ءماجىلىس دەپۋتاتى ەركىن ءابىلدىڭ ايتۋىنشا, ۇكىمەت ءتيىستى شەشىمدى 2024 جىلى قابىلداۋى مۇمكىن. قازىرگى ۋاقىتتا بۇل ماسەلە بويىنشا عالىمدار ءبىر توقتامعا كەلگەن. ولار قازاقستاننىڭ ءبىر ۋاقىت بەلدەۋىندە تۇرعانىن جاقتايدى.
«ەكى ۋاقىت بەلدەۋى بەلگىلى شامادا ءبىر ىڭعايسىزدىق تۋدىراتىنى راس. اسىرەسە, كولىك جانە لوگيستيكا ماسەلەلەرىنە كەلگەندە قيىندىقتار بولادى. بانكتە دە سونداي, جۇمىس ۋاقىتى باتىستا ءبىر ساعات بۇرىن اياقتالىپ جاتادى. باسقارۋ سالاسىندا دا, باقانداي ەكى ساعات جوعالتامىز. باتىستا جۇمىس كۇنى ءالى باستالماعان كەزدە, استانادا جۇمىس ۋاقىتى ءوتىپ جاتادى. كەرىسىنشە, باتىستا ءالى جۇمىس ۋاقىتى, ال استانادا جۇمىس كۇنى اياقتال قويعان. سونىمەن قاتار پويىزداردىڭ, ۇشاقتاردىڭ كەستەسى ءجىو-دە ايتارلىقتاي شىعىنعا اكەلەدى», - دەدى ماجىلىسمەن.
تەحنيكالىق رەتتەۋ جانە مەترولوگيا كوميتەتىنىڭ توراعاسى قۋانىش ەلىكباەۆتىڭ سوزىنشە, قازاقستاندى ءبىرتۇتاس ۋاقىت بەلدەۋىنە كوشىرۋ ءۇشىن الدىمەن ۇكىمەتتىڭ ءتيىستى قاۋلىسىنىڭ جوباسى دايىندالۋى كەرەك.
«زاڭعا سايكەس ول قوعامدىق تالقىلاۋ ءۇشىن «اشىق نقا» پورتالىنا ورنالاستىرىلادى, وندا ءاربىر قازاقستاندىق ءوز ۇستانىمىن بىلدىرەدى. وسىدان كەيىن عانا ۇكىمەت قاۋلىسى قابىلدانۋى مۇمكىن. مەرزىمىن ايتاتىن بولساق, بارلىق قىزمەتتەر مەن ازاماتتاردىڭ حاباردار بولۋى جانە مۇنداي وزگەرىسكە دايىن بولۋى ءۇشىن ءۇش ايدان اسپايتىن ۋاقىتتى الادى», - دەپ ءتۇسىندىردى ەلىكباەۆ.
