ەسكە سالايىق, «ادىلدىك جولى» رقب فيليالى مەن قر سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتى بىرلەسىپ جۇرگىزگەن تەكسەرۋ بارىسىندا 2017 جىلدان 2023 جىلدىڭ قىركۇيەك ايىنا دەيىنگى ارالىقتا , «حالەل دوسمۇحامەدوۆ اتىنداعى اتىراۋ ۋنيۆەرسيتەتى» كەاق «ەكونوميكا جانە قۇقىق» فاكۋلتەتى دەكانىنان جالپى سوماسى 1 ميلليون تەڭگەگە جۋىق زاڭسىز ەڭبەكاقى ەسەپتەلگەن, بۇل ونىڭ جۇمىس ورنىندا بولماعانىنا قاراماستان تولەنگەن. ويتكەنى, ول بىرنەشە رەت شەتەلگە ساياحاتتاعان.
بۇل اقپاراتقا اتالمىش وقۋ ورنىنىڭ ءباسپاسوز قىزمەتى تۇسىنىكتەمە بەردى.
«جوعارى وقۋ ورنىنىڭ اتالعان بۇرىنعى قىزمەتكەرىنە جالاقى ەسەپ كارتاسىنا سايكەس ىسساپارعا جوسپارلانعان ۋاقىتتان ەرتە كەتكەن نەمەسە كەش قايتقان كۇندەرى, سونداي-اق بەلگىلى ءبىر كەزەڭدە وتباسىلىق جانە دەنساۋلىعىنا بايلانىستى بولماعان كۇندەرى ءۇشىن قاتە ەسەپتەلگەن جانە تولەنگەن. ۋنيۆەرسيتەتكە كەلتىرىلگەن شىعىندى بۇرىنعى دەكان انىقتالعان سوما بويىنشا تولىعىمەن وتەپ بەردى», - دەلىنگەن حابارلامادا.
انىقتالعانداي, 2023 جىلدىڭ 20 قازانىندا ەڭبەك ءتارتىبىن بۇزعانى ءۇشىن دەكان قىزمەتىنەن بوساتىلىپ, 2023 جىلدىڭ 1 قاراشاسىندا اتالعان قىزمەتكەرمەن ەڭبەك شارتى تولىعىمەن بۇزىلعان. وسى بۇزۋشىلىقتارعا اكەپ سوققان نەمقۇرايلىلىق تانىتقان لاۋازىمدى تۇلعالار تارتىپتىك جاۋاپكەرشىلىككە تارتىلدى.
«ۋنيۆەرسيتەتتىڭ بارلىق قۇرىلىمدىق بولىمشەلەرىنىڭ باسشىلارىمەن ەڭبەك ءتارتىبى تالاپتارىن مۇلتىكسىز ساقتاۋ قاجەتتىگى جانە ولاردى بۇزۋدىڭ ىقتيمال سالدارى تۋرالى ءتۇسىندىرۋ جۇمىستارى جۇرگىزىلدى», - دەپ تۇيىندەدى وقۋ ورنى.
