى باعالاسا, جازۋشى الىبەك اسقاروۆ جارىق كورگەن سۋ جاڭا كىتاپتىڭ ەرەكشەلىگىنە توقتالدى: – سۋرەتشى بولعاننان كەيىن كوزىمىز ەڭ اۋەلى كوركەمدىككە تۇسەدى عوي. ءار بەتى تالعاممەن بەزەندىرىلگەن ادەمى كىتاپتى قۋانا قولىمىزعا الىپ وتىرمىز. فورماسى دا, قۇرىلىمى دا ەرەكشە ەكەن, – دەدى. ال الاشتانۋشى عالىم, پروفەسسور ايگۇل ىسماقوۆا: – قۋانىش ماقسۇتوۆ قاراعاندى وبلىسىنىڭ اقتوعاي دەگەن قاسيەتتى توپىراعىندا تۋعان. بۇل ولكە ءاليحان بوكەيحان, ءالىمحان ەرمەكوۆ, جاقىپ اقباەۆ سىندى ءبىرتۋارلاردىڭ تۋعان جەرى. سوندىقتان بولسا كەرەك, قۋانىشتىڭ دا بويىندا سول بابالارىنان دارىعان باتىلدىق بار. ول ايتىسى مەن جازبا پوەزياسىنان دا, باردتارى مەن شانسوندارىنان دا ايقىن سەزىلەدى. اقىن ءسوز ارقىلى, ءسوز جەتكىزە الماعان قوعامنىڭ اششى شىندىعىن ءان ارقىلى جەتكىزەدى. التى جاسىندا ءالىمحان ەرمەكوۆتىڭ الدىنا وتىرىپ, باتاسىن العان قۋانىشتىڭ باسقاشا مىنەز كورسەتۋى مۇمكىن ەمەس, – دەپ اقىننىڭ شىعارماشىلىقتاعى ازاماتتىق كوزقاراسى مەن باتىل بولمىسىنىڭ استارىنا ءۇڭىلدى.
سونداي-اق كىتاپ تانىستىرىلىمىندا فيلولوگيا عىلىمدارىنىڭ دوكتورى, پروفەسسور امانتاي ءشارىپ, جازۋشى-پۋبليتسيست, مادەنيەت قايراتكەرى قايىربەك سادۋاقاسوۆ, بەلگىلى سپورت ءجۋرناليسى نەسىپ ءجۇنىسباي, اقىن داۋلەتكەرەي كاپ ۇلى, تاعى باسقالار اۆتوردى جاڭا تۋىندىسىمەن قۇتتىقتاپ, جىلى لەبىزىن جەتكىزدى. كوپ الدىندا قارا گيتاراسىن اسىنىپ شىققان قۋانىش ماقسۇتوۆ جيىلعان جۇرتشىلىققا العىسىن ءبىلدىرىپ, شانسون ستيلىندەگى ءوزىنىڭ «قوتىرتاي» ءانىن ورىنداپ بەردى. مازمۇندى كەزدەسۋ سوڭىندا اۆتوردىڭ ونەردەگى اعا-ءىنىسى – قازاقستاننىڭ ەڭبەك سىڭىرگەن قايراتكەرى امانتاي جۇماشەۆ پەن ەرلان داكەنوۆ «اقتوعاي ءۆالسىن» شىرقاپ, كوپشىلىكتىڭ كوڭىلىن كوتەردى.
ال كەشكە مۋزىكالىق جاس كورەرمەن تەاترىندا قۋانىش ماقسۇتوۆتىڭ «ماڭگىلىك مۇڭنىڭ اۋەنى» اتتى پوەتيكالىق-مۋزىكالىق قويىلىمى كورسەتىلدى. قازاقستاننىڭ ەڭبەك سىڭىرگەن قايراتكەرى اسحات ماەميروۆتىڭ رەجيسسەرلىگىمەن قويىلعان تۋىندىدا جاس كورەرمەن تەاترىنىڭ ارتىستەرى ونەر كورسەتتى. قويىلىم كورەرمەنگە پوەزيا مەن مۋزىكا الەمىنە ساياحاتتاۋعا تاماشا مۇمكىندىك سىيلادى.
