ءدۇبىرلى دودادا ەل نامىسىن قورعايتىن قۇراما قاتارىنان تابىلۋعا نيەتتى جاستاردىڭ كوپ ەكەنى, دايىندىقتى باستاعانى انىق. وعان ارىس قالاسىندا وتكەن جارىستا كوز جەتكىزدىك.
تۇركىستان وبلىسىنىڭ قۇرىلعانىنا 5 جىل تولۋىنا وراي ۇلتتىق سپورت ويىندارىنىڭ 5 تۇرىنەن ۇيىمداستىرىلعان «Nomads cup» كوشپەندىلەر ويىنىنا ءوڭىردىڭ 17 اۋدان-قالاسىنان 200-گە جۋىق سپورتشى قاتىستى. جالپى جۇلدە قورى 2 ملن تەڭگە بولاتىن سايىستا جاستار جامبى اتۋ, قازاق كۇرەسى, اۋدارىسپاق, كوكپار, ارقان تارتىس بويىنشا كۇش سىناستى. تارتىستى وتكەن جارىس قورىتىندىسىندا كوماندالىق ەسەپ بويىنشا ءى ورىندى تولەبي اۋدانىنىڭ سپورتشىلارى جەڭىپ السا, ءىى ورىندى بايدىبەك اۋدانىنىڭ جاستارى يەلەندى. ال ءىىى ورىنعا ارىس قالاسىنىڭ قاتىسۋشىلارى كوتەرىلدى. جەڭىمپازدار مەن جۇلدەگەرلەرگە قارجىلاي سىياقىلار, كۋبوكتەر مەن ديپلومدار تابىس ەتىلدى. سونداي-اق قاتىسقان ءاربىر كومانداعا 50 مىڭ تەڭگە كولەمىندە اقشالاي سىيلىق ۇلەستىرىلدى. بۇدان بولەك, ءار سايىستا ۇزدىك ناتيجە كورسەتكەن 5 قاتىسۋشىعا جانە ەڭ جاس سپورتشىعا ارنايى سىيلىق تابىس ەتىلدى.
ايتا كەتەيىك, جاستار اراسىندا قازاق حالقىنىڭ ۇلتتىق ويىندارىنىڭ ءمانىن, دالا ءداستۇرىن, ۇرپاقتار ساباقتاستىعىن نەگىزگە الا وتىرىپ, ەل تاريحىن, بولمىسىن, ءداستۇرىن ناسيحاتتاۋ ماقساتىنداعى يگى ءىس-شارا «جاستار رەسۋرستىق ورتالىعى» كمم ۇيىمداستىرۋىمەن, ارىس قالاسى اكىمدىگىنىڭ قولداۋىمەن ءوتتى.
تۇركىستان وبلىسى
