بەكزات ونەر مەيرامىنا مادەنيەت جانە اقپارات ءمينيسترى ايدا بالاەۆا, رەسەي فەدەراتسياسى مادەنيەت ءمينيسترىنىڭ ورىنباسارى اندرەي مالىشەۆ, رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين, سونداي-اق قازاقستان مەن رەسەيدىڭ ەڭبەك سىڭىرگەن ارتىستەرى قاتىستى.
– وسى جىلدىڭ 2 ناۋرىزىندا ەلىمىزدىڭ مادەني يگىلىگى بولىپ سانالاتىن قازاقستاننىڭ جەتەكشى تەاترى «استانا وپەرا» مەملەكەتتىك وپەرا جانە بالەت تەاترىنىڭ ساحناسىندا وتكەن عاسىردىڭ ۇلى يمپرەساريوسى, ورىس مادەنيەتىن دامىتۋعا جانە تانىمال ەتۋگە زور ۇلەس قوسقان, نەگىزىن قالاۋشىسى سەرگەي دياگيلەۆتىڭ «ورىس ماۋسىمدارى» اۋقىمدى حالىقارالىق مادەني جوباسى باستالعان ەدى. جىل بويى رەسەيلىك ارىپتەستەرىمىز وتانداستارىمىزدىڭ جۇرەگىندە وشپەس اسەر قالدىرعان مادەني ءىس-شارالار كەشەنىن ۇسىندى. اتاپ ايتساق, سانكت-پەتەربۋرگ مەملەكەتتىك اكادەميالىق بالەت تەاترى بوريس ەيفماننىڭ گاسترولدەرى, اتى اڭىزعا اينالعان ماەسترو يۋري باشمەتتىڭ جەتەكشىلىگىمەن بۇكىلرەسەيلىك جاسوسپىرىمدەر وركەسترىنىڭ كونتسەرتى, ا.چەحوۆ اتىنداعى ماسكەۋ كوركەم تەاترىنىڭ گاسترولدەرى, سانكت-پەتەربۋرگ ونەر اكادەمياسىنىڭ «بەينەلەۋ ونەرى» كورمەسى, سانسىز شەبەرلىك سىنىپتارى, رەسەي تەاتر ونەرى ينستيتۋتىنىڭ ديپلومدىق قويىلىمدارىنىڭ كورسەتىلىمى جانە تاعى باسقالارى. سونداي-اق 13 جەلتوقساندا «قازاقكونتسەرت» ساحناسىندا س.زۆەرەۆ اتىنداعى ساحا رەسپۋبليكاسىنىڭ «كىىل ۋولا» ۇلتتىق بي تەاترى ءوز ونەرىن ۇسىنادى. مۇنىڭ ءبارى – ەكى ەل اراسىنداعى بەرىك دوستىق قارىم-قاتىناستىڭ كەپىلى, – دەگەن مادەنيەت جانە اقپارات ءمينيسترى ونەردىڭ ءارتۇرلى مادەني توپتاردى بايلانىستىرىپ, مادەنيەتارالىق ديالوگ پەن ءوزارا تۇسىنىستىكتىڭ دامۋىنا ىقپال ەتەتىن كوپىر ەكەندىگىن اتاپ ءوتتى. ا.بالاەۆانىڭ ايتۋىنشا, كەلەسى جىلى قازاقستاندا بەلگىلى مادەنيەت جانە ونەر قايراتكەرلەرىنىڭ, سونداي-اق تمد, گرۋزيا, بالتىق ەلدەرىنىڭ حالىقارالىق تەاتر فورۋمدارى, «ينتەرۆيدەنتسيا» تەلەۆيزيالىق جوباسى, ورتالىق ازيا ەلدەرىنىڭ حالىقارالىق تەاتر فەستيۆالى, «Operalia» وپەرا جانە بالەت ونەرى فەستيۆالى سياقتى رەسەيدىڭ جەتەكشى شىعارماشىلىق ۇجىمدارىنىڭ قاتىسۋىمەن بىرقاتار مادەني ءىس-شارا جوسپارلانعان.
– بۇگىن «ورىس ماۋسىمدارىنىڭ» سالتاناتتى جابىلۋى اياسىندا مۋزىكالىق ونەردى سۇيەتىندەر مەن كاسىبي ماماندارعا ارنالعان «ەكى استانا دۋەتى» گالا-كونتسەرتىن دميتري بەرتماننىڭ «گەليكون-وپەرا» ماسكەۋ مۋزىكالىق تەاترى «استانا وپەرا» مەملەكەتتىك وپەرا جانە بالەت تەاترىنىڭ ۇجىمىمەن بىرلەسىپ, ۆالەري كيريانوۆ پەن رۋسلان بايمۋرزين سىندى ەكى تاماشا ديريجەردىڭ جەتەكشىلىگىمەن ۇيىمداستىردى. بۇل كەشتىڭ ءمانى ايرىقشا. ويتكەنى مۋزىكالىق ونەر – بويىمىزداعى ەڭ نازىك جانە بيىك سەزىمدەردى وياتاتىن, اسىل ۇمىتتەر مەن ۇمتىلىستارعا شاقىراتىن ۇلكەن كۇش, – دەپ اتاپ ءوتتى ايدا عالىمقىزى.
«ورىس ماۋسىمدارى» قازاقستاندا ناۋرىز ايىندا كسرو حالىق ءارتىسى يۋري باشمەتتىڭ جەتەكشىلىگىمەن بۇكىلرەسەيلىك جاستار سيمفونيالىق وركەسترىنىڭ «چايكوۆسكي-گالا» باعدارلاماسىمەن اشىلعان بولاتىن. ءبىر جىلعا سوزىلعان ونەر دۋمانى «قوس استانا دۋەتى» كونتسەرتىمەن تۇيىندەلدى. كونتسەرتكە قوس ديريجەر – «گەليكون-وپەرانىڭ» باس ديريجەرى, ماسكەۋ سىيلىعىنىڭ لاۋرەاتى ۆالەري كيريانوۆ پەن «استانا وپەرا» تەاترىنىڭ ديريجەرى رۋسلان بايمۋرزين جەتەكشىلىك ەتتى.
ەلورداداعى تەاتر ساحناسىندا قازاقستاننىڭ ەڭبەك سىڭىرگەن قايراتكەرلەرى جۇپار عابدۋللينا, سالتانات احمەتوۆا, ازامات جىلتىركوزوۆ, مەدەت شوتاباەۆ, سونداي-اق رەسەيدەن كەلگەن حالىقارالىق بايقاۋلاردىڭ لاۋرەاتتارى يۋليا ششەرباكوۆا, ۆالەنتينا گوفەر, شوتا چيبيروۆ, ماكسيم پەرەبەينوس ونەر كورسەتتى.
چايكوۆسكي, ۆەردي, روسسيني, دارگومىجسكي, بيزە, پۋچچيني, وففەنباح وپەرالارىنان وتاندىق جانە شەتەلدىك جۇلدىزداردىڭ دۋەتتەرى ورىندالدى. سونداي-اق جۇرتشىلىق نازارىنا ا.جۇبانوۆتىڭ «اباي» وپەراسىنان ابايدىڭ ارياسى, ل.حاميدي مەن م.تولەباەۆتىڭ ء«بىرجان-سارا» وپەراسىنان دۋەت پەن حور جانە ت.ب. ۇسىنىلدى. گەليكوندىقتار العاش رەت قازاق تىلىندە ءان شىرقادى.
«ماسكەۋ مەن استانانىڭ شيرەك عاسىر بويى ىنتىماعى جاراسىپ كەلەدى. ال «گەليكون-وپەرا» مەن «استانا وپەرانى» تەك جۇمىس ەمەس, دوستىق قارىم-قاتىناس تا بايلانىستىرادى. ارتىستەرىمىزدىڭ «ورىس ماۋسىمدارى» جوباسىنا قاتىسقانىنا شەكسىز قۋانىشتىمىن. بۇل جوبا استانا تۇرعىندارىنا دەگەن شەكسىز ماحابباتىمىزدى جەتكىزۋگە مۇمكىندىك بەردى. سول سۇيىسپەنشىلىگىمىزدىڭ بەلگىسى دەپ قابىلداساڭىزدار دا بولادى, وزدەرىڭىز كۋا بولعانداي, گەليكوندىقتار العاش رەت قازاق تىلىندە ءان شىرقادى. قازاق ءتىلى وتە اۋەزدى بولعانىمەن, قيىن ءتىل ەكەن. اندەردى جاتتاۋدا ءبىراز قينالدىق. بىراق ناتيجەسى كوڭىلىمىزدى مارقايتتى. كورەرمەننىڭ دە كوڭىلىنەن شىقتى دەگەن سەنىمدەمىز», دەدى تەاتردىڭ باس ديرەكتورى ءارى كوركەمدىك جەتەكشىسى, رەسەيدىڭ حالىق ءارتىسى دميتري بەرتمان.
سونىمەن قاتار ايتۋلى ونەر فەستيۆالى اياسىندا «استانا وپەرا» تەاترىندا «ارت-ماسكاراد» اتتى تەاترلىق كيىمدەردىڭ ەكسكليۋزيۆتى كورمەسى ۇيىمداستىرىلدى. اتاقتى الەكساندر گولوۆين, لەۆ باكست, ميحايل لاريونوۆ جانە سەرگەي سۋدەيكيننىڭ جۇزجىلدىق تاريحى بار ەسكيزدەرى بويىنشا تىگىلگەن كوستيۋمدەر جۇرتشىلىق نازارىنا ۇسىنىلدى.
