الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆتىڭ سوزىنشە, الماتىدا 56 مىڭ مۇمكىندىگى شەكتەۋلى ازامات بار. ولاردىڭ 700-دەن استامى ءتۇرلى سالادا جۇمىس ىستەيدى. بيىل ولاردى قولداۋ ماقساتىندا ينۆاتاكسي جوباسى, قالاداعى بۇكىل نىسانداردا مۇمكىندىگى شەكتەۋلى جاندارعا قولايلى جاعداي جاساۋ ءۇشىن پاسپورتتاۋ جوباسى جۇزەگە اسا باستادى.
«ينكليۋزيۆتى قوعام, ينكليۋزيۆتى ەكونوميكا قۇرىپ جاتىرمىز. ينكليۋزيۆتى ينفراسترۋكتۋرا قۇرىپ جاتىرمىز. ءار ادام ءوزىنىڭ كوزقاراسىن وزگەرتسە, وندا مۇگەدەكتىگى بار جاندار ەشقانداي ءوزىنىڭ شەكتەۋىن سەزىنبەيدى. بىزبەن قاتار قوعامدا ءومىر سۇرەدى, جۇمىس ىستەيدى, بەلسەندى بولادى. مۇمكىندىكتەر فورۋمى دەگەن شارانىڭ باستى ماقساتى وسى»,- دەيدى باۋىرجان جاۋباسوۆ.
الماتى مۇگەدەكتەر قوعامى توراعاسىنىڭ ورىنباسارى ۇلان ىڭكاربەكوۆ ءبىزدىڭ قوعامداعى ەڭ ۇلكەن ماسەلەلەردىڭ ءبىرى اربادا وتىرعان ادامداردىڭ ۇيىنەن شىعا الماۋى ەكەنىن جەتكىزدى.
ء«ار ۇيدە 6 باسپالداق بار. ارباعا تاڭىلعان جاندار ەمىن-ەركىن ۇيدەن شىعا المايدى. شەتەلمەن سالىستىرعاندا, ولاردا كەدەرگى دەگەن ۇعىم جوق. دامىعان مەملەكەتتەردە الەۋمەتتىك ماسەلە جاقسى قارالعان. ال بىزدە ەندى سالىنىپ جاتقان ۇيلەردىڭ بارىندە مۇمكىندىگى شەكتەۋلى جاندارعا بارشا مۇمكىندىك قاراستىرىلىپ جاتىر. بۇگىن كوپتەگەن تاقىرىپ كوتەرىلدى. جينالىس سوڭىندا وسى ماسەلەلەردى قابىلدايمىز», - دەيدى ول.
شاراعا وتاندىق جانە شەت ەلدىك ۇكىمەتتىك ەمەس ۇيىممەن قاتار مەملەكەتتىك سەكتور وكىلدەرى دە قاتىستى.
