اۋداندىق مادەنيەت ءبولىمىنىڭ باس مامانى حاميدوللا يسلامقۇلوۆتىڭ جوباسى رەتىندە جىل سايىن وتەتىن بۇل ءىس-شارا بيىل اۋدان اكىمى مۇرات ومىراليەۆتىڭ قولداۋىمەن ەرەكشە سيپات تاپتى. شىڭعىرلاۋ اۋداندىق مادەنيەت ءۇيىنىڭ بي زالىندا ويىن تۇرىندە, ۆيكتورينالىق سۇراقتارمەن ورىلگەن سايىستى اۋداندىق كىتاپحانا قىزمەتكەرلەرى ۇيىمداستىردى. بالالار-جاسوسپىرىمدەر سپورت مەكتەبىنىڭ ديرەكتورى ماناربەك بەكتياروۆ فەستيۆالعا قاتىسقان ونەرلى بالدىرعاندارعا دەمەۋشىلىك كورسەتىپ, تاتتىلەر مەن سىيلىقتار الىپ بەردى. اۋداننىڭ جەكە كاسىپكەرلەرى ءسانيا ناميەۆا, ەدىل تۇرماعامبەتوۆ, اقمارال يسانوۆا, زۋحرا حايرۋللينا, الىبەك يسلامبەكوۆتەر دە بارىنشا قولداۋ كورسەتتى.
– بايقاۋدىڭ ءبىرىنشى ءبولىمى ونلاين تۇرىندە ءوتتى. «ماقال – ءسوزدىڭ مايەگى» اتتى سايىسقا بالالار ءتورت ماقال مەن جاڭىلتپاشتى ايتىپ, بەينەتۇسىرىلىم جولدادى. ال ەكىنشى بولىمدە اۋدانداعى ءار بالاباقشا مەن بوبەكجاي تاربيەلەنۋشىلەرى ءان ايتىپ, بي بيلەپ, ونەرىن كورسەتتى. ءبىز بالدىرعانداردى كىشكەنتايىنان شىعارماشىلىققا باۋلىپ, ساحناعا الىپ شىعۋدى ماقسات ەتتىك, – دەيدى اۋداندىق مادەنيەت, تىلدەردى دامىتۋ, دەنە شىنىقتىرۋ جانە سپورت ءبولىمىنىڭ باسشىسى ولجاس سەيتىموۆ.
شىنىندا دا, بۇل فەستيۆال اۋدان كولەمىندە ەرەكشە وقيعا بولدى. ونەرلى ورەندەر دە, ولاردىڭ اتا-انالارى دا تاقىمىن قىسىپ, ساحنا سيقىرىنىڭ ء«دامىن تاتتى». فەستيۆالعا قاتىسقان بالدىرعاندار العىسحاتپەن, ەستەلىك سىيلىقتارمەن ماراپاتتالدى.
ايتا كەتەيىك, بۇگىندە شىڭعىرلاۋ اۋدانىندا 8 بالاباقشا جۇمىس ىستەيدى. ول جەردە 800-گە تارتا بالا ءتالىم-تاربيە الىپ جاتىر.
باتىس قازاقستان وبلىسى
