الدىڭعى اربا قالاي جۇرسە, سوڭعى اربا سولاي جۇرەدى دەۋگە بولاتىنداي. كوكسۋ اۋدانىنا قاراستى مۇقانشى اۋىلدىق وكرۋگىنە تيەسىلى شاعىن عانا جەتىجال اۋىلىنىڭ مىڭنان استام تۇرعىنى بار. ءتۇتىنى ءتۇزۋ ۇشقان اياداي ەلدى مەكەننىڭ ابىرويىن ەكى قاباتتى ءبىلىم ورداسى اسقاقتاتىپ تۇر. جاقىندا عانا ءوڭىر كولەمىندە جۇزدەگەن مەكتەپتىڭ ىشىندە وق بويى وزا شاۋىپ, ءبىلىم ايدىنىنداعى جان-جاقتى قابىلەتىمەن توپ جارىپ, «ۇزدىك اۋىل مەكتەبى – 2023» بايقاۋىنىڭ جەڭىمپازى اتاندى. مەكتەپ ديرەكتورى ادىلەت نۇرعاليەۆ بۇل دودادا ارىپتەستەرىمەن بىرلەسە جاڭاشىل يدەيالارىمەن كوپتى تاڭداي قاقتىرعان. الاقانداي مەكتەپتىڭ ءار سالاداعى جەتىستىكتەرى ۇلكەن ءبىلىم وردالارىنا ونەگە بولىپ وتىر.
«مەنىڭ وسى ءبىلىم ورداسىنا كەلگەنىمە 5 جىل بولدى. الماتىدا وقىپ, جۇمىس ىستەگەننەن كەيىن كىشكەنتاي اۋىلعا ۇيرەنىسۋ وتە قيىن. دەگەنمەن تۋعان توپىراققا دەگەن ماحابباتىم وسىندا جەتەلەپ كەلدى. اۋەلدە 30-عا تولماعان ماماندى كوبى ءالى بىلىكتىلىگى تومەن دەپ سانايتىنى انىق. ايتسە دە ۇجىمنىڭ ءتىلىن تاۋىپ, ساپالى ءبىلىم بەرۋ تاسىلىنە كوشتىك. جاڭادان ماماندار الدىق, تاپشى كادرلاردى تالدىقورعاننان ارنايى قاتىناپ ىستەۋگە كوندىردىك. مەكتەپكە قاجەتتى زاتتاردى ۇجىممەن اقىلداسىپ, بىرلەسىپ ساتىپ الدىق», دەيدى ءا.نۇرعاليەۆ.
ونىڭ ايتۋىنشا, جاڭادان كەلگەن جاس مامان ءوزى قىزمەت ەتەتىن ءبىلىم ورداسىنا شاما-شارقىنشا سىيلىق جاسايدى ەكەن. سول ارقىلى ۇجىم وسى كۇنگە دەيىن مەكتەپ ءىشىن بەزەندىرىپ, سىنىپتى وقۋشىلارعا قاجەت وقۋ قۇرالدارىمەن تولىقتاي تولتىرىپ ۇلگەرگەن. ءتىپتى اسحانا قابىرعاسىنا ادەمى كارتينالار جابىستىرىپ, مەكتەپتىڭ كىرە-بەرىسىنە وقۋشىلاردىڭ جەتكەن جەتىستىكتەرىن كورسەتەتىن ماتەريالداردى ماقتانىشپەن ءىلىپ قويعان. ءار بالانى ەسىمىمەن اتاپ, ءبىلىم دەڭگەيىن ۇنەمى باقىلاۋدا ۇستايتىن ديرەكتوردىڭ ءىسى كوڭىلگە قۋانىش سىيلايدى.
جالپى, جەتىجال مەكتەبىنىڭ ىرگەسى 1971 جىلى قالانعان. جارتى عاسىردان اسقان نىسانعا 2013 جىلى كۇردەلى جوندەۋ جۇمىستارى جۇرگىزىلگەن. ءبىلىم ورداسىندا 19 كابينەت, 320 ورىندىق بار. زامان تالابىنا ساي بارلىق قۇرال-جابدىقپەن جابدىقتالعان. جەتپەگەنىن اۋىل ازاماتتارى مەن اتا-انالاردىڭ كومەگىمەن تولىقتىرعان. بۇگىندە مەكتەپتە 27 مۇعالىم, 16 كىشى قىزمەتكەر جۇمىس ىستەيدى. «ديپلوممەن – اۋىلعا» باعدارلاماسى بويىنشا 7 مۇعالىمگە كوتەرمە جاردەماقى جانە ءۇي بەرىلگەن. سونىڭ ءبىرى ماتەماتيكا ءپانىنىڭ ۇستازى التىناي اۋبەك قازىر كەلەر جىلعى تۇلەكتەردى ۇلتتىق بىرىڭعاي تەستىلەۋگە دايارلاپ جاتىر.
«وقۋشىنىڭ جان سىرىنا ءۇڭىلىپ, ونىڭ تابيعاتىنا ساي ارەكەت ەتۋ – ۇستازدىڭ مىندەتى. ماتەماتيكا – ەڭ قيىن پاندەردىڭ ءبىرى, ايتسە دە شاكىرتتەرىمىز بىرىنەن ءبىرى قالماي ەڭبەكتەنەدى. مەن باعاعا ءادىلمىن, 4-پە, 4-ءىن قويىپ بەرەمىن, كوتەرمە باعا قويمايمىن. مۇنى ديرەكتورىمىز دا قولداپ وتىر. اۋىلدان تۇلەگەن جاستاردىڭ كوبى مەملەكەتتىك گرانتقا ءتۇسىپ, ابىرويىمىزدى كوتەرىپ ءجۇر. وسى اۋىلدان ءۇي الىپ, مەملەكەتتىڭ قولداۋىمەن جۇمىسىمىز دا جۇيەلەندى», دەيدى ا.اۋبەك.
ايتپاقشى, بىلتىرعى, ارعى جىلعى تۇلەكتەردىڭ 80 پايىزى مەملەكەتتىك گرانتتى ۇتىپ العان. ءتىپتى وسى مەكتەپتى ءبىتىرىپ, ديپلوممەن كەلگەن جاس ماماندار دا بار. مىسالى, بيىل 11-سىنىپتا 12 وقۋشى وقىسا, ونىڭ 1-ەۋى التىن بەلگى, 4-ەۋى – ۇزدىك اتتەستاتقا ۇمىتكەر. رەسپۋبليكالىق, وبلىستىق, اۋداندىق ءبىلىم بايگەلەرىندە, سپورتتىق جارىستاردا جەتىجالدىق ورەندەر تۇعىر تورىنەن ءجيى كورىنەدى.
مەكتەپتە اتا-انالارمەن جۇمىس ىستەيتىن ارنايى ورتالىق بار. وندا پەداگوگتەر اپتا سايىن جينالىس وتكىزەدى. تالىمگەرلەر بالالارىنىڭ وقۋ دەڭگەيىن عانا بايانداپ قويماي, پسيحولوگيالىق ساباقتار دا جۇرگىزىلەدى. ءارتۇرلى تانىمدىق ويىن ويناتىپ, بالا, اتا-انا, مۇعالىم اراسىنداعى ۇشتىك بايلانىستى نىعايتۋعا كۇش سالادى. بۇل ءوز كەزەگىندە سىرتتان كەلگەن قاۋىپتى اقپاراتتارعا توسقاۋىل بولىپ, وقۋشىنىڭ جانسارايىن اشادى.
«ۇستاز بولۋ – ۇلكەن جاۋاپكەرشىلىك. جەتىجال مەكتەبىندە مەنىڭ 3 بالام وقيدى. ارقايسىسى ءبىر الەم, سول الەمگە جول تابا بىلگەن پەداگوگتەرگە العىسىم شەكسىز. ديرەكتوردىڭ ەڭبەگى زور, بىلىكتى ۇستازداردىڭ ساباق بەرۋ ءادىسى كوڭىل سۇيىندىرەدى. اسىرەسە اتا-انالارمەن اشىق سۇحباتقا ءتۇسىپ, بالامىزدىڭ ءبىز بىلمەيتىن قىرىن اشىپ جاتىر», دەيدى اۋىل تۇرعىنى اراي ەرمەكقىزى.
ەڭ عاجابى, وقۋشىلار مەكتەپ سىرتىنا كوشەت ەگىپ, جەكە ساياباعىن جاساعان ەكەن. اپتا سايىن ءار سىنىپ سۋ قۇيىپ, كۇتىپ باپتايدى. كوكتەم كەلە قۇلپىرا كوكتەيتىن جەمىس اعاشتارى, قىزىلدى-جاسىلدى گۇلدەر اۋىل تۇرعىندارىنىڭ كەشكە جاقىن سەرۋەندەيتىن مەكەنىنە اينالعان. وسىدان-اق ءبىلىم ورداسىنىڭ جاي-كۇيىنە ءتانتى بولۋعا بولادى. ۇزدىك اۋىل مەكتەبىنىڭ ءالى دە شىعار بيىگى جوعارى ەكەنىنە سەنەمىز.
