جارىسقا قاتىسۋشىلارعا ساتتىلىك تىلەگەن ماۋلەن اشىمباەۆ قازىرگى تاڭدا بوچچا ەلىمىز بويىنشا ازاماتتارعا قولجەتىمدى سپورت تۇرىنە اينالىپ كەلە جاتقانىن اتاپ ءوتتى. سپورتشىلاردىڭ دا كاسىبي دەڭگەيى ارتىپ كەلەدى. بۇعان قازاقستان بوچچا فەدەراتسياسىنىڭ رەسمي تۇردە حالىقارالىق بوچچا فەدەراتسياسىنىڭ مۇشەسى بولىپ تىركەلۋى جانە ەل چەمپيوناتىنىڭ وتكىزىلۋى ايقىن دالەل. سونداي-اق قازاقستان قۇراماسىنىڭ ازيا پاراليمپيادا ويىندارىنا قاتىسىپ, جالپىكوماندالىق ەسەپتە سەگىزىنشى ورىن العانىن دا اتاپ وتكەن ءجون. پالاتا سپيكەرى بۇل جەتىستىكتەر سپورتشىلاردىڭ ەرىك-جىگەرىنىڭ جانە ەلىمىزدە جۇرگىزىلىپ جاتقان ينكليۋزيۆتى ساياساتتىڭ ناتيجەسى ەكەنىن ايتتى. وسىعان بايلانىستى مەملەكەت باسشىسىنىڭ تاپسىرماسى بويىنشا ەلىمىزدە ەرەكشە قاجەتتىلىكتەرى بار ازاماتتاردى قولداۋ جانە ولارعا قولايلى جاعداي جاساۋ باعىتىندا اۋقىمدى جۇمىس اتقارىلىپ كەلەدى.
«پرەزيدەنتىمىز قاسىم-جومارت توقاەۆ بارلىق سالادا ينكليۋزيۆتىلىك قاعيداتىن ىسكە اسىرۋعا باسا ءمان بەرىپ كەلەدى. وسى ورايدا مەملەكەت باسشىسىنىڭ تاپسىرماسىنا سايكەس ينكليۋزيۆتى سپورت تۇرلەرىن دامىتۋ ءۇشىن ءتيىستى جاعداي جاسالىپ كەلەدى. بۇل رەتتە بوچچا سياقتى سپورت تۇرلەرىنە دە ۇلكەن قولداۋ كورسەتىلىپ وتىر. بۇگىندە استانادا جانە ءىرى قالالاردا عانا ەمەس, ەلىمىزدىڭ وزگە دە وڭىرلەرىندە بوچچاعا دەگەن قىزىعۋشىلىق ارتىپ كەلە جاتىر. سوندىقتان الداعى ۋاقىتتا وبلىستاردا جاڭا فەدەراتسيالار اشىلادى دەپ سەنەمىز. وسىنداي ناقتى قادامدار بوچچاشىلارىمىزدى پاراليمپيادا ويىندارىنىڭ جەڭىس تۇعىرىنا جەتەلەيتىنى انىق», دەدى م.اشىمباەۆ.
فەدەراتسيا پرەزيدەنتىنىڭ ايتۋىنشا, قازىرگى تاڭدا پاۆلودار, قاراعاندى, ماڭعىستاۋ, اتىراۋ, قوستاناي, اباي, جەتىسۋ وبلىستارىندا بوچچادان وڭىرلىك فەدەراتسيالار اشۋ جۇمىستارى جۇرگىزىلىپ جاتىر.
بوچچادان قازاقستان كۋبوگى جولىنداعى جارىستى تۋريزم جانە سپورت مينيسترلىگىنىڭ قولداۋىمەن قازاقستان بوچچا فەدەراتسياسى ۇيىمداستىردى. سونداي-اق سايىسقا استانا قالاسى دەنە شىنىقتىرۋ جانە سپورت باسقارماسى, «سامۇرىق-قازىنا» اق جانە «Sport Qory» تۋريزم جانە سپورت يندۋسترياسىن قولداۋ قورى قولۇشىن بەردى.
بوچچادان ەل كۋبوگى ساراپقا سالىنعان جارىستىڭ جابىلۋ راسىمىندە ماۋلەن اشىمباەۆ جەڭىمپازداردى ماراپاتتاپ, جىلى لەبىزىن ءبىلدىردى. قۇتتىقتاۋ سوزىندە ماۋلەن اشىمباەۆ سايىستىڭ جوعارى دەڭگەيدە وتكەنىن جانە ەرەكشە سپورتشىلاردىڭ شەبەرلىگى مەن تاباندىلىعىن ايرىقشا اتاپ ءوتتى. سونداي-اق ول قازاقستان بوچچا فەدەراتسياسىنىڭ قىزمەتىن قورىتىندىلاپ, الداعى جۇمىس جوسپارىنا توقتالدى.
«الدىمىزدا اۋقىمدى مىندەتتەر تۇر. كەلەسى جىلى بىرقاتار ءىس-شارا ۇيىمداستىرۋدى جوسپارلاپ وتىرمىز. العاش رەت بوچچادان ۇلتتىق جاسوسپىرىمدەر قۇراماسىن جاساقتايمىز. فەدەراتسيا تۋريزم جانە سپورت مينيسترلىگىنىڭ جانە دەمەۋشىلەردىڭ قولداۋىمەن كەلەسى جىلى ەل چەمپيوناتى, رەسپۋبليكا كۋبوگى, سۇلتانبەك ورىنباساروۆتى ەسكە الۋعا ارنالعان اشىق تۋرنير سياقتى كەم دەگەندە ءۇش ءىرى رەسپۋبليكالىق جارىس ۇيىمداستىرۋدى كوزدەپ وتىر. ودان بولەك, ۇلتتىق قۇرامامىز بىرقاتار حالىقارالىق دوداعا قاتىسادى», دەگەن ماۋلەن اشىمباەۆ جارىسقا قاتىسۋشىلارعا, ولارعا قولداۋ كورسەتىپ, بەلسەندىلىك تانىتقان جاتتىقتىرۋشىلار مەن اتا-انالارعا العىس ءبىلدىردى.
ايتا كەتەيىك, بوچچادان قازاقستان رەسپۋبليكاسىنىڭ كۋبوگى ءۇشىن جارىس 8-9 جەلتوقسان كۇندەرى ەلوردادا جاقسىلىق ۇشكەمپىروۆ اتىنداعى جەكپە-جەك سارايىندا ءوتتى.
