ال قازىر شە؟ ءححى عاسىردا ءومىر ءسۇرىپ وتىرمىز. ۇشاق ۇشىپ, پويىز زۋلاپ, كولىكتەر اعىلىپ, التى قۇرلىقتاعى اقپارات التى سەكۋندتا تاراپ جاتقان ۋاقىت قوي. بىراق گازەت-جۋرنالدار تارالىمى تومەندەپ تۇر. ەل ەنجار, جۇرت سەلقوس, پوشتا قىزمەتى شابان. بارلىعىن قۋ نارىق ءبىر تاباعا سالىپ قۋىرىپ جاتىر دەۋ تاعى ابەستىك بولار ەدى. ويتكەنى التىن تاباقتان اس ىشپەسە دە حالىقتىڭ سالىستىرمالى تۇردە قارنى توق, كويلەگى كوك. البەتتە الەۋمەتتىك جەلى العا شىقتى دەيمىز. جەلىدەگى جىلت ەتپە جىلتىرعا الداناتىن اعايىن ارتتى دەرمىز. بۇل دا بىلە بىلگەن ادامعا التىن ۋاقىتتى ۇرلاپ جاتقان بايانسىز تىرلىك ەكەنىن باعامداي بەرمەيمىز. سوندىقتان شەت-شەگى جوق ينتەرنەت كەڭىستىگىندەگى ۆيرتۋالدى الەمنەن ۆيزۋالدى دۇنيەنى قانشالىقتى كورسەڭىز دە جادىعا جاتتاپ, ساناعا قاتتاپ ۇلگەرمەيتىنىمىزدى تۇسىنەر ۋاقىت كەلدى. ويىمىزدى قايتا سالماقتايىق, بارىمىزدى قايتا باعامدايىق.
بۇل – وقۋ مادەنيەتى. وقۋ مادەنيەتى – ۇلكەن مادەنيەت. وقۋ مادەنيەتىن جوعالتپايىق. وقيتىن ادام – سانالى ادام, تاربيەلى تۇلعا. زيالىلىقتىڭ دا ءوسىپ-ونەر ورتاسى – وقۋ. وقۋ – اداستىرماس تەمىرقازىق. وقۋسىز ادام تاربيەدەن ماقۇرىم. وقيتىن ۇلت بولۋ ءۇشىن وقيتىن قالا, وقيتىن اۋىل, وقيتىن ازامات, وقيتىن ۇرپاق بولۋى كەرەك.
ال مازمۇندى, بايىپتى, وقىساڭىز وي سالاتىن وڭدى دۇنيە ءالى دە ءداستۇرلى باسپاسوزدە. مەرزىمدى باسىلىمعا شىققان جاقسى ماتەريالدىڭ ءبارىن ەل ىزدەپ, تاۋىپ وقىپ جاتقان جوق. گازەت-جۋرنالعا جازىلسا قولىندا تۇرادى, كەز كەلگەن ۋاقىتتا وقي الادى. ۋاقىت تاپشى دەرسىز. وندا بالالارىڭىزعا جازدىرىپ بەرىڭىز. تىم قۇرىسا بالالارىڭىز وقىسىن. باسىلىممەن دوس بولعان بالا ويعا جۇيرىك, قاعىلەز بولىپ وسەدى, ورتاسىن تابادى, جىلدام جەتىلەدى.
قازىر «قازاق گازەتتەرى» سەرىكتەستىگىندە بالالار مەن جاسوسپىرىمدەرگە ارنالعان «بالدىرعان», «اق جەلكەن» جۋرنالدارى مەن «ۇلان», «درۋجنىە رەبياتا» گازەتتەرى بار. بۇل باسىلىمداردىڭ مازمۇنى جاس وسكىندى جەتىلدىرەدى, جاس تالاپقا جىگەر بەرەدى. بالاڭىزدى اقىلى ورتالىقتارعا سۇيرەۋگە قاراعاندا الدەقايدا پايدالى. بالا تاربيەسىنە قالاعان باسىلىمىنا جازدىرىپ بەرۋ ارقىلى دا ۇلەس قوسا الاسىز.
ارينە, بالا تاربيەلەۋ – اۋەلى ءوزىڭىزدى تاربيەلەۋ. ءوزىڭىز دە وقىڭىز, ءوزىڭىز دە جازىلىڭىز. ءسىز وقيتىن باسىلىم دا «قازاق گازەتتەرى» سەرىكتەستىگىندە جەتەرلىك. ايتالىق, «Egemen Qazaqstan» مەن «كازاحستانسكايا پراۆدا» گازەتتەرى كۇندەلىكتى جارىق كورەدى. ەلمەن بىرگە تىنىستايسىز, ەلدىك سانا قالىپتاستىراسىز. قازىرگى الەمنىڭ ميى اشىپ تۇرعان الماعايىپ زاماندا بۇل وتە قاجەت. ءتىپتى سىيلىققا باسىلىمنىڭ ءبىر جىلدىق جازىلىمىن سىيلاساڭىز قانداي وزگەشە تارتۋ بولار ەدى. تۋعان اۋىلىڭىزعا, وسكەن-ونگەن ورتاڭىزعا, مەكتەبىڭىزگە, اعايىن-تۋىسىڭىزعا جازدىرساڭىز جانىڭىزعا دا, جاقىنىڭىزعا دا جىلۋلىق ۇيالايدى دەپ ءبىلىڭىز.
ءبىز ۇلتتىق بىرەگەيلىككە ۇيىسۋعا ءتيىسپىز. «انا ءتىلى» ۇلت باسىلىمى, دياسپورالىق «ۋيعۋر اۆازي» گازەتتەرى مەن ساياسي-قوعامدىق باعىتتا شىعاتىن «اقيقات», «مىسل» جۋرنالدارى دا وسى ساناتتان تابىلاتىن ساناۋلى باسىلىمدارىمىزدىڭ ءبىرى.
باعالارى پرايس-پاراقشادا. زەر سالساڭىز, قالتا قاقپايتىن سوما. تەك ەرىنبەي جازدىرىڭىز. ءباسپاسوز وقۋ مادەنيەتىن بىرگە قالىپتاستىرايىق!
