ماسەلەن, 12,7 ملن گا پروبلەمالى جەرلەر بويىنشا ناقتى شەشىمدەر قابىلداندى: 2022 جىلدىڭ باسىنان بەرى 9,5 ملن گا مەملەكەت مەنشىگىنە قايتارىلدى, جەر پايدالانۋشىلار 3,2 ملن گا جەردى يگەرۋگە كىرىستى.
اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنىڭ اۋماقتىق بولىمشەلەرى جەر پايدالانۋشىلارعا قاتىستى (جالپى الاڭى 2,1 ملن. گا) جوسپاردان تىس 1 174 تەكسەرۋ جۇرگىزدى. ناتيجەسىندە:
- جەر زاڭناماسىن بۇزۋشىلىقتاردى جويۋ تۋرالى 1,45 ملن گا الاڭعا 852 ۇيعارىم شىعارىلدى;
- سوت ورگاندارىنىڭ قاراۋىندا 553,3 مىڭ گا الاڭدا 209 ماتەريال بار.
سونداي-اق 2022 جىلدىڭ باسىنان بەرى 836,5 مىڭ گا اۋىل شارۋاشىلىعى ماقساتىنداعى جەرلەردى بەرۋ بويىنشا اكىمدىكتەردىڭ 566 زاڭسىز شەشىمى انىقتالدى. ونىڭ ىشىندە 153 شەشىمنىڭ كۇشى جويىلسا, قالعان 413 شەشىمنىڭ كۇشىن جويۋ بويىنشا جۇمىستار جۇرگىزىلىپ جاتىر.
كوميسسيا وتىرىسىندا جەردى قايتارۋ كولەمى جوسپارلانعاننان ايتارلىقتاي تومەن وڭىرلەر تىڭدالدى. بۇل باعىتتاعى جۇمىستى كۇشەيتۋ تاپسىرىلدى.
«مەملەكەت باسشىسى 2023 جىلدىڭ سوڭىنا دەيىن جالپى اۋدانى 10 ملن گەكتاردى قۇرايتىن زاڭ بۇزۋشىلىقتارمەن بەرىلگەن نەمەسە پايدالانىلماي جاتقان جەرلەر بويىنشا ناقتى شەشىمدەر قابىلداۋ مىندەتىن قويدى. پرەزيدەنتتىڭ تاپسىرماسى ورىندالۋدا, ونىڭ 9,5 ملن گەكتارى مەملەكەت مەنشىگىنە قايتارىلدى. سونىمەن قاتار جەر پايدالانۋشىلار قوسىمشا 3,2 ملن گەكتاردى اينالىمعا ەنگىزۋگە ءماجبۇر بولدى – قازىر بارلىعى 12,7 ملن گەكتار جەر پايدالانۋدا. الدىڭعى قاتارلى وڭىرلەر ەسەبىنەن ناتيجەگە قول جەتكىزىلدى, الايدا بەلگىلەنگەن كورسەتكىشتەردەن 30%-دان 50%-عا دەيىن ارتتا قالعان ايماقتار بار. جۇمىستى كەلەسى جىلى دا جالعاستىرامىز, بىراق ءبىز جەردى يگەرۋگە باسا نازار اۋدارامىز. ول ءۇشىن قاجەتتى كريتەريلەر ازىرلەنەتىن بولادى», دەپ تۇيىندەدى ءسوزىن س.جۇمانعارين.
