وتكەن اپتادان بەرى وڭىردە ستاتسيوناردا 64 ناۋقاس ەمدەلىپ جاتىر. ال قىزىلشادان ەمدەلگەن امبۋلاتورلىق ناۋقاستاردىڭ جالپى سانى 72-گە جەتكەن.
– اۋىرعانداردىڭ 65 پايىزى – بالالار. سونىڭ ىشىندە التاۋى – 1 جاسقا تولماعان ءسابي. 10 ايلىق ءبىر بالانىڭ جاعدايى اۋىر, جان ساقتاۋ بولىمىندە جاتىر, – دەيدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ايناش عۇبايدۋللينا.
مامانداردىڭ ايتۋىنشا, ناۋقاستاردىڭ كوپشىلىگى – قىزىلشاعا قارسى ەكپە الماعاندار. وبلىستا قازىر 282 قىزىلشا وشاعى انىقتالىپ, ناۋقاسپەن بايلانىستا بولعان 1 942 ادام باقىلاۋعا الىنعان. جاعدايدى ساۋىقتىرۋ ءۇشىن 6 ايلىقتان اسقان بالالاردى قوسىمشا جاپپاي يممۋنداۋ, ياعني ەكپە جاساۋ باستالدى. سوڭعى 29 كۇن ىشىندە وڭىردە 2 005 بالا ەكپە قابىلداعان.
– قازىر قوسىمشا ەكپە الۋ ءجۇرىپ جاتىر. وڭىردە جالپى سانى 50 مىڭ ادام ەگىلۋى كەرەك, – دەيدى وبلىستىق سانيتارلىق-ەپيدەميالىق باقىلاۋ دەپارتامەنتى باسشىسى مۇحامعالي ارىسپاەۆ.
ماماندار ءتۇرلى سەبەپپەن ەكپە الۋدان باس تارتقاندار وسى اۋرۋدى ءارى وزدەرى جۇقتىرىپ, ءارى تاراتىپ وتىرعانىن ايتىپ, دابىل قاعىپ جاتىر. وڭىردە وسىنداي باس تارتۋشىلاردىڭ سانى 4 676 ادام بولعان. سوڭعى ۇگىت-ناسيحات جۇمىسىنىڭ ناتيجەسىندە 813 ادام ەكپە العان. الايدا ءالى دە 3 862 ادام ەكپەدەن باس تارتىپ وتىر ەكەن. ولاردىڭ ىشىندە 34 پايىزى ەكپەگە ءدىني سەبەپپەن قارسى بولسا, 16 پايىزى ۆاكتسيناعا سەنىمسىزدىك بىلدىرگەن.
باتىس قازاقستان وبلىسى
