فوتو: parlam.kz
«مەملەكەت باسشىسى ق.توقاەۆ ەلىمىزدىڭ دامۋىنا باعىتتالعان جاڭعىرتۋ ساياساتىنا سايكەس قۇلاق اساتىن ۇكىمەت قاعيداسىنىڭ ورىندالۋىنا ايىرىقشا ءمان بەرىپ وتىر. بۇل ءار ازاماتتىڭ قولداۋىنا يە بولىپ, جەر-جەردە وزەكتى ماسەلەلەردىڭ ءتيىمدى شەشىلۋىنە ىقپال ەتۋدە. وعان وڭىرلەردە سايلاۋشىلارمەن كەزدەسۋدە ءوزىمىز دە كۋا بولىپ, جۇرتشىلىقتىڭ جىلى پىكىرىن ەستىپ ءجۇرمىز. دەسە دە كەيبىر قوردالانىپ قالعان ماسەلەلەردىڭ ءتۇيىنىن شۇعىل شەشۋگە سۇرانىپ تۇرعان جاعدايلار دا بار. بۇعان جامبىل وبلىسىنىڭ ورتالىعى تاراز قالاسىنداعى «كونە تاراز» مۋزەي عيماراتىنىڭ جاي-كۇيىن ايتۋعا بولادى. بۇل عيمارات 2015 جىلى قازاق حاندىعىنىڭ 550 جىلدىعىنا وراي ءارى كونە قالانىڭ كوركىنە كورىك قوسىپ, حالىقارالىق ءتۋريزمدى دامىتۋ ماقساتىندا سالىنعان ەدى. جاڭا قۇرىلىسقا مەملەكەتتىك بيۋدجەتتەن 950 ميلليون تەڭگە قارجى جۇمسالعانى بۇقارالىق اقپارات كوزدەرىندە دە, وبلىستىق ءماسليحات جيىنىندا دا اشىق ايتىلدى. مەرەكە اياسىندا رەسپۋبليكالىق دەڭگەيدەگى مارتەبەلى باسشىلار مەن قوناقتاردىڭ قاتىسۋىمەن «كونە تاراز» عيماراتى سالتاناتتى تۇردە اشىلعاندا كوپشىلىكتىڭ قۋانىشىندا شەك بولمادى. سول كەزدە مادەنيەت مينيسترلىگى ەڭ باعالى تاريحي ەكسپوناتتاردى وسى مۋزەيگە اكەپ قويدى. الايدا بۇل كوز الداۋ عانا بولدى. اتاعى دۇركىرەگەن مۋزەي ءبىر اپتا وتەر-وتپەستەن ەسىگىن تارس جاۋىپ تاستادى. سەبەبى عيمارات جارامسىز, جاڭبىر سۋى ءوتىپ ەلەكتر جارىقتارى مۇلدەم ىستەن شىقتى. جەرگىلىكتى اكىمدىك قوسىمشا قارجى جۇمساپ جوندەگەننەن تۇك ونبەدى. سودان بەرى سەگىز جىل ءوتتى. وسى ارالىقتا وبلىس اكىمى مەن سالالىق مينيسترلىكتە بىرنەشە مارتە اۋىس-ءتۇيىس بولدى. مۋزەي عيماراتى بوسقا قاڭىراپ تۇر», دەدى ءماجىلىس دەپۋتاتى.
وسى ماسەلەنى كوتەرىپ تالاي رەت دابىل دا قاعىلعانىمەن ناقتى شەشىم قابىلدانباعانىن ايتتى. الدەقانداي جوبالىق, قارجىلىق جوبا ازىرلەنۋدە دەگەنمەن دە ەش قايران بولماي تۇرعانىن جەتكىزدى. وسى كوزبوياۋ جوبا ءۇشىن مەملەكەت قازىناسىنان جۇمسالعان 1 ميلليارد تەڭگەگە جۋىق قاراجات قۇمعا سىڭگەن سۋداي بولعانىنا قىنجىلدى.
«قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى زاڭدا جەرگىلىكتى اتقارۋشى ورگاندارعا تاريحي-مادەني مۇرانى پايدالانۋ, كۇتىپ ۇستاۋ, قورعاۋ جانە قالپىنا كەلتىرۋ جۇمىستارىن ۇيىمداستىرۋ جۇكتەلگەن. الايدا زاڭدا كورسەتىلگەن قۇزىرەت پەن تالاپتار سونىمەن قاتار مۇراجاي ورنالاسقان عيماراتتىڭ قازىرگى كۇنگى جاعدايى قاتتى قىنجىلتادى. بۇل ساناتتاعى عيمارات نەگىزىنەن مادەنيەت مينيسترلىگىنىڭ قاراۋىندا بولۋى كەرەك ەدى. بىراق جارامسىز قالپىنداعى عيماراتتى قابىلداي الماسا دا ءىس-شارا قولدانۋعا مۇددەلىلىك تانىتۋعا ءتيىستى ەمەس پە؟ پرەمەر-ءمينيستردىڭ ورىنباسارىنان كەزىندە وسى مۋزەي عيماراتىن قابىلداپ العان جامبىل وبلىستىق اكىمدىگىنىڭ ارەكەتىنە ءادىل, قۇقىقتىق باعا بەرۋ, لاۋازىمدى جانە ءتيىستى وكىلەتتىلىگى بولعان قىزمەتكەرلەردىڭ جاۋاپكەرشىلىگى ناقتىلانۋىنا, مۇراجاي عيماراتىنىڭ ماسەلەسى وڭ شەشىلۋىنە ىقپال ەتۋىڭىزدى سۇرايمىن. لاۋازىمدى جانە ءتيىستى وكىلەتتىلىگى بولعان قىزمەتكەرلەردىڭ جاۋاپكەرشىلىگى ناقتى قارالۋىنا, مۇراجاي مارتەبەسىنىڭ ايقىندالۋىنا, عيماراتتىڭ تاعدىرىن وڭ شەشۋگە ىقپال ەتۋدى سۇرايمىن», دەگەن دەپۋتات بۇنى جۇزەگە اسىرۋ ادىلەتتى قازاقستان قۇرۋدىڭ ماقسات-مۇددەسى ەكەنىن جەتكىزدى.
