دەنساۋلىق ساقتاۋ ۆيتسە-ءمينيسترى ۆياچەسلاۆ دۋدنيك فورۋمنىڭ استانا مەديتسينا ۋنيۆەرسيتەتىنىڭ بازاسىندا ءوتۋى كەزدەيسوق ەمەس ەكەنىن ايتتى. ءيا, راسىندا, وزىق ويلى, قارىمدى جاستار لەگى ەلدىڭ دەنساۋلىق ساقتاۋ جۇيەسىن دامىتاتىن قوزعاۋشى كۇش سانالادى. مەديتسينا سالاسىنا كەشە كەلگەن ماماندار ەرتەڭ مەديتسينالىق عىلىمي ورتالىقتار مەن ۇيىمداردى باسقارادى. پاتسيەنت قابىلداپ, مىڭداعان ادامنىڭ ءومىرىن ساقتاپ قالۋعا كۇش سالادى. ۆياچەسلاۆ دۋدنيك سالانىڭ ۇزدىگى اتانۋدى كوزدەگەن جاستارعا ساپالى ءبىلىم الىپ, ۇنەمى تاجىريبە شىڭداپ وتىرۋعا كەڭەس بەردى.
ددۇ ەۋروپالىق ايماقتىق بيۋروسىنىڭ ديرەكتورى حانس كليۋگە فورۋمعا ونلاين قوسىلىپ, قۇتتىقتاۋ ءسوز سويلەدى.
– استانا مەديتسينا ۋنيۆەرسيتەتىندە جىل سايىن دۇنيەجۇزىلىك دەنساۋلىق ساقتاۋ ۇيىمىنىڭ قاتىسۋىمەن ماڭىزدى ءىس-شارالار ءوتىپ تۇرادى. ءبىز وسىعان قۋانىشتىمىز. سەبەبى سالادا كادر دايارلاۋ ءىسى ۇدايى جاڭارىپ, جاھاندىق ۇدەرىستەرگە ورايلاستىرۋعا ءتيىس. دەنساۋلىق ساقتاۋ سالاسىنداعى جاس كوشباسشىلاردىڭ فورۋمى – ددۇ قولدايتىن «جاستاردى جاھاندىق جۇمىلدىرۋ» قوزعالىسىنا قوسۋعا بولاتىن تاعى ءبىر ءىس-شارا, –دەدى ح.كليۋگە.
ددۇ-نىڭ قازاقستانداعى ەلدىك كەڭسەسىنىڭ باسشىسى سكەندەر سىلا ەلدەگى 30 جاسقا دەيىنگى حالىقتىڭ ۇلەسى ددۇ-نىڭ ەۋروپالىق وڭىرىندەگى ەڭ جوعارى ۇلەستىڭ ءبىرى ەكەنىن, ءاربىر ەكىنشى ادام 30 جاسقا تولماعانىن اتاپ ءوتتى. ول ەلىمىزگە قوعامدىق دەنساۋلىق ساقتاۋداعى يننوۆاتسيالار كەرەك ەكەنىن ەسكە سالدى. بۇعان قوسا ددۇ-نىڭ ەۋروپالىق ايماقتىق بيۋروسى جاستاردى تىڭداۋعا ءارى ولارمەن ءوزارا بايلانىس ورناتۋعا دايىن ەكەنىن جەتكىزدى. كوپ ۇزاماي سكەندەر سىلا استانادا وتكەن العاشقى مەديتسينالىق-سانيتارلىق كومەك جونىندەگى حالىقارالىق كونفەرەنتسيانى ۇيىمداستىرۋعا كومەك كورسەتكەن استانا مەديتسينا ۋنيۆەرسيتەتىنىڭ ستۋدەنتتەرىنە العىسحات تابىستادى. ول ءسوزىن تۇيىندەي كەلە, فورۋمنىڭ سالاداعى جاس كوشباسشىلار ءۇشىن وزەكتى ماسەلەلەردى تالقىلاپ, يننوۆاتسيالىق شەشىمدەر ۇسىناتىن ورىنعا اينالاتىنىنا سەنىم ءبىلدىردى.
فورۋمدا «ۇلتتىق عىلىمي مەديتسينالىق ورتالىق» اق باسقارما توراعاسى اباي بايگەنجين جاستاردى ءار كەز بەلسەندى ءارى سالانىڭ شىڭدالعان كاسىبي مامانى بولۋعا شاقىردى. ىزىنشە دەنساۋلىق ساقتاۋ سالاسىنداعى جاس كوشباسشىلار قاۋىمداستىعى توراعاسى, استانا مەديتسينا ۋنيۆەرسيتەتىنىڭ كلينيكالىق جۇمىس جونىندەگى پرورەكتورى مەرۋەرت گازاليەۆا «دەنساۋلىق ساقتاۋ جۇيەسىن قالىپتاستىرۋداعى جاس كوشباسشىلار قاۋىمداستىعىن ۇيىمداستىرۋ تاجىريبەسى» تاقىرىبىندا بايانداما وقىدى. ال پانەلدىك پىكىرتالاستار مەن سەسسيالار بارىسىندا دەنساۋلىق ساقتاۋ سالاسىنداعى وزەكتى تاقىرىپتار, وزىق تاجىريبەلەر تالقىلاندى. سونىڭ ىشىندە دەنساۋلىق ساقتاۋداعى تسيفرلاندىرۋ مەن SMART- تەحنولوگيالارعا ەرەكشە نازار اۋدارىلدى. وسىلايشا, دەنساۋلىق ساقتاۋ سالاسىنداعى جاس كوشباسشىلار قاۋىمداستىعى تاجىريبەلى ماماندارمەن اشىق پىكىرلەستى. بۇل قادام كەلەشەكتە يننوۆاتسيالىق يدەيالاردى جۇزەگە اسىرۋعا ىنتالاندىرۋ بولادى دەپ سەنەيىك.
