«اتامەكەن» ونەر ورداسىندا ەكى اپتا تۇراتىن كورمەنىڭ ماقساتى – ەكى وبلىس سۋرەتشىلەرىن مادەني جانە رۋحاني بايلانىستىرىپ, ءوزارا شىعارماشىلىق تاجىريبە الماسۋعا مۇمكىندىك جاساۋ, قىزىلوردا وبلىسى سۋرەتشىلەرىنىڭ تۋىندىلارىن ورال حالقىنا كورسەتۋ. كورمەدە ءابىلحان قاستەەۆ, ولگا كۋجەلەنكو, ۆ.كۋزەنكوۆ, گۇلفايرۋز يسمايلوۆا سىندى قازاق ۇلتتىق سۋرەت ونەرى كلاسسيكتەرىنىڭ شىعارمالارىنان باستاپ, وتاندىق جاڭا باعىت وكىلدەرى ساليحيتدين ايتباەۆ, ابىلقاسىم سارسەنباەۆ, شاكىربەك سامەنوۆ, ياسبي اعىتاەۆ, امانكەلدى كەنەنباەۆ, ءابدىلدا ابىزبەكوۆ, جاڭابەرگەن وسىمبەتوۆ, وركەن ماماقوۆا, ت.ب. تانىمال ونەر يەلەرىنىڭ بارلىعى 73 تۋىندىسى قويىلدى.
كورمەنىڭ اشىلۋ سالتاناتىندا باتىس قازاقستان وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى قۋانىشبەك مۇحانعاليەۆ ءسوز سويلەپ, سىر ەلىنەن رۋحاني-مادەني ءىستى باستاپ كەلگەن قوناقتارعا اقجايىق جۇرتىنىڭ اتىنان العىس ءبىلدىردى. ال قىزىلوردا وبلىستىق تاريحي-ولكەتانۋ مۋزەيىنىڭ ديرەكتورى ساپار كوزەيباەۆ قوناقجايلىق تانىتقان «اتامەكەن» ونەر ورداسىنىڭ ديرەكتورى باۋىرجان حاليوللاعا ريزاشىلىق ءبىلدىرىپ, كوركەمسۋرەت قورىنا كارتينا سىيعا تارتتى.
«قازىرگى تاڭدا س.ايتباەۆ اتىنداعى كوركەمسۋرەت گالەرەياسىنىڭ قورىندا 800-گە جۋىق قۇندى تۋىندى بار. ءبىز ورالعا جوعارىدا اتى اتالعان ونەر يەلەرىنىڭ شىعارماسىنان بولەك, گالەرەيا قورىنداعى وزبەكستاندىق سۋرەتشى ديلوروم مامەدوۆانىڭ پاستوزدىق تەحنيكادا ورىندالعان «ارال ماڭىنداعى اۋىل» كارتيناسى مەن قىرعىز سۋرەتشىسى ۋرمات سەرەڭوۆتىڭ «قورقىت تۋرالى اڭىز» كارتيناسىن اكەلدىك. سىر ەلىنىڭ تاريحىن شىعارماشىلىعىنا ارقاۋ ەتكەن تەمىربەك ساعىمباەۆ, نۇركەن قالىمبەتوۆ, ۇلمەكەن ماۋىتوۆا, داۋلەتبەك تويشىباەۆتىڭ جۇمىستارى دا كورەرمەندى بەيجاي قالدىرماس دەگەن ويدامىز», دەيدى ساپار الياسقار ۇلى.
باتىس قازاقستان وبلىسى
