ۇندەۋ ءماتىنى الەۋمەتتىك جەلىدە جاريالاندى.
"قۇرمەتتى قاسىم-جومارت كەمەل ۇلى! نۇكەنوۆا سالتاناتتىڭ تۋعان-تۋىستارى مەن جاقىندارى قىزىمىزدىڭ قايعىلى ولىمىنە قاتىستى قىلمىستىق ءىستى تەرگەۋ بارىسىندا ادىلدىكتىڭ ساقتالۋىن قاداعالاعانىڭىز ءۇشىن سىزگە ەرەكشە العىسىن بىلدىرەدى.
دەگەنمەن, كۇدىكتىنىڭ تۋىستارى ولاردىڭ بايلانىستارى مەن ماتەريالدىق جاعدايى بيشىمباەۆقا تاعى دا جازادان قۇتىلۋعا مۇمكىندىك بەرەتىنىن اشىق ايتىپ وتىر.
بەلگىلى بولعانداي, بۇرىنعى ۇلتتىق ەكونوميكا ءمينيسترى قۋاندىق بيشىمباەۆ سىبايلاس جەمقورلىق جاسادى دەگەن ايىپپەن 10 جىلعا باس بوستاندىعىنان ايىرىلىپ, بىراق 2 جىلدان كەيىن شارتتى تۇردە بوساتىلدى.
ءبىزدىڭ قازىرگى جاعدايدا دا ونىڭ جاقىن تۋىستارى – سونىڭ ىشىندە اناسى نۇرلىبەكوۆا الميرا بالتابايقىزى ۇلىن بوستاندىققا شىعارىپ, قىلمىستىق جازادان الىپ تاستاۋ ءۇشىن بارلىق ادىستەر مەن جولداردى, سونىڭ ىشىندە اقشانى پايدالانۋى مۇمكىن دەگەن نەگىزدى پىكىرىمىز بار. بىرقاتار كومپانيالاردىڭ باسشىسى, سونىمەن قاتار بىرنەشە كوممەرتسيالىق م ۇلىكتەرگە يە بولا وتىرىپ, ول وراسان زور قارجىلىق كۇشكە يە”, – دەلىنگەن اكەنىڭ حاتىندا.
نۇكەنوۆانىڭ اكەسىنىڭ پىكىرىنشە, مەملەكەتتىك قىزمەتشىلەردىڭ كىرىسى مەن مۇلكى تۋرالى دەكلاراتسيا سىبايلاس جەمقورلىقپەن كۇرەستە مۇلدەم دارمەنسىز. ونىڭ ايتۋىنشا, بيشىمباەۆ زاڭسىز جولمەن الىنعان م ۇلىكتەرىن اناسىنا تىركەپ قويعان.
"سىبايلاس جەمقورلىققا قارسى ۇلتتىق بيۋرو 19 قازان كۇنى سىبايلاس جەمقورلىققا قاتىسى بار دەگەن كۇدىككە ىلىنگەن بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ ىسىنە قاتىستى مالىمدەمە جاسادى. تەرگەۋدىڭ مالىمەتىنشە, اتىشۋلى ءىس بويىنشا ايىپتالۋشىلاردىڭ كوپشىلىگى ءوز كىناسىن مويىنداپ, مەملەكەتكە 1,2 ميلليارد تەڭگە كولەمىندە شىعىندى وتەگەن.
الايدا ەكس-مينيستر قۋاندىق بيشىمباەۆتىڭ اناسى الميرا نۇرلىبەكوۆا بۇل سوزبەن كەلىسپەيدى. بۇل تۋرالى ول informburo.kz سايتىنا بەرگەن سۇحباتىندا ايتتى. جەمقور شەنەۋنىكتىڭ اناسىنىڭ ايتۋىنشا, الميرا نۇرلىبەكوۆا بالاسىنا قارىزعا اقشا بەرگەن, ونىڭ راستايتىن قۇجاتتارى بار.
وسى جەردە سۇراق تۋىندايدى: ا.نۇرلىبەكوۆا كوممەرتسيالىق جىلجىمايتىن م ۇلىك وبەكتىلەرىن, ءساندى كولىكتەرىن, جالپى قۇنى ونى دوللارلىق ميلليونەرلەر قاتارىنا قوساتىن سونشاما كوپ اقشانى قايدان العان؟”, – دەلىنگەن ۇندەۋدە.
ونىڭ پىكىرىنشە, بيشىمباەۆتىڭ اناسىنىڭ بارلىق مۇلكى ۇلىنىڭ حالىقتان ۇرلاعان سىبايلاس جەمقورلىق اقشاسىنا ساتىپ الىنعان بولۋى مۇمكىن.
"جوعارىدا ايتىلعاندارعا سۇيەنە وتىرىپ, سۇرايمىن:
- ەكونوميكالىق تەرگەۋ باسقارماسىنا تەكسەرۋ جۇرگىزىپ, نۇرلىبەكوۆا الميراعا جانە بيشىمباەۆ ق-نىڭ بارلىق جاقىن تۋىستارىنا تيەسىلى م ۇلىكتىڭ شىعۋ كوزىن انىقتاۋدى تاپسىرسىن.
- نۇرلىبەكوۆا ا.ب.نىڭ م ۇلىكتەرى زاڭسىز قاراجاتقا ساتىپ الىنعانى راستالعان جاعدايدا قازاقستان رەسپۋبليكاسى قىلمىستىق كودەكسىنىڭ 218-بابى بويىنشا قىلمىستىق ءىس قوزعالسىن;
- قىلمىستىق جولمەن الىنعان بارلىق م ۇلىكتى مەملەكەت پايداسىنا تاركىلەۋ ماسەلەسى كوتەرىلسىن”, – دەلىنگەن حاتتا.
