سوتتالۋشى مەكتەپكە مۇعالىم بولىپ جۇمىسقا ورنالاسقىسى كەلگەن تۇرعىننان تانىسى ارقىلى اقشا العان.
ىرعىز اۋداندىق ءبىلىم ءبولىمىنىڭ باسشىسى ايبەك الدانوۆقا «پارا الۋ», ال ونىڭ تانىسى ايدار ماحانبەتوۆكە «پارا بەرۋ» بابى بويىنشا ايىپ تاعىلدى. ءىس ماتەريالىنا سۇيەنسەك, 2023 جىلى قىركۇيەك ايىندا ا.ماحانبەتوۆكە تۋىسى كەلىپ, ايەلىن اۋىلداعى ورتا مەكتەپكە جۇمىسقا ورنالاستىرۋ ءۇشىن كومەكتەسۋىن سۇرايدى.
ءوز كەزەگىندە سوتتالۋشى ا.ماحانبەتوۆ تاۋىسى ءارى ىرعىز اۋداندىق ءبىلىم ءبولىمىنىڭ باسشىسى ايبەك الدانوۆقا حابارلاسىپ, ايەلدى مەكتەپكە جۇمىسقا قابىلداۋعا ءوتىنىش بىلدىرگەن. سول كەزدە ايبەك الدانوۆ ءوز قىزمەتىن پايدالانىپ, مەكتەپ ديرەكتورىنا ءوزى اتاعان ادامدى مۇعالىم رەتىندە جۇمىسقا قابىلداۋعا تاپسىرما بەرەدى. سول ءۇشىن دە پارا رەتىندە 400 000 تەڭگە تالاپ ەتكەن.
«ا.ماحانبەتوۆ ءىسىنىڭ زاڭسىز ەكەنىن بىلە تۇرا ايبەك الدانوۆقا دەلدال بولۋعا كەلىسىپ, اتالعان قاراجاتتى قولما-قول تۇردە بەرگەن. سوت وتىرىسىندا سوتتالۋشىلار تاعىلعان ايىپتى مويىندادى. پروكۋرور سوتتان بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ, ايبەك الدانوۆتى 3 جىل 6 ايعا, ماحانبەتوۆتى 1 جىل 6 ايعا باس بوستاندىعىنان ايىرۋ جازاسىن تاعايىنداۋدى سۇرادى. جازا تاعايىنداۋ كەزىندە ايبەك الدانوۆتىڭ مۇگەدەك بالاسى بار ەكەنى, شىن جۇرەكتەن وكىنەتىنى, قىلمىستىق قۇقىق بۇزۋشىلىقتى اشۋعا كومەكتەسكەنى ەسكەرىلدى. جازانى اۋىرلاتاتىن ءمان-جايلار انىقتالعان جوق. سوتتىڭ ۇكىمىمەن سوتتالۋشىلار كىنالى دەپ تانىلىپ, مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرىلا وتىرىپ, الدانوۆتى 3 جىل, ماحانبەتوۆتى 1 جىل مەرزىمىنە باس بوستاندىعىنان ايىرۋ جازاسى تاعايىندالدى. سوت ۇكىمى زاڭدى كۇشىنە ەنگەن جوق. سونىمەن قاتار, اقتوبە وبلىستىق ءبىلىم باسقارماسى باسشىسىنىڭ اتىنا جەكە قاۋلى شىعارىلدى,- دەپ حابارلادى ىرعىز اۋدىندىق سوتىنىڭ ءباسپاسوز قىزمەتى.
