پرەمەر-مينيستر قازاقستان ۇكىمەتىنىڭ الدىندا 2029 جىلعا قاراي ەكونوميكا كولەمىن 450 ملرد دوللارعا, ياعني ەكى ەسەگە ارتتىرۋ بويىنشا اۋقىمدى مىندەت تۇرعانىن اتاپ ءوتتى.
ء«بىز ESG پرينتسيپتەرىن ەسكەرە وتىرىپ, بۇل ۋاقىتتا كەمىندە 150 ملرد دوللار شەتەل ينۆەستيتسياسىن تارتۋدى جوسپارلاپ وتىرمىز. وسى ماقساتتارعا جەتۋ ءۇشىن ەلىمىزدىڭ ينۆەستيتسيالىق احۋالىن ودان ءارى جاقسارتۋ باعىتىندا جۇيەلى شارالار قابىلدانىپ جاتىر», دەدى ول.
ءا.سمايىلوۆ اتاپ وتكەندەي, شەتەل ينۆەستورلارى كەڭەسىنىڭ كەلەسى پلەنارلىق وتىرىسى «قازاقستاندى جاڭا يندۋستريالاندىرۋ» تاقىرىبىنا ارنالادى.
«مەملەكەت باسشىسى قازاقستان حالقىنا جولداۋىندا ەلدىڭ ونەركاسىپتىك نەگىزىن قالىپتاستىرۋدىڭ ماڭىزىن اتاپ ءوتتى. ۇكىمەت جۇمىسى ينۆەستيتسيالار كولەمىن ۇلعايتۋعا, وزىق تەحنولوگيالاردى ترانسفەرتتەۋگە, وندىرىستەردى لوكاليزاتسيالاۋعا جانە جوعارى دەڭگەيدە وڭدەلگەن ءونىم شىعاراتىن كلاستەرلەر قۇرۋعا باعىتتالعان. وڭدەۋ سەكتورىن جەدەل دامىتۋعا باسىمدىق بەرىلەدى», دەدى ۇكىمەت باسشىسى.
ونىڭ ايتۋىنشا, بۇل ءۇشىن قاجەتتى زاڭنامالىق بازا مەن ينستيتۋتسيونالدىق ورتا قالىپتاستىرىلدى. «ونەركاسىپتىك ساياسات تۋرالى» زاڭ قابىلدانىپ, جاڭادان ونەركاسىپ جانە قۇرىلىس مينيسترلىگى قۇرىلدى.
«ۇكىمەت ەكونوميكانىڭ ءوسۋ سەرپىنىن ساقتاۋ جانە ەلدەگى ينۆەستيتسيالىق احۋالدى جاقسارتۋ جونىندە بارلىق قاجەتتى شارانى قابىلدايدى. ءبىز شەتەلدىك ارىپتەستەرىمىزدى قازاقستانداعى جوبالارعا ينۆەستيتسيا سالۋعا شاقىرامىز», دەپ اتاپ ءوتتى ءا.سمايىلوۆ.
كەڭەس بارىسىندا Ernst&Young, TotalEnergies, Knauf, KPMG كومپانيالارىنىڭ وكىلدەرى جانە ەلىمىز ورتالىق مەملەكەتتىك ورگاندارىنىڭ باسشىلارى ءسوز سويلەدى.
تالقىلاۋ قورىتىندىسى بويىنشا پرەمەر-مينيستر ايتىلعان بارلىق ۇسىنىس پەن پىكىردىڭ پىسىقتالاتىنىن اتاپ ءوتتى. سونداي-اق ءىس-شارا اياسىندا ءا.سمايىلوۆ شەتەل ينۆەستورلارى كەڭەسىن جانە جالپى رەسپۋبليكانىڭ ينۆەستيتسيالىق احۋالىن دامىتۋعا قوسقان ۇلەسى ءۇشىن العىسحاتتار تابىس ەتتى. اتاپ ايتقاندا, Coca Cola Içecek Kazakhstan, Microsoft, Baker&McKenzie, Cameco Kazakhstan, Chevron Corporation, Deloitte, Exxon Mobil, Glencore, Marubeni كومپانيالارىنا بەرىلدى.
«وسى جىلدارى بىرلەسكەن كۇش-جىگەر ارقىلى جاڭا ءوندىرىس ورىندارى ىسكە قوسىلدى, ءىرى جوبالار جۇزەگە اسىرىلدى, ەڭ باستىسى, مىڭداعان جۇمىس ورنى اشىلدى. ىنتىماقتاستىعىمىز ءوزارا ءتيىمدى بولىپ, ۇلكەن پەرسپەكتيۆالارعا جول اشىپ, تۇراقتى تۇردە دامي بەرەتىنىنە سەنىمدىمىن. قازاقستان ۇكىمەتى ينۆەستيتسيالىق بايلانىستاردى تەرەڭدەتىپ, جاڭا بىرلەسكەن جوبالاردى جۇزەگە اسىرۋعا دايىن», دەدى پرەمەر-مينيستر.
وسى ورايدا شەتەل ينۆەستورلارى كەڭەسى قازاقستان پرەزيدەنتىنىڭ جانىنداعى كونسۋلتاتيۆتىك-كەڭەسشى ورگان ەكەنىن ايتا كەتۋ كەرەك.
