جيىندا ورتالىق مەملەكەتتىك ورگانداردىڭ جانە ءوڭىر اكىمدىگى باسشىلارىنىڭ قاتىسۋىمەن قالانى دامىتۋ تاسىلدەرى قارالدى. جوسپارعا سايكەس بۇل وتاندىق جانە شەتەلدىك ينۆەستيتسيالاردى تارتا وتىرىپ, جاھاندىق ستاندارتتار بويىنشا جۇمىس ىستەيتىن حالىقارالىق بيزنەس-حابقا اينالۋعا ءتيىس. بۇل رەتتە دۋباي, سينگاپۋر, تيانتسزين, ت.ب. سياقتى الەمنىڭ ايگىلى ورتالىقتارىن قۇرۋ تاجىريبەسى نەگىزگە الىنباق.
اتاپ ايتقاندا, الماتى وبلىسىنداعى الاتاۋ قالاسىن دامىتۋ قىتايمەن, ورتالىق ازيا ەلدەرىمەن ساۋدا جانە ينۆەستيتسيالىق ءوزارا ءىس-قيمىل دەڭگەيىن ارتتىرۋعا, بىرقاتار جاڭا وندىرىستىك جانە كوممەرتسيالىق جوبانى ىسكە قوسۋعا, ءتۇرلى سالادا وزىق تاجىريبەنى ەنگىزۋگە مۇمكىندىك بەرەدى. وسى ماقساتتا ينۆەستيتسيالار تارتۋ جانە كاسىپكەرلىك قىزمەتتى جۇرگىزۋ ءۇشىن قولايلى جاعدايلار جاسالىپ, ىنتالاندىرۋ شارالارى كوزدەلەدى. بۇل سونىڭ ىشىندە سالىق جانە كەدەندىك ارتىقشىلىقتارعا دا قاتىستى.
سونىمەن قاتار الاتاۋ قالاسىنىڭ اۋماعىندا ەرەكشە قۇقىقتىق رەجىمدى, ونىڭ ىشىندە احقو قۇقىعىن ەنگىزۋ مۇمكىندىگى قارالادى. پرەمەر-مينيستر بۇل جۇمىستاردى ىسكە اسىرۋ كەزىندە حالىقارالىق تاجىريبەنى ەسكەرىپ, تيىمدىلىگى جوعارى شارالاردى قولدانۋ قاجەتتىگىن اتاپ ءوتتى. بۇعان قوسا بيزنەسپەن ءوزارا ءىس-قيمىل كەزىندە, اتاپ ايتقاندا, مەملەكەتتىك-جەكەمەنشىك ارىپتەستىگى تەتىگى ارقىلى قاجەتتى ينفراقۇرىلىم قۇرىلىسىن جانداندىرۋ قاجەتتىگى ايتىلدى.
