قالا باسشىلىعى كوپشىلىكتىڭ قاقاعان ايازدا توڭىپ قالماۋىن ويلاسا كەرەك, سالتاناتتى ءراسىم پايدالانۋعا بەرىلگەن تۇرعىن ءۇيدىڭ جانىنداعى جاستار رەسۋرستىق ورتالىعىنىڭ ءماجىلىس زالىندا ءوتتى.
قالا تۇرعىندارى قونىستانعان پاتەرلەردى قالا اكىمدىگى جەكە كومپانيادان ساتىپ الىپ وتىر. ونىڭ ىشىندە ءۇش بولمەلى 8, ەكى بولمەلى 32 پاتەر بار. 96 شارشى مەترلىك كەڭ پاتەرلەرگە كوپبالالى وتباسىلار قونىستاندى. ال ەكى بولمەلى پاتەرلەرگە جالعىزباستى انالار, جەتىمدەر مەن مۇمكىندىگى شەكتەۋلى جاندار ورنالاستى.
اتالعان كوپقاباتتى تۇرعىن ءۇي بۇرىن جاتاقحانا بولعان. توقسانىنشى جىلدارى قاڭىراپ بوساپ قالعان ءتورت قاباتتى عيمارات كۇنى بۇگىنگە دەيىن كادىمگىدەي قالانىڭ شىرايىن بۇزىپ تۇر ەدى. بوس عيماراتتى بيىل ساۋىردە «Qazaqstan Construction Holding» سەرىكتەستىگى ساتىپ الىپ, قايتا جاڭعىرتۋ جۇمىستارىن باستاپ كەتكەن. ناتيجەسىندە, اينالدىرعان 6-7 ايدىڭ كولەمىندە ەسكى عيمارات 46 پاتەرى بار سۋ جاڭا بەس قاباتتى تۇرعىن ءۇي بولىپ جاسانىپ شىعا كەلدى.
«الداعى ۋاقىتتا وسى ءۇيدىڭ جوعارى قاباتىنداعى پاتەرلەردى دە ساتىپ العىمىز كەلەدى. وعان الەۋمەتتىك جاعدايى تومەن وتباسىلار قونىستاناتىن بولادى. رۋدنىيدا جەكە ينۆەستورلار وسىنداي بىرنەشە بوس تۇرعان عيماراتتى جوندەۋدەن وتكىزىپ جاتىر. تۇرمىستىق جاعدايى تومەن وتباسىلاردى باسپانامەن قامتاماسىز ەتۋ ماقساتىندا ول ۇيلەردى دە ساتىپ الۋعا نيەت ەتىپ وتىرمىز», دەيدى رۋدنىي اكىمىنىڭ ورىنباسارى ۆالەري پولەشكو.
جەرگىلىكتى اتقارۋشى بيلىك اتالعان پاتەرلەردىڭ ءبىر شارشى مەترىن 240 مىڭ تەڭگەدەن ارنايى كونكۋرس ارقىلى ساتىپ العان. پاتەردىڭ ءبارى جالدامالى. جەكەنىڭ مەنشىگىنە بەرىلمەيدى.
قالا تۇرعىندارىن باسپانا قۋانىشىمەن قۇتتىقتاي كەلگەن وبلىس اكىمى قۇمار اقساقالوۆ 40 ادامعا قىرىق پاتەردىڭ كىلتىن ۇستاتتى.
«جىل باسىندا ءبىز رۋدنىيدا كەزىندە تۇرعىن ءۇي قىزمەتىن اتقارعان, كەيىن ءبىراز جىل بويى بوس تۇرىپ قالعان 11 كوپقاباتتى عيماراتتى قايتا قالپىنا كەلتىرەمىز دەپ ۋاعدالاسقان ەدىك. بيىل 7 عيماراتتا قايتا جاڭعىرتۋ جۇمىستارى ءجۇرىپ جاتىر. جىل سوڭىنا دەيىن تاعى ەكى تۇرعىن ءۇي پايدالانۋعا بەرىلىپ, باسپانا كەزەگىندە تۇرعان 231 وتباسى جاڭا پاتەرگە كىرەتىن بولادى», دەدى وبلىس اكىمى.
باسپانا قۋانىشىنا يە بولعانداردىڭ ىشىندە اربا بيىنەن سپورت شەبەرى, ءتورت دۇركىن قازاقستان چەمپيونى يۋليا كالينينا دا بار. يۋليا – ءى توپتاعى مۇگەدەك. ءۇي كەزەگىن 10 جىل كۇتىپتى. بويجەتىپ قالعان قىز بالاسىن تاربيەلەپ وتىرعان سپورت شەبەرى ءبىرىنشى قاباتتاعى ەكى بولمەلى پاتەرگە قونىستاندى. «بۇعان دەيىن ءۇشىنشى قاباتتان پاتەر جالداپ تۇردىق. ول ءۇي ءتىپتى قولايسىز ەدى, ءليفتىسى جوق. قىزىم تومەن ءتۇسىپ, جوعارىعا شىعارىپ الاتىن. سىرتتا كوپ كۇتىپ وتىرىپ قالاتىن كەزدەرىم دە از بولعان جوق. ال تاۋەلسىزدىك مەرەكەسى قارساڭىندا مەملەكەت بەرىپ جاتقان جاڭا پاتەرىم ءبىرىنشى قاباتتا. كىرەبەرىسىندە پاندۋسى بار, مۇمكىندىگى شەكتەۋلى جانداردىڭ كىرىپ-شىعۋىنا قولايلى جاعداي جاسالعان. ءبىز سەكىلدى كەمتار جاندارعا قارايلاسىپ, جاناشىر بولا ءبىلۋ دە ىزگى قوعامنىڭ, كەمەل ەلدىكتىڭ بەلگىسى», دەيدى يۋليا.
قوستاناي وبلىسى
