قالا اكىمىنىڭ ورىنباسارى ابزال ءتاشىموۆتىڭ ايتۋىنشا, ارقالىق ەت كومبيناتى بۇگىنگە دەيىن 800-گە جۋىق كيىك ەتىن قابىلداپ العان. ونىڭ 398-ءىنىڭ ەتكە جارامايتىنى انىقتالىپ, ارنايى ولەكسە كومەتىن جەردە جويىلعان.
«قالعان 355 باستىڭ جالپى سالماعى 11 مىڭ تونناعا جۋىقتايدى. تازا ەت كۇيىندەگى سالماعى – 6 725 كگ. وسىنشاما ەت وڭدەۋگە جىبەرىلدى. كاسىپورىن 1 كگ كيىك ەتىن جەتكىزۋشىدەن 315 تەڭگەدەن ساتىپ الىپ جاتىر, ءار كيىكتىڭ سالماعى شامامەن 30-35 كگ بولادى. ەسەپتەپ كورسەك, ءبىر باس كيىكتىڭ عۇمىرى 9 450 مىڭ مەن 11 025 مىڭ تەڭگەنىڭ ارالىعىندا عانا ەكەن.
كاسىپورىن ديرەكتورىنىڭ ورىنباسارى سەرگەي مالوۆتىڭ ايتۋىنشا, كيىكتىڭ ەتى جالپى ەت وڭدەۋ سالاسىندا قالىپتاسقان ۇردىستەر شەڭبەرىندە وڭدەلەدى.
– الدىمەن كيىكتى بۇتىندەي قابىلداپ الىپ, مۇشەلەپ تاستايمىز. ودان كەيىن ەتىن سۇيەكتەن اجىراتىپ, تۋراۋعا جىبەرەمىز. سۇيەك پەشتە ورتەلەدى نەمەسە ارنايى ولەكسە كومەتىن ورىنعا جونەلتىلەدى. تەرىسى قازىرشە ەت كومبيناتىنىڭ اۋماعىندا ساقتالادى. كيىك تەرىسىن كادەگە اسىرۋ ماسەلەسى ءالى شەشىلگەن جوق. تۋرالعان ەتتى قۇتىلارعا سالىپ, ءبىر ساعاتقا اۆتوكلاۆقا زالالسىزداندىرۋعا قويامىز. كونسەرۆى وسى اۆتوكلاۆتا 120 گرادۋس ىستىقتا دايىندالادى, – دەيدى س.مالوۆ.
ارقالىق ەت كومبيناتى بارلىعى 3 مىڭ باسقا جۋىق كيىك قابىلداۋدى جوسپارلاپ وتىر. ەت وڭدەۋ, كونسەرۆى شىعارۋ ءوندىرىسى ەتتىڭ كەلىپ تۇسۋىنە قاراي جۇرەدى. كاسىپورىن باسشىلارىنىڭ ايتۋىنشا, كيىك ەتى قوعام بەلسەندىلەرىنىڭ, پوليتسيا مەن ۆولونتەرلەردىڭ قاتىسۋىمەن قابىلدانادى. ارقالىقتا شىعىپ جاتقان كونسەرۆىلەر الداعى ۋاقىتتا وبلىس كولەمىندەگى وزگە قالالاردا دا ساتىلا باستاۋى مۇمكىن.
قوستاناي وبلىسى
