قالانىڭ الەۋمەتتىك-ەكونوميكالىق دامۋ بارىسى كەزدەسۋدىڭ نەگىزگى ارقاۋىنا اينالعانىن اتاپ وتكەن ورىندى. قانىش قالاسى – كەنشىلەر قالاسى. قالا تۇرعىندارىنىڭ 80%-دان استامى «قازاقمىس» كورپوراتسياسىنىڭ قۇرىلىمدارىندا جۇمىس ىستەيدى. نەگىزگى بيۋدجەتتىك ءتۇسىم دە «قازاقمىس» قۇرىلىمدارىنان تۇسەدى. ستاتيستيكاعا سۇيەنسەك, بيىلعى 10 ايدىڭ قورىتىندىسى بويىنشا قالادا ونەركاسىپ ءوندىرىسىنىڭ كولەمى 75,5 ملرد تەڭگەنى قۇراپ, وتكەن جىلدىڭ سايكەس مەرزىمىنە قاراعاندا 9,4%-عا ءوستى. ال قالاداعى جۇمىس ىستەپ تۇرعان شاعىن جانە ورتا كاسىپكەرلىك نىساندارىنىڭ سانى – 4 415. بۇل كورسەتكىش وتكەن جىلدىڭ ءتيىستى مەرزىمىنەن 21,3%-عا ارتىق.
نەگىزگى كاپيتالعا سالىنعان ينۆەستيتسيالار كولەمى 47,3 ملرد تەڭگەنى قۇرادى نەمەسە 2022 جىلدىڭ ءتيىستى كەزەڭىنە 23% ءوسىمدى كورسەتتى. ەگەر تارقاتىپ ايتار بولساق, «جەزقازعانتسۆەتمەت» ءوب – «قازاقمىس كورپوراتسياسى» جشس فيليالى بويىنشا – 39 ملرد 365 ملن تەڭگە, بيۋدجەتتىك ينۆەستيتسيالار – 2 ملرد 029 ملن تەڭگە, قالعان ۇيىمدار مەن كاسىپورىندار بويىنشا 5 ملرد 933,1 ملن تەڭگە بولدى.
قازىرگى كەزدە قالادا جالپى قۇنى 75,6 ملرد تەڭگەنى قۇرايتىن بىرنەشە ينۆەستيتسيالىق جوبانىڭ پۋلى قالىپتاستىرىلعان. سولاردىڭ ءبىرى – «ساتباەۆ مينەرالدى جانە جەمىس سۋلارى زاۋىتى» جشس « ۇلىتاۋ» مينەرالدى سۋ ءوندىرىسىن جاڭعىرتۋ جوباسى اياسىندا ليمونادتار مەن شاي قۇيۋ جەلىسىن ىسكە قوسۋ. بۇل جوبانىڭ جالپى قۇنى 420,7 ملن تەڭگەنى قۇرايدى. جوبانى ىسكە قوسۋ 2024 جىلدىڭ 1-توقسانىنا جوسپارلانىپ وتىر.
تاعى ءبىر جوبا «قۇس ەتىن وڭدەۋ ماقساتىندا سويۋ تسەحى» ىسكە قوسىلعاندا جىلىنا 5 مىڭ توننا قۇس ەتى وندىرىلمەك جانە 50 تۇراقتى جۇمىس ورنى پايدا بولادى. بۇل جوبانىڭ پايدالانۋعا بەرىلۋىنە دە كوپ قالعان جوق. كەلەر جىلدىڭ العاشقى توقسانىندا جوبا ىسكە قوسىلادى.
كەزدەسۋ بارىسىندا ءارتۇرلى ماسەلە ءسوز بولاتىنى بەلگىلى. حالىق تاراپىنان كوممۋنالدىق قىزمەتكە كوڭىل تولماۋشىلىق, تاريفتەردىڭ ءجيى كوتەرىلەتىنە دەگەن قىنجىلىس بايقالدى. دەنساۋلىق ساقتاۋ سالاسىنداعى تۇيتكىلدەر دە نازاردان تىس قالمادى. سايىپ كەلگەندە كوپ نارسە ەكونوميكالىق جاعدايعا بايلانىستى. مۇنى دا ءتۇسىنۋ كەرەك. مونوقالا مارتەبەسى بار قالانىڭ بۇگىنىنەن گورى ەرتەڭى كوبىرەك الاڭداتادى. سوندىقتان دا قالادا شاعىن جانە ورتا كاسىپكەرلىكتى دامىتۋ, جاڭا ءوندىرىس ورىندارىن اشۋدىڭ ماڭىزى وتە زور. بۇل رەتتە قولعا الىنىپ جاتقان شارالار ەرتەڭگە دەگەن سەنىمدى نىعايتا تۇسەدى.
ۇلىتاۋ وبلىسى,
ساتباەۆ قالاسى
