كوشە سىپىرىپ, قالانىڭ تازالىعى ءۇشىن تىنىم تاپپايتىن جۇمىسشىلارعا وسكەمەن قالاسىنىڭ ەرىكتىلەرى ءتورتىنشى كۇن قاتارىنان ىستىق شاي, ءدامدى توقاش تاراتىپ ءجۇر. «جىلۋلىق سىيلا» اكتسياسى اياسىنداعى ءىس-شاراعا وسكەمەن قالالىق ۆولونتەرلەر ورتالىعىنىڭ جاستارى قۇلشىنا كىرىسكەن. قاقاعان ايازدا قولدان كۇرەك تۇسپەي, قالانىڭ تۇكپىر-تۇكپىرىندەگى قار مەن قوقىستى تازالاۋ وڭاي شارۋا ەمەس. وسىندايدا ىستىق شايدان اسقان نە بار؟! جۇمىسشىلارعا بۋىن بۇرقىراتىپ شاي تاراتىپ جۇرگەن جاستارعا قاراعان قالا جۇرتشىلىعى دا ريزا.
– كۇننىڭ ايازىنا قاراماستان قالامىزدى تازالاپ جۇرگەن كوممۋنالدىق قىزمەتكەرلەرگە العىسىمىزدى بىلدىرەمىز! كەي-كەيدە جۇمىس كابينەتى سۋىپ كەتىپ جاتسا, قوسىمشا جىلىتقىش قوسىپ مارە-سارە بولىپ جاتامىز. ال بۇل كىسىلەر ساعاتتاپ دالادا جۇرەدى. اسىرەسە بەت قاريتىن ايازدى كۇندەرى قيىن. سوندىقتان دا قالا جاستارى جىلۋلىق سىيلايىق دەپ, ىستىق شاي تاراتىپ ءجۇر, – دەيدى وسكەمەن قالاسى اكىمدىگىنىڭ جاستار رەسۋرستىق ورتالىعىنىڭ ديرەكتورى باقىتجان ەربولقىزى.
قالا ەرىكتىلەرىنىڭ جىل ون ەكى اي اتقارىپ جۇرگەن شارۋالارى از ەمەس. ال بۇل جولعى اكتسيالارى شىنىمەن دە جىلۋلىق سىيلايدى. كوممۋنالدىق قىزمەتكەرلەرگە عانا ەمەس, كورگەن كوزگە دە جىلۋ ۇيالاتاتىنداي. ايتقانداي, شىعىستا اپتالاپ تۇرعان ايازدىڭ بەتى قايتار ەمەس. مەكتەپ وقۋشىلارى قاشىقتىقتان وقۋعا كوشىپ, بىرقاتار قاۋىپسىزدىك شاراسى دا قولعا الىنعان.
وسكەمەن
