كوكسۋ اۋدانىنىڭ ورتالىعى بالپىق بي اۋىلىندا ونداعان مىڭ حالىق تۇرادى. ماڭايداعى اۋىلداردا اسا الىس ەمەس. كوبىنە حالىق ورتالىققا كەلىپ ەمدەلگەندى ءجون سانايدى. وسى رەتتە حالىقارالىق ستاندارتقا سايكەس اۋدان تۇرعىندارىنا مەديتسينالىق كومەك كورسەتۋدىڭ ساپاسىن جاقسارتۋ ماقساتىندا اشىلعان ورتالىقتىڭ حالىققا تيگىزەر پايداسى زور.
ءىس-شارادا اۋدان اكىمىنىڭ مىندەتىن اتقارۋشى ەرجان شالقىبەكوۆ مۇنداي ۇزدىك تاجىريبەلىك ورتالىقتاردىڭ ماڭىزى زور ەكەنىن ايتىپ, اۋدان جۇرتشىلىعىن سالاماتتى ءومىر سالتىن ۇستانۋعا شاقىردى.
ء«بىز حالىققا قىزمەت ەتىپ قانا قويماي, دەنساۋلىق ساقتاۋ سالاسىنداعى ءبىلىمىن دە ارتتىرۋىمىز كەرەك. اۋدان تۇرعىندارىنىڭ دەنى ساۋ بولۋى ءۇشىن اق حالاتتى ابزال جاندارعا ارتىلاتىن جۇك اۋىر. مۇنداي ورتالىقتار بىزدە كوپ بولۋى كەرەك. وسى باعىتتاعى جۇمىستار ودان ءارى جالعاسىن تابادى. ەڭ باستىسى, اۋىرمايتىن جول ىزدەپ, سالاماتتى قازاق سانىن ارتتىرايىق», دەدى ە.شالقىبەكوۆ.
«Primary Health Care» ۇلتتىق قاۋىمداستىعىنىڭ پرەزيدەنتى, مەديتسينا عىلىمدارىنىڭ دوكتورى, پروفەسسور تولەباي راحىپبەكوۆ مۇنداي ورتالىقتار دۇنيەجۇزىلىك دەنساۋلىق ساقتاۋ ۇيىمىنىڭ ۇزدىك ادىستەمەسى بويىنشا ىسكە اسىرىلىپ جاتقانىن ايتىپ, اۋدان جۇرتشىلىعىن قۇتتىقتاپ, دارىگەرلەر جۇمىسىنا ساتتىلىك تىلەدى.
«قالاداعى ايتۋلى ەمحانالاردىڭ اۋىلدىق جەردەگى اۋرۋحانالاردان ايىرماشىلىعى بولماۋى كەرەك. ءبىز قازىر سىرتتاعى بىلىكتى ماماندارعا ۇسىنىس تاستاپ, ىسىنە ادال جاستاردى جۇمىسقا الدىق. ەمحانامىزدا زامان تالابىنا ساي ءتۇرلى دەرتتى انىقتايتىن قۇرىلعىلار بار. قازىر حالىققا شاما-شارقىمىزشا كومەك كورسەتىپ جاتىرمىز. جاقىندا ۇلتتىق اككرەديتتىڭ ءبىرىنشى ساناتىن الدىق. جاڭا اشىلعان ورتالىق حالىققا دا, اق حالاتتى ابزال جاندارعا دا جاڭا مۇمكىندىك سىيلايدى», دەيدى اۋرۋحانا باسشىسى جاننۇر سىرىموۆ.
«ۇزدىك تاجىريبە ورتالىعى» اشىلعالى ەمحانا قۇرىلىمىنا كوپتەگەن وڭ وزگەرىس ەنگىزىلدى. اتاپ ايتقاندا, ەمحانادا وزىنە-ءوزى قىزمەت كورسەتۋ بۇرىشى, حالىق كەڭەسى, ترەنينگ ورتالىقتارى, پاتروناجدىق قىزمەتتىڭ امبەباپ-پروگرەسسيۆتى مودەل بولمەسى, دەنساۋلىق مەكتەپتەرى جانە وتباسىلىق مەديتسينانىڭ جاڭا مودەلى ءوز جۇمىسىن جۇيەلى جۇرگىزىپ كەلەدى. ورتالىق جۇمىسىنىڭ ناتيجەسىندە جاڭا مەديتسينالىق-الەۋمەتتىك كومەكتىڭ قولجەتىمدىلىگى مەن ساپاسى جاقسارماق. سونىمەن قاتار اۋدان تۇرعىندارىنىڭ سالاماتتى ءومىر سالتىن ۇستانۋىن ارتتىرۋعا زور ىقپال ەتەدى.
ءىس-شارا سوڭىندا جينالعان كوپشىلىك ورتالىقتىڭ جۇمىسىمەن تانىسىپ, ارنايى اشىلعان كابينەتتەردى ارالاپ, دارىگەرلەر جۇمىسىمەن تانىستى.
