فوتو: اشىق دەرەككوز
اۋەلى, مىنا سۇراققا جاۋاپ ىزدەپ كورەيىكشى. جاڭا عاسىردىڭ جاڭاشىل ۇستازى قانداي بولۋ كەرەك؟ بىزدىڭشە, كۇن ساناپ ءتۇرلى كەيىپكە ەنگەن, سان اۋلان اقپاراتتاردى ەشقانداي سۇزگىسىز قوعامنىڭ ساناسىنا قۇيعان زامان ۇدەرىسىنە ەركىن بويلايتىن جان عانا ءوز ءىسىنىڭ كاسىبي شەبەرى اتانباق. ۇستاز ۋاقىتپەن قاتار تولاسسىز دامىپ, تاۋىس قۇسىنداي تۇرلەنىپ وتىرۋى شارت. ايتپەسە ءسىز شاكىرتىڭىزدى قىزىقتىرا المايسىز. ءبىز مۇنداي ەرەكشەلىكتەردى وبلىستىق «جەتىسۋ ۇستازى – 2023» بايقاۋىنىڭ جەڭىمپازى ىڭكار راقمانوۆانىڭ بويىنان كورە الدىق. ءبىلىم بايگەسىندە ءوزىنىڭ ساباق بەرۋ ءادىسى ارقىلى سالانىڭ بىلىكتى ماماندارىنىڭ ىستىق ىقىلاسىنا يە بولدى. ۇستازدىق جولعا تۇسكەنىنە كوپ بولماسا دا كرەاتيۆتى يديالارى ارقىلى ءوز ءىسىنىڭ شەبەرى ەكەنىن دالەلدەدى. وسىلايشا وڭىرلىك ءبىلىم باسەكەسىندە وق بويى وزا شاۋىپ, اۆتوكولىك يەسى اتاندى.
«جەتىسۋدا زامان ورىسىنەن ءوز جولىن تابا بىلگەن, دارىندى ماماندار كوپ. دەسە دە ىڭكار جاھاندىق ءبىلىم كەڭىستىگىندەگى جاڭاشىلدىعىمەن دارا شاپتى. ءبىز بايقاۋدا پەداگوگتىڭ دارىن دەڭگەيىن, شىعارماشىلىق قابىلەتىن, زياتتىلىق شەبەرلىگىن باعامدادىق. قازىر, وڭىردە كرەاتيۆتى جاستار ءبىلىم سالاسىنا باسقا راكۋرستان قاراپ, قۇندىلىعىن ەسەلەۋدە. ءبىز وسىنداي ۇستازدارىمىز بارىنا قۋانامىز», دەيدى وبلىستىق ءبىلىم باسقارماسىنىڭ باسشىسى مارات سۇلەيمەنوۆ.
ىڭكاردىڭ باستى قاسيەتى – iزدەنiمپازدىق. قاي ۋاقىتتا دا سىن تۇرعىسىنان ويلاي الاتىن, iسكەر ءھام شىعارماشىل جاس. ايرىقشا يدەيالار بەرۋگە, ويلاۋدىڭ ءداستۇرلى سحەمالارىنان باسقا جول تابۋعا, پروبلەمالىق جاعداياتتاردى تەز شەشۋگە قابىلەتتىلىگىمەن وزگەشە. ءوز ماماندىعىن جانىنداي سۇيەتىن ادام عانا وزگەمەن ەركىن ءتىل تابىسا الادى. بۇگىندە وقۋشى جۇرەگىنە جول تابا ءبىلۋ دە ۇلكەن ونەر. مۇنى پايىمدى پەداگوگ جەتىك مەڭگەرگەن. ۋنيۆەرسيتەتتە وقىپ جۇرگەن كەزىنەن بىلىمگە قۇشتارلىعى قاتارىنىڭ الدى بولۋعا جەتەلەيدى. مۇنى تالىمگەرى قازاقستاننىڭ ەڭبەك سىڭىرگەن ۇستازى تاتيانا ميحايلوۆنا ستانكەۆيچ تە مويىنداپ وتىر.
«تاۋەكەلشىل تالاپتىڭ قاناتىن ەركىن قاعۋىنا كومەك بەرۋ ءاربىر مۇعالىمنىڭ پارىزى. ءبىز عىلىم مەن تەحنيكا دامىعان, ونەر-ءبىلىمنىڭ ءتۇرلى سالاسىندا تىڭ جاڭالىقتار اسا قارقىندى ۇردىسپەن اشىلىپ جاتقان قوعامدا ءومىر ءسۇرىپ جاتىرمىز. دەمەك وسى كەزەڭدە زامانىنا ساي ۇرپاق تاربيەلەپ, جەتىلدىرىپ شىعارۋ ءۇشىن جان-جاقتى ءبىلىم جانە تاربيە بەرۋمەن اينالىسۋ وتە جاۋاپتى ءىس. مەن ىڭكاردىڭ بويىنان وسى مىنەزدى كورەمىن», دەيدى ت.ستانكەۆيچ.
بىلىكتى پەداگوگ 2016 جىلى ءى.جانسۇگىروۆ اتىنداعى جەتىسۋ ۋنيۆەرسيتەتىن بيولوگيا ماماندىعى بويىنشا ۇزدىك بىتىرگەن. قولىنا ديپلومىن الا سالىپ, ءوزى تۋىپ وسكەن مەكەنگە قىزمەت ەتۋگە بەل بۋادى. كوپ ۇزاماي سارقان قالاسىنداعى №1 مەكتەپ-گيمنازياسىنا بيولوگيا ءپانى مۇعالىمى بولىپ جۇمىسقا ورنالاسادى. بۇگىندە جالپى جۇمىس ءوتىلى – 8 جىل, بىلىكتىلىك ساناتى – پەداگوگ-ساراپشى. وسى ۋاقىت ارالىعىندا ءوز كاسىبي شەبەرلىگىنىڭ ناتيجەسىندە جەتكەن جەتىستىكتەرى جەتەرلىك. سونىڭ دالەلى – جەتىسۋدىڭ ۇزدىك ۇستازى اتانۋى.
«قازىر جاھاندىق اقپاراتتىڭ دامىعان كەزەڭى. زامانعا ساي ەلىمىزدەگى بارلىق سالادا جاڭاشىلدىقتار ەنگىزىلۋدە. ماسەلەن, ءبىلىم بەرۋ مەكەمەلەرى ساندىق جۇيەگە كوشىرىلىپ, جاراتىلىستانۋ پاندەرىن اعىلشىن تىلىندە وقىتۋدى قولعا الۋدا. ءۇشتىلدى وقىتۋ – جاس ۇرپاقتىڭ ءبىلىم كەڭىستىگىندە ەركىن سامعاۋىنا جول اشاتىن, الەمدىك عىلىم قۇپيالارىنا ءۇڭىلىپ, ءوز قابىلەتىن تانىتۋىنا مۇمكىنشىلىك بەرەتىن ەڭ باستى قاجەتتىلىك», دەيدى كەيىپكەرىمىز.
ونىڭ حالىقارالىق, رەسپۋبليكالىق بايقاۋلاردا توپ جارىپ, اۋداننىڭ عانا ەمەس, ءوڭىردىڭ ءبىلىم سالاسىنا ۇلكەن جاڭالىق اكەلگەنى كوپتىڭ كوڭىلىندە. جەكە اۆتورلىق جوبالارى شەتەلدىكتەردىڭ دە قىزىعۋشىلىعىن تۋدىرۋدا. «Biology in English» فاكۋلتاتيۆتىك كۋرسى باعدارلاماسىنىڭ اۆتورى رەتىندە ارىپتەستەرىنىڭ قۇرمەت-قوشەمەتىنە يە بولدى. ءبىز جاڭاشىل ۇستازدىڭ ءالى دە الار اسۋى الدا ەكەنىنە كۇمان كەلتىرمەيمىز. كرەاتيۆتى ماماننىڭ قوعامعا بەرەر قۇندىلىعى كوپ, بۇل زامان اعىمىنا ىلەسكەن ءاربىر وقۋشى ءۇشىن دە ماڭىزدى.
جەتىسۋ وبلىسى
