«كەزىندە تايقازاننىڭ ەلگە ورالۋىن جۇرت جاقسى ىرىمعا بالاعان ەدى. كوپ ۇزاماي قازاقستان تاۋەلسىز مەملەكەت بولدى. ۇلت ازاتتىعى ءۇشىن كۇرەسكەن كەنەسارىنىڭ قولىندا بولعان قۇران كىتابىنىڭ ەلگە كەلۋى دە جاقسى ىرىم دەپ ويلايمىن. بۇل وقيعا قازاقستاننىڭ جاڭا ءداۋىرىنىڭ بەرەكەلى باستاۋى بولسىن دەپ تىلەيىك», دەدى پرەزيدەنت ۇلتتىق قۇرىلتايدا. ەندى, مىنە, پرەزيدەنت باستاماسى ىسكە اسىرىلىپ, قۇندى جادىگەر كەسەنەگە قويىلدى.
قۇران كىتاپتى قوجا احمەت ياساۋي كەسەنەسىنە تاپسىرۋ ءىس-شاراسىنا تۇركىستان وبلىسىنىڭ اكىمى دارحان ساتىبالدى, قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى, كەنەسارى حاننىڭ ۇرپاقتارى, زيالى قاۋىم قاتىستى. «قازاقتىڭ 21 حانى, سۇلتاندارى مەن باتىرلارى جەرلەنگەن قوجا احمەت ياساۋي كەسەنەسىنە وسىنداي سيرەك جادىگەردى اكەلۋ – ءبىز ءۇشىن ۇلكەن مارتەبە, ماقتانىش. بۇل – ەلىمىزدىڭ رۋحىن كوتەرەتىن وقيعا ەكەندىگى انىق», دەدى وبلىس اكىمى. ال ناۋرىزباي قاجى تاعان ۇلى قۇندى جادىگەردى قازاقستان مۇسىلماندارى ءدىني باسقارماسى وسى جىلدىڭ ماۋسىم ايىندا قابىلداپ العانىن, مارال يشاننىڭ تەك ءدىندار عانا ەمەس, قوعام قايراتكەرى ەكەنىن ايتىپ ءوتتى. «قۇندى جادىگەردىڭ قوجا احمەت ياساۋي بابامىزدىڭ كەسەنەسىنە قويىلۋى ءداستۇرلى ءدىنىمىزدىڭ مارتەبەسىنىڭ ارتىپ, حالقىمىزدىڭ ساناسىنىڭ ىزگىلىككە وزگەرۋىنە ىقپال ەتەدى دەگەن ويدامىز. مارال يشان بابامىز كىم دەگەندە, ءبىز ونى تەك ءدىندار عانا ەمەس, قوعام قايراتكەرى, ازاتتىق ءۇشىن كۇرەسكەن تۇلعا رەتىندە تانۋعا ءتيىسپىز. بابامىز پاتشا ۇكىمەتىنىڭ قازاق جەرىندە جاساعان ادىلەتسىزدىكتەرىنە قارسى تۇرىپ, ەلدى جۇمىلدىرىپ, ۇلتتى ساقتاۋدا ۇمىتىلماس ۇلاعاتتى ىستەر اتقاردى. مارال يشاننىڭ اعارتۋشىلىق قىزمەتى ءبىر توبە. ءبىز دە بۇگىن قۇندى مۇرانى حاندار مەن بيلەر, سۇلتاندار مەن رۋحاني ۇستازداردىڭ قيامەتكە دەيىنگى ماڭگىلىك تۇراعى بولعان كيەلى مەكەنگە الىپ كەلدىك. الەمنىڭ ءار قيىرىنان تۇركىستانعا كەلەتىن كەز كەلگەن ادام ءۇشىن بۇل تاعىلىمى مول, بەرەرى كوپ تاريحي دۇنيە», دەدى باس ءمۇفتي. مادەنيەت جانە اقپارات مينيسترلىگى ءدىن ىستەرى كوميتەتىنىڭ توراعاسى ەرجان نۇكەجانوۆ تا جادىگەردىڭ ماڭىزىنا توقتالدى.
رۋحاني ءىس-شارادا عۇلاما قاريلار قۇران حاتىم ءتۇسىردى. باس ءمۇفتي قۇران كىتاپتى «ازىرەت سۇلتان» مەملەكەتتىك تاريحي-مادەني مۋزەي-قورىعىنىڭ ديرەكتورى ماۋلەن سادىقبەكوۆكە تاپسىرىپ, ول ۇلكەن اقساراي بولمەسىندەگى ارنايى دايىندالعان سورەگە ورناتىلدى. ەكى عاسىر بويى قولدان-قولعا ءوتىپ, تاريحي وتانىنا جەتكەن كيەلى كىتاپتا كەنەسارى حاننىڭ ءمورى بار. وتاندىق جانە شەتەلدىك عالىمدار مۇقيات زەرتتەپ, قۇراننىڭ مارال يشانعا تيەسىلى بولعانىن جانە كەنەسارى حانعا بەرىلگەنىن انىقتاعان.
تۇركىستان
