– التايدىڭ اڭىز ادامىنا اينالعان بوشاي كىتاپباي ۇلى تۋرالى كوپ ايتۋعا بولادى. ول كىسىمەن كوپ اڭگىمەلەستىم. بىردە «مەن جىلقىنى عانا ەمەس, ادام دا تاني بىلەمىن» دەگەنى بار. «توعىز تاڭبالى نايمان» دەگەن كىتابىنا تىلەگىن جازىپ, قولىن قويىپ بەرگەن, – دەگەن قالا اكىمى جاقسىلىق ومار قالىڭ شەجىرە كىتاپتى كوپشىلىككە كورسەتتى.
ءيا, جازۋى موردەي بوشاي اقساقالدىڭ شەجىرە كىتابى كوپشىلىكتىڭ سورەسىندە تۇرعانى انىق. سونىمەن قاتار, شاھار باسشىسى الداعى كۇندەرى قالا ىشىندەگى ەنتۋزياست كوشەسىنە بوشاي كىتاپباەۆتىڭ اتى بەرىلەتىندىگىن ايتتى. مەموريالدى تاقتانىڭ اشىلۋ سالتاناتىنا قاتىسقان زيالى قاۋىم, تۋىس-تۋعاندارى دا تىلەكتەرىن ءبىلدىرىپ جاتتى.
– ەڭبەك ەرى, شەجىرەشى بوشاي كىتاپباەۆتى اقتىق ساپارعا مادەني وشاقتان ەمەس, وسى ءۇيىنىڭ اۋلاسىنان شىعارىپ سالعان ەدىك. بۇگىنگى تاقتانىڭ اشىلۋى سول ءبىر ولقىلىقتىڭ ورنىن تولتىرماسا دا بوشاي اعامىزدىڭ ارۋاعىنىڭ الدىندا وتەلگەن پارىزداردىڭ ءبىرى بولدى دەپ ويلايمىن. ەندىگى كەزەكتە مەن كاتونقاراعاي اۋدانىنداعى جاڭاۇلگى اۋىلىنا بوشاي كىتاپباي ۇلىنىڭ اتىن بەرۋدى ۇسىنار ەدىم. ويتكەنى بۇل اۋىل ول كىسىنىڭ كىندىك قانى تامعان جەرى, – دەدى جازۋشىلار وداعى شىعىس قازاقستان وبلىستىق فيليالىنىڭ ديرەكتورى الىبەك قاڭتارباەۆ.
وسىلايشا, جينالعان جۇرت بوشاي كىتاپباي ۇلى تۇرعان ءۇيدىڭ قابىرعاسىنداعى تاقتادان دارا تۇلعانىڭ بەينەسى مەن ناقىل ءسوزىن جادىنا توقىپ قايتتى. ەسكى جىلداردىڭ ەستەلىكتەرىن ايتىپ, ايتۋلى ازاماتتىڭ رۋحىن شات ەتتى.
وسكەمەن
