سۋرەتتى تۇسىرگەن – ەرلان ومار, «EQ»
جۇلدەگەرلەردى ماراپاتتاۋ راسىمىندە ءتىل ساياساتى كوميتەتىنىڭ توراعاسى ەربول تىلەشوۆ وسى بايقاۋدىڭ ءوتىپ كەلە جاتقانىنا 20 جىلعا جۋىق ۋاقىت وتكەنىن, سونىڭ ىشىندە باق وكىلدەرىنىڭ تىلگە دەگەن جاناشىرلىعى مەن ازاماتتىق جاۋاپكەرشىلىگىن جوعارى باعالاپ, جىلى ءىلتيپاتىن جەتكىزدى. قازىر اتالعان بايقاۋعا تەك قازاق تىلىندەگى ەمەس, مەملەكەتتىك ءتىل تۋرالى ورىس تىلىندە قالام تەربەيتىن جۋرناليستەر دە قاتىسا باستاعان. ماسەلەن, بيىل بايقاۋعا 64 ءوتىنىم ارقىلى 145 ماتەريال كەلىپ تۇسسە, سونىڭ 123-ءى قازاقشا, 17-ءسى ورىس تىلىندە بولعان. وسىدان-اق ونىڭ سالماعى قانداي ەكەنىن بىلەسىز.
ءداستۇرلى بايقاۋعا پارلامەنت سەناتىنىڭ دەپۋتاتى بيبىگۇل جەكسەنباي, «قازاق گازەتتەرى» جشس باس ديرەكتورى ديحان قامزابەك ۇلى, جۋرناليست ماحات سادىق, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پروفەسسورى مولديار ەرگەبەكوۆ, قازاق مەدياقاۋىمداستىعىنىڭ توراعاسى ەربول ازانبەكوۆ سەكىلدى ەلىمىزگە بەلگىلى ازاماتتار قازىلىق ەتتى.
سونىمەن «مەملەكەتتىك ءتىل جانە باق-2023» بايقاۋىنىڭ گران-پري جۇلدەسى مەن 1 000 000 تەڭگە سەرتيفيكاتى «حالىق ءۇنى» اقپارات اگەنتتىگىنىڭ ءتىلشىسى ايگەرىم تاۋبايعا تابىس ەتىلدى. باسىلىم بەتتەرىندە, سونداي-اق ينتەرنەت-رەسۋرستاردا جارىق كورگەن «ۇزدىك ماقالا» اتالىمىندا ءبىرىنشى ورىندى اتىراۋ وبلىستىق «پريكاسپيسكايا كوممۋنا» گازەتىنىڭ اعا ءتىلشىسى انجەلا لي جەڭىپ السا, ەكىنشى ورىندى «Qazcontent» El.kz اق اقپاراتتىق اگەنتتىگىنىڭ ءتىلشىسى امانگۇل تىلەي يەمدەندى. ءۇشىنشى ورىندى استاناداعى №38 مەكتەپ-ليتسەيىنىڭ قازاق ءتىلى مەن ادەبيەتى ءپانىنىڭ مۇعالىمى ءبىرجان احمەر مەن «قازاق ءۇنى» رەسپۋبليكالىق قوعامدىق-ساياسي گازەتىنىڭ رەداكتورى دوستان ەلدەس ءوزارا ءبولىستى. «ۇزدىك تەلە جانە راديوباعدارلاما» اتالىمىندا ءبىرىنشى ورىن «قازاق راديوسىنىڭ» رەداكتورى ازامات تىلەپوۆكە بۇيىرسا, ەكىنشى ورىندى «جەتىسۋ» تەلەارناسىنىڭ قىزمەتكەرى مۇرات جۇماباي ەنشىلەدى.
سونىمەن قاتار بايقاۋ قورىتىندىسى بويىنشا 9 قاتىسۋشى ىنتالاندىرۋ سىيلىعىنا يە بولدى. سولاردىڭ ىشىندە «Egemen Qazaqstan» گازەتىنىڭ ءتىلشىسى جادىرا ءمۇسىلىم دە بار ەكەنىن ايتا كەتەيىك.
