ونەر يەسىنىڭ ول ارەكەتىنىڭ بەينەجازباسى جەلىدە تاراپ كەتىپ, قىزۋ تالقىلاندى. بۇل ء"داستۇردىڭ" كوپشىلىككە ۇناماي قالعانىن ءانشىنىڭ ءوزى دە جەتكىزدى. ءتىپتى وعان اقتاۋلىق دوستارى دا رەنجىگەن.
«فاريزا ەكەۋمىزدىڭ كورپەگە اۋناعان ۆيدەوسى الەۋمەتتىك جەلىگە تارالىپ كەتتى. قانشاما پىكىر جازىلىپ جاتىر. اقتاۋلىق دوستارىم «بىزدە مۇنداي سالت جوق, قايدان شىعارىپ ءجۇرسىڭ» دەپ رەنجىدى. ءوز باسىم وسىنداي ءداستۇر بارىن بىلەتىنمىن, باتىس وڭىرىندە جوق بولعاسىن ءمان بەرىپ, زەرتتەمەگەن ەدىم. وڭتۇستىك وڭىردە بار ەكەن. قازاقتىڭ ەجەلگى داستۇرىندە دە بولعان. كەيىن ۋاقىت وتە كەلە قولدانىستان شىعىپ قالعان», – دەدى ول «جۇلدىزدى Weekend» باعدارلاماسىندا.
شىمكەنتتەن كەلىن العان ونەر يەسى وڭتۇستىك ءوڭىردىڭ سالتىنان اتتاپ كەتە الماعانىن دا اتاپ ءوتتى.
«ماعان ەشكىم ونداي سالت-ءداستۇردىڭ بارىن جانە ول سول جەردە جاسالۋ كەرەگىن ەسكەرتكەن جوق. ۆيدەودا دا ىڭعايسىزدانىپ قالعانىم كورىنىپ تۇر. بىراق كەلىنىمنىڭ 85-كە كەلگەن اجەسى وتىر, جاسى مەن جولى ۇلكەن قۇداعايلارىم وتىر, سولاردىڭ الدىندا شالقايمايىن دەدىم. بىراق ەشقانداي ۇيات بولاتىنداي ارەكەت جاسامادىم. ەرسى قىلىق, ارتىق قيمىل بولعان ەمەس. تەك قازاقتىڭ ەسكى-سالت ءداستۇرى دەپ قابىلداڭىزدار دەگىم كەلەدى. ارتىق كەتكەن بولسام, كەشىرىم سۇرايمىن», — دەدى ءانشى.
