ازيا كەڭەسىنە مۇشە مەملەكەتتەردىڭ, ۇيىمعا توراعالىق ەتىپ وتىرعان قازاقستان تاراپىنىڭ جانە اوسشك حاتشىلىعىنىڭ جوعارى لاۋازىمدى وكىلدەرى وسى جىلدىڭ نەگىزگى قورىتىندىلارىنا شولۋ جاسادى. سونداي-اق 2024 جىلعا ارنالعان جوسپارلار مەن ۇيىمنىڭ نەگىزگى سالالارىنداعى ىنتىماقتاستىق جونىندەگى تۇجىرىمدامالاردى بەكىتتى. بۇعان قوسا باقىلاۋشى مەملەكەت مارتەبەسىن الۋعا تۇسكەن ءوتىنىمدى قاراپ, باسقا حالىقارالىق ۇيىمدارمەن بولاشاقتاعى ىنتىماقتاستىق جايىن تالقىلادى.
اعا لاۋازىمدى تۇلعالار كوميتەتى وتىرىسىنىڭ توراعاسى, قازاقستان سىرتقى ىستەر ءمينيسترىنىڭ ورىنباسارى الىبەك باقاەۆ مۇشە مەملەكەتتەردى بيىلعى ەلەۋلى جەتىستىكتەر, اوسشك-ءنىڭ اعىمداعى قىزمەتى جانە 2024 جىلعا ارنالعان جۇمىس جوسپارلارى, ونىڭ ىشىندە ترانسفورماتسيا جول كارتاسىن ىسكە اسىرۋ تۋرالى حاباردار ەتتى. جول كارتاسىن وسى جىلعى قىركۇيەكتە اوسشك مينيسترلەر كەڭەسى ماقۇلداعان بولاتىن.
ازيا كەڭەسىنىڭ باس حاتشىسى قايرات سارىباي 2023 جىلى اوسشك حاتشىلىعىنىڭ قىزمەتى تۋرالى حاتشىلىقتىڭ ءوتىپ بارا جاتقان جىلداعى جۇمىسىنىڭ بارلىق باعىتىن قامتيتىن جىل سايىنعى بايانداماسىن ۇسىندى. سونداي-اق 2024 جىلعا ارنالعان جوسپارمەن تانىستىردى.
اعا لاۋازىمدى تۇلعالار كوميتەتى سەنىم شارالارىن ىسكە اسىرۋ جونىندەگى جوسپاردى جانە ۇيىمنىڭ جىلدىق جوسپارلاۋىنىڭ نەگىزگى قۇجاتتارى بولىپ سانالاتىن اوسشك حاتشىلىعىنىڭ 2024 جىلعا ارنالعان بيۋدجەتىن بەكىتتى.
سونىمەن قاتار كوميتەت موڭعوليا مەن يران دايىنداعان اوسشك-ءنىڭ «قورشاعان ورتانى قورعاۋ» جانە «تابيعي اپاتتارعا قارسى كۇرەس» باسىم سالالارى بويىنشا تۇجىرىمدامالاردىڭ ەكى جوباسىن قاراپ, ماقۇلدادى.
ايتا كەتۋ كەرەك, اعا لاۋازىمدى تۇلعالار كوميتەتى ساۋد ارابياسى كورولدىگىنىڭ اوسشك-گە باقىلاۋشى مەملەكەت رەتىندە قوسىلۋ تۋرالى ءوتىنىشىن قارادى جانە ۇيىمنىڭ مينيسترلەر كەڭەسىنە ساۋد ارابياسىنا اوسشك باقىلاۋشىسى مارتەبەسىن بەرۋدى ۇسىندى. ۇيىم قاتارىنىڭ كەڭەيۋى جاعىمدى وقيعا بولىپ سانالادى. ساۋد ارابياسىنىڭ اوسشك قاتارىنا كىرۋى ديالوگ پەن ىنتىماقتاستىق ءۇشىن پانازيالىق ۇيىم رەتىندە اوسشك-نى ودان ءارى دامىتۋ تۇرعىسىنان ماڭىزدى.
وتىرىستىڭ نەگىزگى ساتتەرىنىڭ ءبىرى جاقىندا بانگلادەشتىڭ راتيفيكاتسيالاۋ ناتيجەسىندە ارتىقشىلىقتار مەن يممۋنيتەتتەر تۋرالى اوسشك كونۆەنتسياسىنىڭ كۇشىنە ەنۋ ۇدەرىسىنىڭ ىلگەرىلەۋى بولدى.
سونىمەن قاتار اعا لاۋازىمدى تۇلعالار كوميتەتى قاتىسۋشىلارى بۇكىل ازيا قۇرلىعىنا پايدا اكەلەتىن قۇرىلىمدار اراسىندا ءتيىمدى سينەرگيا قۇرۋ ءۇشىن شانحاي ىنتىماقتاستىق ۇيىمى, وڭتۇستىك-شىعىس ازيا مەملەكەتتەرىنىڭ قاۋىمداستىعى جانە بۇۇ تەرروريزمگە قارسى باسقارماسى سياقتى باسقا حالىقارالىق ۇيىمدارمەن تىعىز قارىم-قاتىناس ورناتۋ, اتالعان قۇرىلىمدارمەن ءتيىمدى ءوزارا ءىس-قيمىلدى ودان ءارى دامىتۋ ماسەلەسىن تالقىلادى.
