باتىس قازاقستان وبلىستىق ارداگەرلەر كەڭەسى, قادىر مىرزا ءالى اتىنداعى وبلىستىق مادەنيەت جانە ونەر ورتالىعى جانە «ينتەگرال» جاستار قوعامدىق بىرلەستىگى ۇيىمداستىرعان سايىسقا وبلىستىڭ ءار ايماعىنان كەلگەن 13 اقساقال قاتىستى.
– قازاق «جاقسى ءسوز – جارىم ىرىس» دەيدى. بارلىق وڭ ناتيجە, يگى ءىس اۋەلى دۇرىس نيەتتەن, اق تىلەكتەن باستالادى عوي. تاريحىمىزدا ءسوز باستاعان شەشەن دە, قول باستاعان باتىر دا اقساقالدىڭ باتاسىن الماي جولعا شىقپاعان. سوندىقتان دا «باتالى ۇل ارىماس, باتاسىز قۇل جارىماس» دەگەن ماقال قالعان. ءبىز بۇگىنگى ءىس-شارا ارقىلى حالقىمىزدىڭ دانا ءداستۇرىن جالعاستىرىپ, اعا بۋىندى – باتا بەرۋگە لايىق اقساقال بولۋعا, جاس بۋىندى – باتا الۋعا لايىق ازامات بولۋعا شاقىرعىمىز كەلەدى, – دەيدى وبلىستىق ارداگەرلەر كەڭەسىنىڭ توراعاسى ماقسوت بەرگەن.
بەلگىلى ايتىسكەر اقىن باۋىرجان شيرمەدين ۇلى ادەمى جۇرگىزگەن بايقاۋعا قازاقستان جازۋشىلار وداعى وبلىستىق فيليالىنىڭ توراعاسى, ۇلتتىق قۇرىل-تايدىڭ مۇشەسى باۋىرجان عۇبايدۋللين باستاعان قازىلار القاسى جەتەكشىلىك ەتتى. قاريالاردىڭ ءوزىن ءوزى تانىستىرۋى, سايىس شارتىنا ساي توگىلگەن اس باتاسى, العىس باتاسى, توي باتاسى, ساپار باتاسى سەكىلدى اق تىلەكتەر ىشكى مازمۇنىمەن دە, سىرتقى سۇلۋلىعىمەن دە كوپشىلىكتى تەربەي ءتۇستى. ءسوزىن قاعازدان, ءتىپتى قالتا تەلەفونىنان وقىعان «زاماناۋي» قارتتار دا كەزدەستى. سايىس سوڭىندا قازىلاردىڭ ءادىل باعالاۋىمەن تاسقالا اۋدانىنىڭ اقساقالى جۇماگەلدى ۇمبەتاليەۆ ءبىرىنشى ورىنعا لايىق دەپ تانىلدى. اقجايىقتىق اقىن ساعىنتاي بيسەنعاليەۆ – ەكىنشى, بوكەي ورداسىنان كەلگەن تىلەگەن ارىستانبەكوۆ ءۇشىنشى ورىندى جەڭىپ الدى. بارلىق باتاگويگە ديپلوم مەن باعالى سىيلىق بۇيىردى. سىرىمدىق تولەۋ شاريفۋللين اقساقال «قۇرمەتتى ارداگەر» توسبەلگىسىن تاقتى.
– بۇل وتە مازمۇندى ءىس-شارا بولدى. مۇنداي ءتالىمدى تاربيەنى ەشبىر وقۋ ورنى الماستىرا المايدى عوي. «اكە كورگەن وق جونار, شەشە كورگەن تون پىشەر» دەگەندەي, ونەگەلى ءداستۇردى ومىرشەڭ ەتۋ قولىمىزدا تۇر. سوندىقتان مۇنداي ىزگىلىكتى ءىس-شارالاردى ءاردايىم قولدايمىز, – دەيدى وبلىستىق قوعامدىق دامۋ باسقارماسىنىڭ باسشىسى گۇلجانار شوكەەۆا.
باتىس قازاقستان وبلىسى
