مارقۇمنىڭ جاقىن تۋىسى, پاۆلودار قالاسىنىڭ بۇرىنعى اكىمى قايرات نۇكەنوۆتىڭ ايتۋىنشا, قۋاندىق بيشىمباەۆ ۇيلەنەر الدىندا سالتانات نۇكەنوۆاعا «تەك مەشىتكە بارىپ نەكە قيدىرامىز» دەپ شارت قويعان.
«كورەمىز» باعدارلاماسىنا قوناق بولعان بۇرىنعى شەنەۋنىك قارىنداسىنا قاتىستى سول كەزدەگى احۋالدى بايانداپ بەردى. سالتانات ءبىر كۇنى پاۆلودارداعى شاڭىراعىنا ەرەكشە تولقىنىسپەن بارعان.
"ومىرلىك ماحابباتىن تاپقانىن ايتتى. جاستار ءبىر-ءبىرىن كەزدەستىرگەن سوڭ, ەكى جارتى - ءبىر ءبۇتىن بولۋدى قالاعاننان كەيىن اتا-اناسى قارسىلىق تانىتپادى. بىراق بيشىمباەۆتىڭ «زاڭدى نەكەگە تۇرمايمىز, تەك مەشىتكە بارىپ نەكە قيدىرامىز» دەگەن ءبىر شارتى بولدى. قازىرگى زامان سونداي, ەش قارسى بولمادىق, ەكەۋى سولاي كەلىسكەن ەكەن. سوندىقتان اتا-اناسى مەن ءبىزدىڭ تاراپتان ەشقانداي سۇراق تۋىندامادى", - دەيدى ول.
الايدا, مارقۇمنىڭ ءۇي ءىشى ول كەزدە قۋاندىق بيشىمباەۆتىڭ ەكى رەت وتباسىن قۇرعانىن بىلمەگەن. ولار بۇل بيشىمباەۆتىڭ ەكىنشى نەكەسى دەپ تۇسىنگەن.
"بىراق بۇرىن ەكى نەكەدە بولعانىن, ءۇشىنشى رەت ۇيلەنەيىن دەپ جاتقانىن بىلمەدىك. ەكىنشى جارى نازىمدى تەك باق بەتتەرىنەن تانيتىنبىز. بيشىمباەۆ نازىممەن زاڭدى تۇردە اجىراسقاندىقتان, قارىنداسىمىزدىڭ بولاشاق جارىمەن باس قوسىپ, بىرگە تۇرۋىنا اتا-اناسى ەش الاڭداماي, ءوز باتالارىن بەردى. ءبىرىنشى رەت كورگەندە سىرت كوزگە باقىتتى جۇپ سەكىلدى كورىندى. ءيا, بيشىمباەۆتىڭ بۇعان دەيىن سوتتالعانىن, تۇرمەدە وتىرىپ شىققانىن بىلدىك. بىراق ول بىزگە شىققان سوڭ مەيىرىمدى, اقجارقىن بولىپ كورىندى", - دەدى ول.
