ورتالىقتىڭ اشىلۋ سالتاناتىنا دەنساۋلىق ساقتاۋ ءمينيسترى اجار عينيات, سىرتقى ىستەر مينيسترلىگى ينۆەستيتسيالار كوميتەتىنىڭ توراعاسى ارداق زەبەشەۆ, اقش-تىڭ ەلدەگى توتەنشە جانە وكىلەتتى ەلشىسى دەنيەل روزەنبلۋم, GE HealthCare كومپانياسىنىڭ رەسەي, تمد-داعى پرەزيدەنتى جانە اتقارۋشى ديرەكتورى ەلەنا لەگەزينا جانە استانا مەديتسينا ۋنيۆەرسيتەتىنىڭ رەكتورى كامالجان نادىروۆ قاتىستى.
اتالعان كومپانيا الەمدىك ۇزدىك تاجىريبەنى پايدالانا وتىرىپ, دياگنوستيكا دارىگەرلەرىن وقىتاتىن ساراپتامالىق الاڭ بولادى. مۇندا دارىگەرلەر مەديتسينا عىلىمى مەن پراكتيكاسىنىڭ جاڭا جەتىستىكتەرى تۋرالى ۋاقتىلى اقپارات الىپ, وزدەرىنىڭ كاسىبي دايارلىق دەڭگەيىن ۇدايى جەتىلدىرە الادى. ءىس-شارا بارىسىندا دەنساۋلىق ساقتاۋ ءمينيسترى اجار عينيات شەتەلدىك كومپانيامەن جاسالعان كەلىسىم تۋرالى تارقاتىپ ايتىپ بەردى.
– بيىل قىركۇيەكتە نيۋ-يوركتە پرەزيدەنت قاسىم-جومارت توقاەۆ دەنساۋلىق ساقتاۋ جۇيەسىن دامىتۋ جونىندە بىرقاتار كەلىسىمگە قول قويدى. بۇل كەلىسىمدەردىڭ ءبىرىنىڭ ناتيجەسى GE كومپانياسىمەن ۋدز اپپاراتتارىن, كومپيۋتەرلىك توموگرافتاردى ءوندىرۋ بويىنشا بىرلەسكەن زاۋىت اشۋ جوباسى بولدى. ءىرى كومپانيامەن ارىپتەستىك بايلانىس وتاندىق ءوندىرىستى دامىتۋعا عانا ەمەس, سونىمەن قاتار مەديتسينا ماماندارىن وقىتۋعا, مەديتسينا قىزمەتكەرلەرىن وقىتۋعا جانە ولاردىڭ بىلىكتىلىگىن ارتتىرۋعا, عىلىمي زەرتتەۋلەر جۇرگىزۋگە دە سەپتەسەدى, – دەدى ا.عينيات.
استانا مەديتسينا ۋنيۆەرسيتەتىنىڭ رەكتورى كامالجان نادىروۆتىڭ ايتۋىنشا, مۇنداي باعدارلامالار ەلدەگى ۇزدىكسىز مەديتسينالىق ءبىلىم بەرۋ تۇجىرىمداماسىن قولداۋعا جانە دامىتۋعا ىقپال ەتەدى.
– وسى شارۋانىڭ بارلىعى ۋنيۆەرسيتەتتەگى وقىتۋشى-پروفەسسور قۇرامنىڭ الدىن الا ۇيلەستىرگەن جۇمىسىنىڭ جانە دەنساۋلىق ساقتاۋ مينيسترلىگىنىڭ قولداۋىنىڭ ارقاسىندا ىسكە اسىپ وتىر. بۇگىندە ۋنيۆەرسيتەت 70-تەن اسا مەموراندۋم جاساستى. بيىلدىڭ وزىندە ءبىز ەلىمىزدە دەنساۋلىق ساقتاۋ سالاسىن دامىتۋعا باعىتتالعان ءتۇرلى ماسەلەلەر بويىنشا جەتەكشى حالىقارالىق جانە قازاقستاندىق كاسىبي قاۋىمداستىقتاردىڭ قاتىسۋىمەن 40-قا جۋىق حالىقارالىق فورۋم, كونفەرەنتسيا, كونگرەسس, سەز وتكىزدىك. ەندى اشىلىپ وتىرعان وقۋ ورتالىعى ەلىمىزدەگى ساۋلەلىك دياگنوستيكا سالاسىنىڭ بىلىكتى ماماندارىن كوبىرەك دايارلاۋعا كومەكتەسەدى. ۋنيۆەرسيتەت جىل سايىن جۇزگە جۋىق رەنتگەنولوگ-رەزيدەنت دايىنداپ شىعارادى جانە 150 دارىگەر وقىتادى. جاڭا وقۋ ورتالىعىنىڭ استانا مەديتسينا ۋنيۆەرسيتەتىنىڭ بازاسىندا اشىلۋى – ەستە قالارلىق وقيعا. ۋنيۆەرسيتەتتىڭ كوپجىلدىق تاجىريبەسى بار. پروفەسسورلارىمىز قازاقستاننىڭ راديولوگيالىق قوعامىن باسقارادى جانە ەلىمىزدىڭ بارلىق وڭىرىنەن ساراپشىلاردى وقىتادى. بيىل ءبىزدىڭ ۋنيۆەرسيتەتتە ورتالىق ازيا ەلدەرىندەگى العاشقى راديولوگيا عىلىمي زەرتتەۋ ينستيتۋتى اشىلىپ, وعان اكادەميك ج. حامزاباەۆتىڭ ەسىمى بەرىلگەنىن دە اتاپ وتكىم كەلەدى, – دەيدى ك.نادىروۆ.
GE Healthcare Academy وقۋ باعدارلاماسى ءبىرىنشى كەزەكتە جوعارى تەحنولوگيالىق مەديتسينالىق جابدىقتى ءتيىمدى جانە قاۋىپسىز پايدالانۋدىڭ پراكتيكالىق داعدىلارىن قالىپتاستىرۋعا باعىتتالىپتى. سونىمەن قاتار مۇندا پاتسيەنتتەرگە مەديتسينالىق قىزمەت كورسەتۋ ساپاسىن ارتتىرۋعا باعىتتالعان وقىتۋ شەبەرلىك ساباقتارى وتكىزىلەدى. وقۋ ورتالىعىنىڭ بازاسىندا راديولوگيا سالاسىندا عىلىمي-پەداگوگيكالىق كادرلاردى دايارلاۋ جاعى دا جوسپارلانىپتى. بۇل جۇمىسقا GE Healthcare ساراپشى دارىگەرلەرى بەلسەنە قاتىسادى ەكەن.
GE Healthcare كومپانياسىنىڭ رەسەي, تمد-داعى پرەزيدەنتى جانە اتقارۋشى ديرەكتورى ەلەنا لەگەزينا دا ورتالىقتىڭ دارىگەرلەردى وقىتۋدا مۇمكىندىگى مول ەكەنىن ايتتى.
– كومپانيا قازاقستاننىڭ دەنساۋلىق ساقتاۋ سالاسىنداعى ماماندارى ءۇشىن ءبىلىم بەرۋ جوبالارى مەن باعدارلامالارىن قالىپتاستىرۋعا جانە دامىتۋعا ءوز ۇلەسىن قوسۋ مۇمكىندىگىنە يە بولىپ وتىر. GE HealthCare Academy – دارىگەرلەردى كەشەندى وقىتۋعا ارنالعان زاماناۋي الاڭ. دياگنوستيكانىڭ جاڭا تەحنولوگيالارى مەن ادىستەرى تۋرالى وزەكتى اقپاراتقا قول جەتكىزۋگە مۇمكىندىك بەرەدى. سونداي-اق كاسىبي بايلانىستار جەلىسىن كەڭەيتۋگە كومەكتەسەدى, – دەپ مالىمدەدى ە.لەگەزينا.
ورتالىقتا ساباقتاردى استانا مەديتسينا ۋنيۆەرسيتەتىنىڭ وقىتۋشىلارى جانە كلينيكالىق وقىتۋ بويىنشا GE HealthCare-ءنىڭ جوعارى بىلىكتى ماماندارى وتكىزەدى. دارىستەر مەن شەبەرلىك ساباقتارىنا قاتىسۋعا جەتەكشى ەلدەگى جانە شەتەلدىك ساراپشىلار شاقىرىلادى ەكەن. اقپارات ءۇشىن ايتار بولساق, GE Healthسare كومپانياسى وزىق مەديتسينالىق جابدىقتاردى, دياگنوستيكاعا ارنالعان فارماتسەۆتيكالىق پرەپاراتتاردى, سونىمەن قاتار ينتەگراتسيالانعان تسيفرلىق شەشىمدەردى, دەرەكتەردى تالداۋ قىزمەتتەرى مەن جۇيەلەرىن ازىرلەيتىن الەمدىك جەتەكشى وندىرۋشىلەردىڭ ءبىرى سانالادى. GE Healthسare 100 جىلدان اسا ۋاقىت شەڭبەرىندە ۇزدىكسىز وقىتۋ باعدارلاماسىن ازىرلەۋ ارقىلى دارىگەرلەر مەن مەديتسينالىق مەكەمەلەردىڭ تيىمدىلىگىن ارتتىرۋعا, ناقتى دياگنوز قويۋعا, وڭتايلى ەمدەۋ ادىستەرىن تاڭداۋعا ىقپال ەتىپ كەلەدى.
