فوتو: polisia.kz
جەدەل ۋاكىلدەر ءبىر جىل ىشىندە ۇستاعان قىلمىسكەرلەردىڭ اراسىندا 34 كىسى ءولتىرۋشى, 17 قاراقشى, 84 توناۋشى, 10 بوپسالاۋشى, 11 زورلىق كورسەتۋشى, 87 ەسىرتكى قىلمىسكەرى بار.
«وسى جىلدىڭ شىلدە ايىندا شىمكەنتتە وتكەن جەدەل-ىزدەستىرۋ ءىس-شارالارى بارىسىندا ءبىزدىڭ قىزمەتكەرلەر 2018 جىلى دۋبايدا كىسى ولتىرگەنى ءۇشىن ىزدەۋدە جۇرگەن ەر ادامدى ۇستادى. سونداي-اق تارازدا 2022 جىلدىڭ قاراشا ايىنان باستاپ قاراعاندى وبلىسىنىڭ پوليتسيا دەپارتامەنتىمەن كىسى ولتىرۋگە وقتالعانى ءۇشىن ىزدەۋدە جۇرگەن ەكى ازامات قۇرىقتالدى», دەدى ءىىم كريمينالدىق پوليتسيا دەپارتامەنتى باستىعىنىڭ ورىنباسارى رۋسلان نازاروۆ.
پوليتسيا قىزمەتكەرلەرى تەك ەل ىشىنەن ىزدەۋمەن شەكتەلمەي, وزگە مەملەكەتتەرمەن دە تىزە قوسىپ, قىلمىسكەردى ۇستاۋ وپەراتسياسىن جۇزەگە اسىرادى. ينتەرپولدىڭ ۇلتتىق ورتالىق بيۋروسىنىڭ كومەگى كوپ تيەتىنى ايتىلدى. تمد-عا مۇشە ەلدەردىڭ اۋماعىندا ءبىر جىلدا ەكى مارتە «ىزدەستىرۋ» وپەراتسياسى جۇرگىزىلەدى. شەت مەملەكەتتەردە جۇرگىزگەن وپەراتسيانىڭ ناتيجەسىندە 70 قىلمىسكەر ۇستالىپ, ىزدەۋدە جۇرگەن 36 ادام انىقتالعان. ولار اقش, شۆەتسيا, گەرمانيا, تۇركيا, سونداي-اق وزگە دە الىس-جاقىن ەلدەردەن تابىلعان. قازاقستان اۋماعىندا باسقا مەملەكەتتەردىڭ قۇقىق قورعاۋ ورگاندارى ىزدەۋ سالعان 374 قىلمىسكەر ۇستالعان.
