بۇل تۋرالى وبلىس اكىمى اساين بايحانوۆ وتكىزگەن بالالارعا قاتىستى قىلمىستىڭ الدىن الۋ ماسەلەلەرىنە ارنالعان ارنايى جيىندا بەلگىلى بولدى. ونىڭ ايتۋىنشا, قىزدىڭ ءولىمىنىڭ الدىن الۋعا بولاتىن ەدى.
«بەسقاۋعا اۋىلىنىڭ تۇرعىنى جەتى جاسار ميلانا داۆىدوۆانىڭ باسىنان وتكەن جان تۇرشىگەرلىك وقيعا ەشقايسىمىزدى بەيجاي قالدىرمادى. اۋىر قازا جۇرەگىمىزدى اۋىرتتى. مۇلدە ادامگەرشىلىككە جاتپايتىن ارەكەت. بۇل قايعىلى وقيعانىڭ الدىن الۋعا بولار ەدى. بالالار بەيبىت ۋاقىتتا ءولىپ جاتىر, بۇل ءبىزدىڭ كىنامىز, ۇلكەندەردىڭ كىناسى», دەدى بايحانوۆ.
ول شەنەۋنىكتەردى جازالاۋعا قاتىستى شەشىم شەشىم قابىلداعانىن دا ءسوز ەتتى.
«وبلىس اكىمىنىڭ ورىنباسارى – وبلىستىڭ الەۋمەتتىك سالاسىنىڭ جۇمىسىن قاداعالايتىن ايزادا قۇرمانوۆاعا, ەكىباستۇز قالاسىنىڭ اكىمى ايان بەيسەكينگە, وبلىستىڭ ءبىلىم جانە حالىقتى الەۋمەتتىك قورعاۋ باسقارمالارىنىڭ باسشىلارى سامال ايتقازينا مەن الميرا ديۋسيۋپوۆاعا سوگىس بەرىلدى. سونىمەن قاتار وبلىس اكىمى كەنشىلەر قالاسىنىڭ باسشىسىنا ەكىباستۇز قالاسىنىڭ لاۋازىمدى تۇلعالارىنا, ونىڭ ىشىندە قوياندى اۋىلدىق وكرۋگىنىڭ اكىمى اباي حاكىموۆكە تارتىپتىك شارا قولدانۋدى تاپسىردى", دەپ جازدى پاۆلودار وبلىسى اكىمىنىڭ ءباسپاسوز قىزمەتىنەن.
ەكىباستۇز قالاسىنىڭ اكىمىنە داۆىدوۆتار وتباسىن باقىلاۋعا الۋ جۇكتەلدى.
ەسكە سالا كەتەيىك, 3-سىنىپ وقۋشىسى ميلانا داۆىدوۆا 17 قاراشا كۇنى پاۆلودار وبلىسى بەسقاۋعا اۋىلىندا جوعالىپ كەتكەن بولاتىن. اناسىنىڭ ايتۋىنشا, قىزىن تاپپاعاننان كەيىن ول پوليتسياعا حابارلاسقان.
ىزدەستىرۋ جۇمىستارى دەمالىس كۇندەرى دە وبلىس كولەمىندە جالعاستى. جەتكىنشەكتى 500-دەن استام ادام ىزدەگەن, سونىڭ ىشىندە ۆولونتەرلار مەن وبلىستىڭ مۇددەلى تۇرعىندارى اۋىل ۇيلەرىن, جەرتولەلەردى ارالاپ, شاتىرلارعا شىعىپ, قۇدىقتاردى تەكسەردى. كينولوگتار, جۇزدەن استام اۆتوكولىك جانە «قازاۆياسپا» تىكۇشاعى جۇمىلدىرىلدى. ونىڭ جانسىز دەنەسى ءۇيدىڭ جانىنان تابىلدى. ول 19 قاراشا كۇنى كەشكە اناسى مويىنداعان كەزدە انىقتالدى. ميلانانى ءولتىردى دەپ ءوز اناسىمەن قاتار قىلمىس ءىزىن جاسىرۋعا كومەكتەسكەن تانىسى دا كۇدىككە ىلىنگەن.
ميلانا داۆىدوۆا قايتىس بولعاننان كەيىن بالا قۇقىقتارى جونىندەگى ۋاكىل دينارا زاكيەۆا مالىمدەمە جاسادى. ونىڭ ايتۋىنشا, بيىل قازاقستاندا 25 بالا كوز جۇمدى, ونىڭ 6-ى جاقىن ادامدارىنىڭ قولىنان قازا تاپتى.
