مۇندا تسيفرلاندىرۋدىڭ نەگىزگى جوبالارىنىڭ ءبىرى – تسيفرلىق ستاتيستيكالىق تىركەلىمدەر. ترانسفورماتسيانىڭ العاشقى جىلىندا ءبىلىم, دەنساۋلىق ساقتاۋ جانە اۋىل شارۋاشىلىعى سالالارىندا 3 تسيفرلىق ستاتيستيكالىق تىركەلىم ەنگىزىلگەن. مىسالى, دەنساۋلىق جونىندەگى تىركەلىم دەنساۋلىق ساقتاۋ مينيسترلىگىنىڭ دەرەكتەرىن بىرىڭعاي جۇيەگە شوعىرلاندىرۋعا مۇمكىندىك بەرەدى. وسىلايشا, پاتسيەنتتەر, مەديتسينالىق مەكەمەلەر دارىلىك زاتتار بويىنشا ستاتيستيكانى ءبىر جۇيەدەن بىلە الادى. سول سەكىلدى ءبىلىم بەرۋ تىركەلىمى بويىنشا مەكتەپكە دەيىنگى وقىتۋ, جوعارى ءبىلىم بەرۋ, «بولاشاق» باعدارلاماسى بويىنشا دەرەكتەردى كورۋگە مۇمكىندىك بار. بۇل تۋرالى ۇلتتىق ستاتيستيكا بيۋروسى باسشىسىنىڭ ورىنباسارى جاننات ءدۇبىروۆا جان-جاقتى ايتىپ بەردى.
– ستاتيستيكالىق تىركەلىمدەر مەيلىنشە ەگجەي-تەگجەي ستاتيستيكا جاساۋعا مۇمكىندىك بەرەدى. مىسالى, ونى وبلىستار, اۋداندار, ەكونوميكالىق قىزمەت تۇرلەرى, مەنشىك نىساندارى جانە باسقا دا بولىنىستە كورسەتۋگە بولادى. وسىلايشا, ءبىز مەملەكەتتىك ورگانداردىڭ 150 دەرەك بازاسىنا جانە 3 مىڭنان اسا انىقتامالىق پەن كلاسسيفيكاتورلاردىڭ قۇرىلىمدارىنا تالداۋ جاساپ, Smart Data Ukimet ارقىلى ينتەگراتسيالاۋ جۇمىستارىن جۇرگىزدىك. تىركەلىمدەر رەسپوندەنتتەرگە تۇسەتىن سالماقتى ازايتۋعا سەپتىگىن تيگىزەدى», دەدى ج.ءدۇبىروۆا.
بۇگىندە ۇلتتىق ستاتيستيكا بيۋروسىنىڭ سايتىندا ەلدەگى ينفلياتسيا دەڭگەيىنەن باستاپ, باسقا دا مالىمەتتەردى وڭاي بىلۋگە بولادى. سوعان ءۇڭىلىپ ايتار بولساق, بىلتىرعى قازان ايىنان بيىلعى قازانعا دەيىن ەلدەگى ينفلياتسيا 10,8 پايىزدى قۇراعان. مۇنى ەسەپتەۋ ءۇشىن ەل بويىنشا 508 تاۋار مەن قىزمەت ءتۇرى ەسكەرىلگەن. ياعني حالىق ءجيى تۇتىناتىن ازىق-ت ۇلىك, ازىق-ت ۇلىك ەمەس تاۋارلاردىڭ جانە اقىلى قىزمەتتەردىڭ قۇنى قارالعان. ءبىر سوزبەن ايتقاندا, ەلدەگى ينفلياتسيا دەڭگەيى وسى ستاتيستيكالار نەگىزىندە ەسەپتەلگەن. تاعى ءبىر اقپار, وسى دەرەكتەردىڭ بارلىعىن رەسپۋبليكالىق ماڭىزى بار قالا, وبلىس ورتالىقتارىندا, 85 ەلدى مەكەندە ستاتيستيكا ماماندارى جينايدى. ەندى ستاتيستيكا بيۋروسى ينفلياتسيانى ەسەپتەۋ ءۇشىن دەرەكتەردى جيناۋدىڭ جاڭا ادىستەرىن ەنگىزىپ وتىر. جاڭا قوسىمشا ارقىلى ستاتيستيكا ماماندارىنا سول باعالاردى انىقتاپ, ەسەپتەۋ جەڭىلىرەك بولادى. بۇل قوسىمشا تۋرالى بيۋرونىڭ باعا ستاتيستيكاسى دەپارتامەنتىنىڭ ديرەكتورى قۋانىشبەك جاقىپبەك ۇلى حابارلادى.
– بۇگىنگە دەيىن ءبىز ينفلياتسيانى ەسەپتەۋ بارىسىندا باعالاردى قاعاز تۇرىندە جينايتىنبىز. ياعني ءبىزدىڭ ماماندار دۇكەن, بازارلارعا بارىپ, باعالاردى قاعاز جۇزىندە تىركەيتىن. سودان ءبىز حالىقارالىق تاجىريبەنى ەسكەرە كەلە, ءموبيلدى قوسىمشانى قۇرۋعا شەشىم قابىلدادىق. بۇگىندە ستاتيستيكا ماماندارىنا ارنالعان ءموبيلدى قوسىمشا ونلاين, وفلاين رەجىمدە جۇمىس ىستەيدى. ەندى ولار دۇكەن, بازارلاردى ارالاعاندا شتريح-كودتى سكانەرلەۋ ارقىلى باعانى ونلاين تىركەيدى. وسىلايشا, ءبىزدىڭ باعا جيناۋشى مامانداردىڭ جۇمىسى ءبىرشاما جەڭىلدەدى. ايتا كەتۋ كەرەك, مۇنداي ءموبيلدى قوسىمشا بىرنەشە ەۋروپا ەلدەرىندە بار. قوسىمشانى ەلدە جاساپ شىعۋعا جارتى جىلداي ۋاقىت كەتتى. ناتيجەسى جاقسى, – دەيدى ق. جاقىپبەك ۇلى.
ءىس-شارا بارىسىندا «ۇلتتىق انىقتامالىق اقپارات» جوباسىنىڭ تانىستىرىلىمى ءوتتى. بۇل – ءارتۇرلى ازاماتتىق قوعام ۇيىمدارى مەن جەرگىلىكتى ءوزىن ءوزى باسقارۋ ورگاندارىنىڭ انىقتامالىق دەرەكتەرىن قۇرۋعا, قۇرىلىمداۋعا جانە باسقارۋعا ارنالعان كەشەندى جۇيە.
