ماۋلەن اشىمباەۆ مەملەكەت باسشىسى قاسىم-جومارت توقاەۆتىڭ باستاماسىمەن ەلدى جاڭعىرتۋ باعىتىندا كەشەندى رەفورما جۇزەگە اسىرىلىپ جاتقانىن اتاپ ءوتتى. سونىڭ ناتيجەسىندە ساياسي جۇيە تەڭگەرىمدى, اشىق جانە دەموكراتيالىق تۇرعىدان نىعايا ءتۇستى. قازىرگى تاڭدا ەلدىڭ الدىندا تۇرعان باستى مىندەتتەردىڭ ءبىرى –دامۋدىڭ جاڭا ەكونوميكالىق ۇلگىسىن قالىپتاستىرۋ.
«پرەزيدەنتىمىز قاسىم-جومارت كەمەل ۇلى توقاەۆ 2029 جىلعا قاراي ۇلتتىق ەكونوميكانىڭ كولەمىن ەكى ەسە ۇلعايتىپ, 450 ملرد دوللارعا جەتكىزۋدى ماقسات ەتىپ بەلگىلەپ بەردى. بۇل رەتتە ءوسۋ نەگىزىنەن وڭدەۋشى ونەركاسىپتى جانە ەكونوميكانىڭ تەحنولوگيالىق سەكتورلارىن دامىتۋ ەسەبىنەن بولۋعا ءتيىس. پارلامەنت جۇرگىزىلىپ جاتقان رەفورمالاردى ىسكە اسىرۋدا ماڭىزدى ءرول اتقاراتىنى انىق. ءبىزدىڭ نەگىزگى مىندەتىمىز – بارلىق وزگەرىستى زاڭنامالىق تۇرعىدان قامتاماسىز ەتۋ», دەدى م. اشىمباەۆ.
سونداي-اق ول سەناتتىڭ ساياسي جانە الەۋمەتتىك-ەكونوميكالىق رەفورمالاردى ىسكە اسىرۋ جونىندەگى قىزمەتىنە توقتالدى. ەكى جىل ىشىندە سەناتورلار ادام قۇقىقتارىن قورعاۋ جۇيەسىن نىعايتۋعا, ازاماتتاردىڭ ءومىر ءسۇرۋ دەڭگەيىن ودان ءارى ارتتىرۋعا جانە قازاقستاننىڭ ۇدەمەلى ەكونوميكالىق دامۋىنا باعىتتالعان 170-تەن اسا زاڭدى ماقۇلدادى. الداعى ۋاقىتتا ينۆەستورلارعا قولايلى جاعداي جاساۋدى كوزدەيتىن جاڭا بيۋدجەت جانە سالىق كودەكستەرى قابىلدانادى.
م.اشىمباەۆ قازاقستان وڭدەۋ ونەركاسىبى, تولىق تسيكلدى مەتاللۋرگيا, ماشينا جاساۋ, اگروونەركاسىپتىك سەكتور جانە باسقا دا سالالاردا شەتەلدىك ينۆەستيتسيانى تارتۋعا مۇددەلى ەكەنىن تىلگە تيەك ەتتى. پالاتا سپيكەرى بارلىق باعىت بويىنشا, ونىڭ ىشىندە الەۋمەتتىك سالادا ينكليۋزيۆتى دامۋدىڭ ماڭىزىنا دا نازار اۋداردى.
«قازاقستان بۇگىندە اشىقتىق قاعيداتتارىن ۇستانادى. سونداي-اق ەكونوميكالىق, ساياسي, مادەني-گۋمانيتارلىق جانە باسقا دا سالالاردا وزگە ەلدەرمەن جان-جاقتى ىنتىماقتاستىقتى بەلسەندى دامىتىپ كەلەدى. ديپلوماتيالىق بيزنەس كلۋبى وسى باعىتتاعى مىندەتتەردى ىسكە اسىرۋعا ءوز ۇلەسىن قوسادى دەپ سەنەمىن», دەدى سەنات توراعاسى.
كەزدەسۋ كەزىندە سىرتقى ىستەر ءمينيسترىنىڭ ورىنباسارى الىبەك باقاەۆ, كلۋبتىڭ تەڭ توراعاسى يسلامبەك سالجانوۆ, «اتامەكەن» ۇكپ تورالقا توراعاسى رايىمبەك باتالوۆ, YPO Kazakhstan-نىڭ توراعاسى قانات كوپباەۆ جانە تاعى باسقا قاتىسۋشىلار ءسوز سويلەپ, بايانداما جاسادى.
ايتا كەتەيىك, ديپلوماتيالىق بيزنەس كلۋبى 2015 جىلى قازاقستاننىڭ سىرتقى ىستەر مينيسترلىگى مەن «اتامەكەن» ۇكپ-نىڭ باستاماسىمەن قۇرىلعان. ونىڭ نەگىزگى ماقساتى – شەتەلدىك ديپلوماتيالىق كورپۋستىڭ قازاقستاننىڭ بيزنەس-قاۋىمداستىعىمەن ساۋدا-ەكونوميكالىق, ءبىلىم جانە عىلىم, مادەنيەت سالالارىنداعى ءوزارا ءىس-قيمىلىن دامىتىپ, نىعايتۋ ءۇشىن بەيرەسمي الاڭ قۇرۋ. كلۋبقا ەلدە اككرەديتتەلگەن شەت مەملەكەتتەردىڭ ديپلوماتيالىق ميسسيالارىنىڭ, حالىقارالىق ۇيىمداردىڭ, مەملەكەتتىك ورگاندار مەن كۆازيمەملەكەتتىك مەكەمەلەردىڭ جانە ۇلتتىق كومپانيالاردىڭ باسشىلارى, YPO Kazakhstan مۇشەلەرى, قازاقستانداعى شەت مەملەكەتتەردىڭ قۇرمەتتى كونسۋلدارى, سونداي-اق, رەسپۋبليكانىڭ بيزنەس-قاۋىمداستىعىنىڭ كوشباسشىلارى مۇشە.
