فوتو: الماتى قالاسى اكىمىنىڭ ءباسپاسوز قىزمەتى
قالا اكىمىنىڭ ءباسپاسوز قىزمەتىنىڭ مالىمەتىنشە ايالدامانىڭ شاتىرى اليۋمينيمەن جابىلعان, مەتالل جاقتاۋ اعاشپەن قاپتالعان. بارلىق اعاش ەلەمەنتتەر وتقا ءتوزىمدى, سۋ وتكىزبەيتىن جانە ارنايى قۇرالدارمەن وڭدەلگەن. ۇزىندىعى 18 مەتر ورىندىق قويىلعان.
ساراپشىنىڭ سوزىنشە, جاڭا ايالدامانىڭ باستى ارتىقشىلىعىنىڭ ءبىرى - سىيىمدىلىق.
«مۇنداي ايالداما تۋرالى سەنىمدى تۇردە «ادامدار ءۇشىن جاسالعان» دەپ ايتۋعا بولادى. ياعني, قانداي دا ءبىر ستاندارتتى جوبا عانا ەمەس, ازاماتتاردىڭ قاجەتتىلىكتەرى ەسكەرىلگەن. كەز كەلگەن اۋا رايىندا مۇندا كوپتەگەن ادامدار جايلى ورنالاسا الادى», دەدى ديدار شاجاليەۆ.
ايالدامانى جوندەۋ اۋداننىڭ ايالداما كەشەندەرىن ۇستاۋعا بولىنگەن قاراجات ەسەبىنەن جۇرگىزىلدى.
تاعى ءبىر ايتا كەتەر اقپارات, جولاۋشىلار اعىنىن ساراپتاۋ ناتيجەسىندە الماتى مەتروپوليتەنىندە جىلجىمالى قۇرام سانى كوبەيتىلدى. ەندى قاربالاس ۋاقىتتا 11 قۇرام 5 مينۋت 38 سەكۋند جيىلىكپەن قىزمەت كورسەتەدى.
وقۋ جىلى باستالعاننان جولاۋشىلار اعىنى 70 مىڭنان 90 مىڭعا دەيىن كوبەيگەن. تالداۋ ناتيجەسىندە جەلىگە قوسىمشا قۇرام شىعارۋ تۋرالى شەشىم قابىلدانعان. ءار قۇرام جالپى سىيىمدىلىعى 900 ادامنان اساتىن 4 ۆاگوننان تۇرادى.
ەسكە سالايىق, الماتى مەتروپوليتەنى 2011 جىلعى 1 جەلتوقساندا ىسكە قوسىلعان, قازىرگى كەزدە 11 ستانتسيا بار. ءارى قاراي 4 ستانتسيانىڭ قۇرىلىسى بويىنشا جۇمىستار جۇرگىزىلىپ جاتىر.
