گرۋزيا باس پروكۋراتۋراسىنىڭ سايتىندا جازىلعانداي, 14 قاراشا كۇنى تبيليسيدەگى نينو جۆانيا كوشەسىندە ءيتىن سەرۋەندەتىپ جۇرگەن گرۋزيا ازاماتى گۋرام ەليزباراشۆيلي مەن بالاسى وقيعا ورنىنا جاقىن ماڭداعى بالاباقشاعا باراتىن قازاقستان ازاماتى اراسىندا جانجال شىققان. گرۋزيالىق اقپارات قۇرالدارىنىڭ حابارلاۋىنشا, داۋعا ەر ادامنىڭ بالاباقشا اۋماعىندا ءيتىن سەرۋەندەتۋى سەبەپ بولعان.
گرۋزيانىڭ باس پروكۋراتۋراسى قاقتىعىس كەزىندە گۋرام ەليزباراشۆيليدىڭ قازاقستان ازاماتىنا قارسى قارۋدان وق اتقانىن مالىمدەدى. ءتارتىپ ساقشىلارى گۋرام ەليزباراشۆيليدى وقيعادان كەيىن بىرنەشە ساعاتتان سوڭ قازاقستاندىق ازاماتتى جارالاعانى ءۇشىن تۇتقىنداعان. ايعاقتى زات رەتىندە قىلمىس قارۋى ايىپتالۋشىنىڭ ايەلىنىڭ اناسىنىڭ ۇيىنەن الىنعانى اتاپ ءوتىلدى.
كەيىن گرۋزيانىڭ ىشكى ىستەر مينيسترلىگى قىلمىستىق كودەكستىڭ دەنساۋلىققا قاساقانا اۋىر زيان كەلتىرۋ جانە زاڭسىز قارۋ الىپ ءجۇرۋدى جازالايتىن 117 جانە 236-باپتارى بويىنشا تەرگەۋدى باستادى.
تەرگەۋدەن كەيىن گرۋزيانىڭ باس پروكۋراتۋراسى گۋرام ەليزباراشۆيليگە قارسى ايىپ تاقتى.
دەپارتامەنت اتاپ وتكەندەي, گۋرام ەليزباراشۆيلي بۇرىن قاساقانا كىسى ولتىرگەنى ءۇشىن سوتتالعان.
«جانجال كەزىندە گۋرام ەليزباراشۆيلي س.م.-عا قاراي اتىس قارۋىنان بىرنەشە رەت وق اتقان, ناتيجەسىندە ول جابىرلەنۋشىنىڭ ەكى اياعىنا كوپتەگەن جاراقاتتار سالعان», - دەپ جازدى پروكۋراتۋرا.
ۆەدومستۆونىڭ مالىمەتىنشە, جابىرلەنۋشىگە تيگەن وقتىڭ ءبىرىنىڭ ناتيجەسىندە گۋرام ەليزباراشۆيلي ابايسىزدا تىزە ايماعىنان وق جاراقاتىن العان.
«گرۋزيا پروكۋراتۋراسى ءبىر ادامعا قاساقانا دەنساۋلىققا اۋىر زيان كەلتىرۋ, اتىس قارۋى مەن وق-دارىلەردى زاڭسىز الۋ, ساقتاۋ جانە الىپ ءجۇرۋ فاكتىلەرى بويىنشا ايىپ تاعىلدى», - دەلىنگەن قۇقىق قورعاۋ ورگانىنىڭ حابارلاماسىندا.
پروكۋراتۋرا سوتقا ايىپتالۋشىعا قاتىستى زاڭمەن بەلگىلەنگەن مەرزىمگە بۇلتارتپاۋ شاراسى رەتىندە باس بوستاندىعىنان ايىرۋدى قولدانۋدى سۇراپ شاعىمداندى. گرۋزيانىڭ ىشكى ىستەر مينيسترلىگىندە قىلمىستىق تەرگەۋ جالعاسۋدا.
